येँया भोटेबहाःया अबुजु पुस्तमान व मां चन्द्रिकादेवीया कोखं जन्म जूम्ह बद्रीमान सिंह भारतया जादवपुर विश्वविद्यालयपाखें इन्जिनियरिङ्ग विधाय् स्नातक जुयादीम्ह, लिपा वेलायतं विद्यावारिधि उपाधि कयादीगु खः । थ्वय्कः विशेष यानाः स्वनिगःदुने विद्युत लाइन प्रसारणया डिजाइन याःम्ह छम्ह न्ह्यलुवाः प्राविधिक खः । लिपा बालाजु–बीरगञ्ज तकया प्रसारया ज्याय् मूभूमिका म्हितादिल । थाय्थासय् विद्युत प्रसारणया सव–स्टेशन दयेकेगुली थ्वय्कः न्ह्यलुवाः खः । सन् १९३४ स जन्म जूम्ह थ्वय्कः तःदँतक नेपालय् विद्युत ख्यःया विकासय् ज्या यानादिल ।