येँया झोछेँ त्वाःया जोरगणेश व नःबही मथ्यंवं छगू चकंगु लँ वइ । व हे लँ वा सतकलिक्क छगू बहाः वइ । थ्व बहाःयात बटुबहाः वा बाकुबहाः धाइ । थ्वयात इन्द्रपुरनगर विहार नं धाइ । विहारया वास्तुकलाया ल्याखं थ्व बहाःया क्वाःपाःछेँ छखा बाहेक मेगु सकतां स्यने धुंकूगु खनेदु । थ्व बहाःया क्वाःपाःद्यकथं उत्तराभिमुख ध्यानमुद्राया अमिताभ बुद्ध खः । क्वाःपाःद्यया मू लुखाय् तोरण तयातःगु मदु । वि.सं. २०३० सालय् जोन के लकया सफुलिइ तयातःगु किपा कथं मूलुखा लिक्कसं सारिपुत्र व मौद्गल्यायनया मूर्ति जवंखवं तयातःगु खनेदु । तर आः बिना रुपया ल्वहं निपाः जक तयातःगु दु । अथेहे जवंखवं याकःझ्याः नं दु ।
क्वाःपाःद्यया च्वय्या तँय् पसुकाझ्याः व जवंखवं याकःझ्या, वयां च्वय् चना वनेधुंकूगु भगवानद्यः तयातःगु न्ह्यय्गू ग्वाखंचा प्वाः झ्वःलिं दु । वयां च्वय् स्वपाः झ्याः तयातःगु दु । बटुबहाःया दथुइ लाक्क छगः मल्लकालीन चैत्य दु । तर बांलाक अभिलेख खनेमदु । थ्व बहाःया बुसादँ चाबही गंगामाई जात्राया दिंकुन्हु व चैत्यया बुसादँ बैशाख पुन्हिकुन्हु याइ ।