येँया ओमबहाःया पिनेसं च्वंगु जोरगणेशं भचा च्वय् जवपाखे च्वंगु बहाः खः— बिकमाः बहाः । थ्व बहाःयात संस्कृत भासं मञ्जुश्रीनक महाविहार धाइ । मञ्जुश्रीं चोभारय् चन्द्रहास खड्गं पालाः नेपाःगाःया लः पितछ्वये धुंकाः दकलय् न्हापां वस्ती दयेकूगु थाय्कथं थ्व लागायात कयातःगु दु । मञ्जुश्रीं दयेकूगु विहार जूगुलीं थ्व विहारयात मञ्जुश्रीनक महाविहार धाल धइगु किंवदन्ती दु । वस्ती दयेके धुंकाः मनुतय्त ज्ञान, कार्यसिद्धी व सीप बीगु निंतिं विश्वकर्मा द्यः पलिस्था यानाबिल । उकिं थ्व विहारयात विश्वकर्मा बहाः वा बिकमाः बहाः धकाः नं धायेगु याः ।
बहाःया पश्चिमपाखे पलिस्था यानातःगु विश्वकर्मा देगलय् थ्वहे स्वम्ह द्यःया मूर्तिकथं ज्ञान व सीपया प्रतिक मञ्जुश्री,कार्यसिद्धीया प्रतिक गणेद्यः व विघ्नबाधा हरणकर्ताया प्रतीककथं महांकाःद्य यात कयातल । तर देगलय् मञ्जुश्रीया प्रतिककथं खड्ग, गणेद्यःया प्रतिककथं लड्ड,महांकाःद्यया प्रतिककथं पात्रयात थापना यानातःगु दु । थ्व स्वंगु मंकाः प्रतिकयात त्रिदेव धया वयाच्वंगु दु । थ्व विहारया सर्वसंघया दुजःपिं सकलें शाक्यकुलपुत्रपिं खः । थन सदस्यपिंसं उत्तराभिमुखी क्वापाःद्यः अक्षोभ्य बुद्धयात न्हियान्हिथं सुथ बहनी पालंपा बाःपाःकथं पुजाआजा याना वयाच्वंगु दु ।
थ्व बहाःया दथुइ लाक छगः चिभाः नं दु । शाक्य कुलपुत्रपिंत क्वाःपाःद्यया न्ह्यःने प्रवजित यायेमाःगुलिं छपाः मन्दःपाः व छत्रपाल नं तयातःगु दु । लोकोत्तर पिण्डदान यायेत क्वाःपाःद्यःया न्ह्यःने प्यगाः नं दु । दक्षिणपश्चिमपाखे हनुमान द्यःया चिकिचाधंगु मूर्ति नं तयातःगु दु ।
थन लुयावःगु सिजःपौ थ्यंमथ्यं ६०० दँ न्ह्यः अर्थात् यक्षमल्लकालीन(ने.सं.५४९)या खनेदु । अथेहे ने.सं.६३१ या रत्नमल्लकालीन, ने.सं.७१६या श्री शिवसिंहदेवया अभिलेख लुयावःगु दुसा ने.सं.८०० पाखे थुगु बहाःया जयधन शाक्यं घ्यःचाकु संल्हूकुन्हु सम्यक न्यायेकाः जुजु नृपेन्द्रमल्लयात लुँया गजू दुगू सिंहासन व लुँया छत्र देछाःगु व थ्व ज्याझ्वलय् जुजु नापं निम्ह राजकुमारपिं पार्थिवेन्द्र मल्ल व महिपतिन्द्र मल्ल न उपस्थित जुयाः सम्यक दान कयावंगु खँ तयातःगु सिजःपौ सुरक्षित यानातःगु दु ।
थ्व बहाःया सर्वसंघया दाजुकिजापिं उखेंथुखें वनाः १३ गू थीथी कचा बहाः नीस्वनातःगु दु । बिकमाःबहाः (ओमबहाः)बाहेक थ्व बहाःया थीथी कचा बहाःत थथे दु – १) पुन्छेबहाः(पुन्छे) २)गंचाबहाः (गंचा)३) गन्चाननिबहाः(गंचा) ४)मिम्मनी बहाः (बलम्पु) ५)भ्वंबहाः(कोतलाछि) ६)थानाबहाः(चिकंमुगः) ७) तमुगःबहाः (तमुगः गल्ली) ८)बाकूबहाः(द्वाका) ९) न्हूछेँ बहाः(न्हूछेँ) १०)त्वाःक्यब बहाः(त्वाक्यब) ११)पःखा छेँ बहाः(पःखा छेँ) १२)रत्नाकर बहाः(गंचाननि)