ख्वप, खौमा त्वालय् सन् १८९० स बूम्ह पद्मसुन्दर नेपाः देय्या न्हापांम्ह विद्युत इन्जिनीयर खः । नेपालभाषाया प्यंगःथां मध्यय् छम्ह जगतसुन्दर मल्लया किजा थ्वय्कःयात जापानय् वनाः आखः ब्वनेगु माःगु फुक्क ब्यवस्था जगतसुन्दरपाखें जूगु खः । सन् १९१६ स जापान टोकियो विश्वविद्यालयपाखें इन्जिनियर ब्वनेगु क्वचायेकूगु खः । लिपा १९२२ स संयुक्तराज्य अमेरिकां इन्जिनीयरिङ्ग विधाय् विद्यावारिधि क्वचायेकाः नेपाः लिहां झाःगु खः । नेपाःया आपालं जलविद्युत गृहया विकास यायेगुली थ्वय्कःया मूवंगु भूमिका दु । संयुक्तराज्य अमेरिकाया भ्रमणयाःम्ह न्हापांम्ह नेपाःमि नं थ्वय्कः हे खः ।