नेपालभाषाया कविता व विविध च्वसू च्वयादीम्ह भाजु मोहन दुवालया जन्म वि.सं. २००६ जेठ २० गते भ्वँत, काभ्रेय् जूगु खः । वय्‌कःया मांया नां खिल कुमारी दुवाल व बौया नां गणेशबहादुर दुवाल खः । भ्वँतय् च्वनाः वय्‌कलं नेपालभाषा व खस् नेपाली भाषाया साहित्यय् मदिक्क अथक योगदान यानादीगु दु ।

२०२० सालपाखे भ्वँतय् मचाः पुचः स्वनाः ल्हांतच्वया–पौ पिथनेगु अभियानया वय्‌कः अभियानकर्ता खः । अबलय् हे वय्‌कलं थःगु सम्पादनय् ल्हातंच्वयापौ फसंपुगु लप्ते पिकयादिल । रेडियो नेपालं जीवन दबू ज्याझ्वः लिकाःगुया विरुद्धय् येँ जूगु आन्दोलनय् सक्रिय सहभागी जुयादिलसा भ्वँतय् वय्‌कलं थुकिया विरुद्ध कार्यक्रमया संयोजक व अभियानकर्ता जुयाः ज्या यानादिल ।

वय्‌कलं छुं दँ काभ्रे बहुमुखी क्याम्पसय् नेपालभाषाया प्रशिक्षक जुयाः नेपालभाषा ब्वंकेगु ज्या नं यानादिल । वय्‌कःया नेपालभाषाय् प्रकाशित कृति थुकथं दु— चुलिजाःगु स्वां (चिनाखँ मुना–२०२३), जः=जीवन, जीवन=जः (चिनाखँ मुना–२०५९), जि न्हाय्‌कं :

न्हाय्‌कंया दुने जि (विविध–२०७९) । वय्‌कलं खस् नेपाली भासं नीच्यागू सफू च्वयाः पिकयादीगु दु । अथेहे वय्‌कलं सम्पादन यानादीगु नेपालभाषाया पत्रिका, सफू थुकथं जुल –सः (काभ्रे बहुमुखी क्याम्पसया दँपौ), झी नेवाः (दँपौ)–११२८, मत/अभिमत (खण्ड ३–२०५४) । वय्‌कलं खस् नेपालीभाषं सम्पादन यानाः पिकया वयाच्वनादीगु जनमत लय्‌पौया ल्याः ११६ यात नेपालभाषा साहित्य ल्याःया रुपय् बि.सं.२०६३ इ पिकयादीगु खः ।

भाजु मोहन दुवाल भ्वँतय् गठन जुगू नेपालभाषा मंकाः खलःलगायत फुक्कं धयाथें नेपालभाषाया संगठन, नेवाः पत्रकार राष्ट्रिय दबू जिल्ला कचाः व केन्द्रीय समिति लिसें दलुचा व पलिस्था पत्रिकाया सल्लाहकार खः । सुकुन्दाया संरक्षक खः । अथेहे वय्‌कः तःगू हे संघ संस्थाया जीवंकाछि दुजः जुयादीगु दु ।

भाजु मोहन दुवालया भाषा व साहित्यय् सक्रियता व योगदानया कदर यासें वय्‌कःयात सक्वय् २०२० सालपाखें महाकवि गिरिजाप्रसाद जोशीं भाग्योदय मा.वि सम्मान यानादीगु खः । अथेहे वय्‌कःयात कुमारी प्रकाशन व ईलोहं प्रकाशनया नःलि वाःपौ पाखें नं सम्मान याःगु जुल । वय्‌कःयात नेवाः पत्रकार राष्ट्रिय दबू पाखें सत्यमोहन जोशी सिरपाः देछाःगु जुल ।

अबु हिराकाजी शाक्य व मां नानिमाया शाक्यया कोखं ने.सं. १०८४ यंलागाः दसमि, बुधबारखुन्हु यलया सिन्चाहितिइ जन्म जूम्ह मोहन शाक्य २०३९ सालंनिसें संगीत ख्यलय्‌ मदिक्क सक्रिय जुया च्वनादीम्ह खः । वय्‌कःया आशा नकःमिनाप हालादीगु ‘मैंचिया सपलय्‌ च्वंगु स्वाँनं स्वइत स्वइच्वन’, ‘सुराई’, ‘मुसुक्क न्हिलाः जितः छकः स्वये छं मज्यू ला ?’, ‘जिं छता खँ ल्हाये थन छकः स्व’ लिसेंया ज्वःम्ये लोकं ययेकूगु म्ये खः । ३० पु म्ये पिथनादी धुंकूम्ह मोहन शाक्यया न्हय्‌पु भजन म्ये नं थुकी दुथ्याः ।

बौ रामशरण थापा व मां नन्दकुमारी थापाया क्वखँ येँया गोकर्णय् साहित्यकार समालोचक भाजु मोहन हिमांशु थापाया ने.सं. १०६० इ जन्म जूगु खः । भाजु हिमांशु थापां नेपाली विषयय् विद्यावारिधि यानादीगु खःसा वय्‌कःया च्वसा नेपाली साहित्य नापनापं छम्ह नेवाः मखयां नं नेपालभाषा साहित्य क्षेत्रय् उतिकं च्वन्ह्यात । साहित्य क्षेत्रय् वय्‌कःयागु विधा कविता व समालोचना खः ।

माछापुच्छ्रेया न्ह्यलय् सुपाय्‌या मृत्यु नेपालभाषां च्वयादीगु वय्‌कःया दकलय् न्हापांगु चिनाखँ खः । थ्व चिनाखँ ने.सं. १०८८ य् सितु पत्रिकाय् पिदंगु खः । नेपालभाषा थःगु मातृभाषा मखुसां नं साहित्य धयागु सकस्यां मंकाः खः धयागु भावना नुगलय् तयादीम्ह भाजु डा. हिमाशु. थापाजुया नेपालभाषा साहित्य क्षेत्रय् तःधंगु योगदान दु ।

त्रिभुवन विश्वविद्यालय पाटन क्याम्पसय् नेपालभाषा विषयया एम.ए.या पठनपाठन न्ह्याकूबलय् नेपालभाषा ब्वंकेगु यानादीपिं न्हापांपिं प्राध्यापकपिं मध्ये थ्वय्‌कः नं छम्ह खः । उगु इलय् थ्वय्‌कलं पूर्विय साहित्य ब्वंकादियाः थ्व विषयया शिक्षकया अभावपूर्ति यानादीगु खः ।साहित्य लेखन पाखे थ्वय्‌कलं जापानी हाइकूयात नेपालभाषां भाय्‌हिलाः ने.सं. ११०६ य् न्हू जापानी हाइकू नामं सफू पिथनादिलसा थःगु हे सम्पादनय् ने.सं. १११३ य् श्रीलंकाया न्हूबाखं सफू पिथनादिल । थ्व बाहेकं नेपालभाषा समालोचना साहित्यया लागा तब्या यायेगुलिइ नं थ्वय्‌कःया तःधंगु योगदान दु ।

धुस्वां साय्‌मिया गंकी, पुर्णबहादुर वैद्यया सरासु कविता संग्रहयात कयाः थ्वय्‌कःया समालोचनात्मक लेख पिदंगु दु । नेपालभाषाय् थ्वय्‌कःया समालोचना म्हो हे जक पिदंगु खःसां समालोचनाया ख्यलय् थःगु बिस्कंगु म्हसीका तयेफुम्ह व्यक्तित्व खः । थथेहे नेपाली भाषाय् वि.सं. २०३६ सालय् साझा प्रकाशनपाखें समालोचना सफू साहित्य परिचय नांगु सफू पिथनेधुंकूगु दु ।

बा गणपति राजोपाध्याय व मां लक्ष्मीवाणी राजोपाध्यायया कोखं ने.सं. १०६३ आश्विन शुक्लपक्ष षष्ठी कुन्हु येँ न्हाय्‌कंत्वालय् बाखं व गजल च्वमि मोहनकाजी राजोपाध्यायया जन्म जूगु खः । पौराणिक बाखं कनेगु, पुजा पाठ यायेगु, धार्मिक कर्मकाण्ड यायेगु संस्कारय् ब्वलंगु खःसां वय्‌कःया थःगु मांभाय् नेपालभाषा प्रति नं उतिकं हे नुगः क्वसाः । झीगु समाजय् ब्वलनाच्वंगु विसंगति व विकृतियात ध्याचू नकाः बाखं व गजल च्वयादीम्ह भाजु राजोपाध्यायया न्हापांगु कृति प्रसाद बाखं (सितु, ७/३७) ने.सं. १०९०य् पिदंगु खः । वय्‌कलं नेपालभाषाया साहित्य क्षेत्रय् थःगु पलाः बाखं साहित्यपाखें न्ह्याकादीगु खःसा ने.सं.११०८य् भचा भचा गजल मुना सफू पिथनाः भाषा साहित्य ख्यलय् लोकंह्वाःम्ह गजलकार कथं थःत पिब्वयादिल ।

नेपालभाषाया नांदंम्ह दबू प्याखंमि व च्वमिया मोहनकृष्ण डंगोलया जन्म ने.सं १०५० य् अबु देवकृष्ण डंगोल तथा मां बेखामाया डंगोलया कोखं येँया किलागः त्वालय् जूगु खः । भाषानिभाः प्रेमबहादुरयात गुरु मानेयानादीम्ह वय्‌कः लजगाः कथं छम्ह सिभिल इञ्जिनियर खःसां थःगु भाषा साहित्य, संस्कृतिप्रति अतिकं मनक्वसाःम्ह व्यक्तित्व खः । वय्‌कलं थःगु जीवनया ल्याय्‌म्ह ई दबू प्याखं च्वयेगु, हुइकेगु जक मखु थः हे कलाकर जुयाः दबू प्याखनय् म्हितेगु तकं यानादिल । थथे भाजु मोहनकृष्णं च्वयाः येँयाःबलय् दबुली हुयकादीगु प्याखं खः— मनू म्हसीके, आः जिल का, थम्हं म्हुयागु गाः, न्हूगु समाज, स्वैत छु यः आदि । थुपिं प्याखं मनोरञ्जनया ल्याखं जक मखसे सुधार उन्मुख सन्देश नं ल्वाकज्याःगुलिं तत्कालिन समाजय् आपालं लोकंह्वाःगु खः ।

वय्‌कःया प्याखं जक लोकंह्वाःगु मखसे प्याखंम्वःया रुपय् नं भाजु मोहनकृष्ण डंगोल तसकं नासलं लीम्ह कलाकार जूगुलिं तसकं लोकंह्वाःगु खः । तर थुपिं प्याखंया पाण्डुलिपि सुरक्षित यानातयेमफुगु कारणं थुपिं प्याखं सफूया रुपय् पिकायेमफुत ।

थम्हं हे प्याखं च्वयाः, थः हे म्हिताः क्यनाजूम्ह मोहनकृष्णं लिपा विधि हे विपरित जुसेंलि (ने.सं ११३१) उपन्यास पिकयादिलसा थः न्हूदँ समारोह समितिया नायः जुयाः पोखराय् भिंतुना रायालि वनागुया लुमन्ति कथं पोखरा मुना निसें भिंतुना तक (ने.सं ११३२) सफू पिथनादिल । अथेहे विधिया लः (ने.सं. ११३३) भृकुटी (नाटक, ने.सं ११३४), विकल्प (उपन्यास) सफू पिकयाः थःगु सिर्जनशील प्रतिभायात म्हसीके बियादिल । मोहनकृष्ण डंगोलया जीवनया थीथी आयाम मध्ये समाज सेवा, भाषा सेवाया आयाम नं खः ।

वय्‌कलं ज्यापु महागुथि नेपाःया संरक्षक, ज्यापु महागुथि येँ म.न.स.या नायः, नेवाः देय् दबूया न्वकु आदि जुयाः नं समाज तथा भाषासेवाया ज्या यानादिल । थुलि जक मखु थम्हं अति श्रद्धा यानाम्ह थः गुरु प्रेमबहादुर कसाःया लुमन्ति कथं गुरु व थःगु नां स्वानाः प्रेममोहन सिरपाःया नामं ने.सं ११३१ छगू सिरपाः स्वनादिल । थ्व सिरपाः नेपालभाषाय् उलि विकास जुइमफयाच्वंगु साहित्यिक विधा उपन्यास व नाटकयात थपु यायेगु तातुनाः दकलय् उत्कृष्ट नाटक व उपन्यासया सफूयात पालंपाः यानाः निदँय् छकः बीगु ५००००।— तका दांया सिरपाः खः । थथे गुरुया नां स्वानाः स्थापना जूगु थ्व सिरपाः नेपालभाषा सिरपाः इतिहासय् न्हापांगु सिरपाः खः । थ्व सिरपाःयात निरन्तरता बीगु निंतिं प्रेममोहन सिरपाः गुथिया नं स्थापना यानादीगु दु । थथे थःगु समाज व भाषासाहित्यया ज्या यायां मोहनकृष्ण डंगोलं वि.सं २०७३ असोज ३ गते थःगु नश्वर देह त्वःताझाल ।

ने.सं. १०९२ य् जन्म जूम्ह मोहनदेवी मां लक्ष्मीकुमारी व बा मोहन नारायण महर्जनया म्ह्याय् मय्‌जु खः । थ्वय्‌कलं विश्वन्तरया बाखं (ने.सं.११३६) थेंजाःगु प्राचीन नेपालभाषा व नेपाल लिपिं च्वयातःगु बौद्ध जातक ग्रन्थयात सम्पादन यानाः सकस्यां ब्वनेफइकथं देवनागरी लिपिं पिथनादीगु दु । थ्वय्‌कः छम्ह सामाजिक यथार्थवादी बाखं च्वइम्ह बाखंच्वमि नं खः । थ्वय्‌कलं सत्यहिरा अनुसन्धान सिरपाः (ने.सं.११३६) त्याकादीधुंकूगु दु ।

भाजु मोहनबहादुर कायस्थ बहुमुखी प्रतिभां जाःम्ह च्वमि खः । वय्‌कःया मां दयालक्ष्मी कायस्थ व बाः वीलबहादुर कायस्थ खः । वय्‌कःया जन्म ई.सं.१९४४ अप्रिल १५ य् बन्दीपुर, तनहुँइ जूगु खः । सम्भवतः वय्‌कः बन्दीपुया न्हापांम्ह नेपालभाषाया च्वमि खः । पेशां वय्‌कः इन्जिनियर खः । वय्‌कलं नेपालभाषा, अंग्रेजी व खस् नेपाली भाषां साहित्यया थीथी विधाय् यक्व हे सफू च्वयादीगु दु । वय्‌कलं बाखं, कविता, हाइकु, मुक्तक, गजल, चोका, तांका, नियात्रा, उपन्यास, म्येँ आदि च्वयादीगु दु । वय्‌कलं च्वयादीगु नेपालभाषाया कृतित थुकथं दु– ताय्‌मरु बाखं (बि.सं.२०६९), स्वनिगलं पिने बन्दीपुर (बि.सं.२०७१), नेवाः भाय् ख्वोप निसें बन्दीपुर तक (बि.सं. २०७४) । भाजु मोहनबहादुर कायस्थं थःगु मौलिक च्वसाया नापनापं समाजय् नांजाःपिं विशिष्ट व्यक्तित्वतय्‌गु योगदान सम्बन्धी खोज अनुसन्धान सम्पादनपाखे नं सक्रिय जुयादी । वय्‌कलं खस् नेपाली भाषाया महाकवि लक्ष्मीप्रसाद देवकोटा सम्बन्धी थीथी च्वसूत मुना यशस्वी देवकोटा व शताब्दी पुरुष सत्यमोहन जोशी सम्बन्धी थीथी च्वसुत मुना सत्यमोहन जोशी : व्यक्ति एक अभिव्यक्ति अनेक नांया ग्रन्थ संकलन व सम्पादन यानाः पिकदीगु दु ।

भाजु मोहनबहादुर कायस्थं नेपालभाषां च्वयादीगु च्वसु बन्दीपुर व थ्वया जःखः च्वनाच्वंपिं नेवाःतय्‌सं ल्हाइगु नेवाः भासं च्वयादी । गुकिं यानाः अन जीवन्त जुयाच्वंगु नेपालभाषाया स्वरुप व उच्चारण अले थीथी मौलिक खँग्वःतलिसें झी नं परिचित जुइगु मौका चूलाःगु दु । वय्‌कः गण्डकी सामाजिक गुथि, बन्दीपुर सामाजिक गुथि, हेरिटेज सोसाइटी, अन्तराष्ट्रिय नेपाली साहित्य संघ, रोटरी आदि संघ संस्थालिसे आवद्ध जुयादी ।

मोहनमान साँगामी हेटौंडाया छम्ह भाषासेवी खः । मोहनमान साँगामीया जन्म वि.सं. २०१५ असार महिनाय् ख्वपय् जूगु खः । लिपा वय्‌कः हिटौंडाय् च्वनेगु यानादिल । वय्‌कः ‘हेटौंडा वाःपौ’ या कार्यकारी सम्पादक लिसें नेवाः सांस्कृतिक पुचःया वरिष्ठ सल्लाहकार नं खः । हेटौंडाय् ‘सायाः’ पिकायेगु, ‘यःमरि पुन्हि’ न्यायेकेगु, ‘ययाःपुन्हि’ हनेगु आदि सांस्कृतिक ज्याय् वय्‌कः सक्रिय जुया च्वनादीगु दु ।

मोहनलाल बाराही शास्त्रीय संगीत ज्ञातालिसें छम्ह सांगीतिक बाजंया आविष्कारक नं खः । थ्वय्‌कःया जन्म वि.सं. १९८८ दँय्‌ यलय्‌ जूगु खः । ल्याय्‌म्हबलय्‌ संकिपा स्वस्वं म्येसंगीत व शास्त्रीय संगीत ययावःगुलिं थीथी थासय्‌ वनाः भजन न्यनेगु यानादिल । वि.सं. २०१६ सालपाखे येँ नारायणहिति लिक्क एकादसिपतिकं भजन याइथाय्‌ तक्क नं न्यं वनीम्ह जुल । थः नं हालेगु व सयेके मंदुगुलिं संगीत प्रविण नरराज ढकालयात गुरु नालाः शास्त्रीय संगीत सयेकादिल, अथक कुतलं संगीतय्‌ निपुण नं जुल ।
वय्‌कलं रेडियो नेपालय्‌ शास्त्रीय संगीतया प्रस्तुती नं यानादिलसा वि.सं. २०३७ सालं रेडियो नेपालं याःगु शास्त्रीय संगीतय्‌ थ्वय्‌कः न्हाप लात । थ्वय्‌कलं म्ये राग व म्ये जक हालीम्ह मखुसे थःम्हं हे म्ये च्वयाः संगीत नं तइम्ह खः । थ्वय्‌कलं ने.सं. ११११ स झीगु भाषा शास्त्रीय संगीत व सुलाच्वंगु म्येया नामं सफू नं पिथना दीगु दु । थुगु सफुती थःम्हं हे च्वयादीगु पीपु म्येया नोटेशन नापं न्ह्यब्वया दीगु खः ।
थ्वय्‌कलं लिपा लजगाःकथं हार्मोनियमलिसें मेमेगु बाजं ल्ह्वनेज्या न्ह्याकादीगु खः । यलया पट्कोय्‌ थ्वयय्‌कःया पसः । पसलय्‌ वय्‌कः थः जक मखु केहें मोहनलक्ष्मीयात ज्या स्यना तयादीगु खः । थ्वय्‌कः हार्मोनियम दयेकेगु व धुनिङ्ग यायेगुली नामुदम्ह खः । पिने देसय्‌ हामोनियमया सूर मिले यायेत यन्त्रपाखें याइगु खः ।
पाकिस्तानया वरिष्ठ गजलहालामि गुलाम अलि नेपाः वःबलय्‌ ज्वनावःगु हार्मोनियमया सूर स्यन । दयेकेत न्यनेकने याःबलय्‌ थ्वय्‌कःया नां न्ह्यथन । अले गुलाम अलि हार्मोनियम दयेकेत वय्‌कःया पसलय्‌ वल । थम्हं न्यनाभरं यन्त्र म्वायेक हार्मोनियम दयेका ब्यूगुलिं प्रभावित जुयाः थ्वय्‌कःयात गुलाम अलिं प्रशंसा पत्र बिया थकुगु खः ।
थ्वय्‌कः शास्त्रीय संगीतय्‌ व बाजं ल्ह्वने ज्याय्‌ नांजाःम्ह जक मखु न्हूगु बाजंया आविष्कारक नं खः । थ्वय्‌कलं संसारय्‌ गनं मदुगु प्यताजि बाजंया आविष्कार यानादीगु दु । उपिं मध्यय्‌ खः– चतुरंग । थ्व बाजं प्यताजि बाजंया समिश्रण खः । थुकी छम्ह हे मनुखं तानपुरा, तुंगना व म्हुतुं हार्मोनियम पुयाः प्यताजि थायेज्यू । वय्‌कलं थ्व बाजं दयेकेगु ज्या वि.सं. २०२५ निसें न्ह्याकाः प्यदँ बिकाः पूवंकूगु खः । थ्व बाजनय्‌ विदेशं हःगु रीड छगू बाहेक मेगु फुक्क थनयागु हे सामानत छ्यलादीगु खः । थ्व बाजं थानाः न्यंकीबलय्‌ मनूत अजू चाइगु । थ्व बाजंया नां छुनादीम्ह उस्ताद गोबिन्दलाल खः । अथेहे वय्‌कलं आविष्कार याःगु मेगु बाजंत मोहनचन्द्र चंगल व मनरुवा खः । मोहनचन्द्र चंगल चन्द्रमा बांलूगु डम्फु व भ्वाय्‌लिनया समिश्रण खःसा मनरुवा कियाः थायेगु सारंगी विशेष स्वरुप खः, मेगु म्हुतुं पुयाः थायेगु हार्मोनियमया खः ।

वय्‌कलं आविष्कार यानादीगु चतुरंग बाजंया नामं यलय्‌ छगू बुलेटिन नं पिदंगु दु । नेपालभाषा मंका खलः यलया संगीत व नाटक उपसमितिपाखें ने.सं. १११४ स थुगु बुलेटिन पिथंगु खः ।

मोहनसुन्दर श्रेष्ठ मिखां मखंम्ह छम्ह नेपाःया वरिष्ठ सरोदवादक खः । थ्वय्‌कःया जन्म येँया किलागलय्‌ ने.सं. १०६१ सिल्लागाः एकादसि, सनिबारखुन्हु जूगु खः । थ्वय्‌कः अबु गोपालसुन्दर श्रेष्ठ व मां मोहनमाया श्रेष्ठया चीधिकःम्ह काय्‌ खः । मचाबलय्‌ निसें हे थ्वय्‌कःया मिखां मखं । थ्वय्‌कःया इहिपाः कृष्णकुमारी श्रेष्ठलिसें जूगु खः । थ्वय्‌कःपिनि छम्ह काय्‌ व निम्ह म्ह्याय्‌ दु । मस्तमध्यय्‌ चीधिकःम्ह म्ह्याय्‌ सितार थायेगु यानादी । न्हय्‌दँति दुबलय्‌ हे म्ये हालाः थ्वय्‌कः संगीत ख्यलय्‌ दुहां झाःम्ह खः । थ्वय्‌कलं उस्ताद भगतकृष्ण मानन्धरलिसे म्ये हालेगु सयेकादीगु खः । तर थ्वय्‌कलं लिपा म्ये हालेगु स्वयां नं संगीत थायेगु हे ययेकाः वपाखे वनेगु बिचाः यानादिल । वि.सं. २०१३ सालपाखे गुरु नारायण प्रसाद श्रेष्ठलिसे सरोद थायेगु सयेका दिल । उगु हे इलय्‌ थ्वय्‌कः सिबें न्ह्यः व हे गुरुपाखें सितार सयेका च्वनादीम्ह नरेन्द्र बाताजु खः । गुम्ह छम्ह नेपाःया लोकंह्वाःम्ह सितारवादक खः । थ्वय्‌कलं लिपा म्ये गुथिया दुजः जुयाः नेवाः संगीत ख्यलय्‌ नं आपालं योगदान यानादिल । उगु गुथिं पिथनीगु नेवाः म्येचाःया म्येय्‌ थ्वय्‌कःया सरोदवादन उत्कृष्ट जू । थ्व बाहेक वय्‌कःया देन ज्ञानमाला म्ये संगीतय्‌ नं उतिकं हे दु । अथे हे न्हापा पिदनीगु थीथी म्ये व म्येचालय्‌ नं थ्वय्‌कःया सरोदवादनया स्वापू दया हे च्वं ।
सरोदवादनलिसें शास्त्रीय संगीतय्‌ नं दख्खल दुम्ह थ्वय्‌कलं विदेशीतय्‌त तक्कं संगीत स्यनादीगु दु । थ्वय्‌कलंं वि.सं. २०२६ सालय्‌ राष्ट्रिय नाचघरय्‌ सरोदवादकया लजगाः न्ह्याकादीगु खः । वि.सं. २०३७ सालय्‌ अनं लिकासेलिं हानं नेपाल अपांग संघया कुतलं करारय्‌ रेडियो नेपालय्‌ लजगाः न्ह्याकादीगु खः । अथेहे येँया होटल अन्नपूर्णय्‌ नं ज्या यानादिल । स्थायी लजगाः मदया च्वंबलय्‌ वि.सं. २०४२ पाखे जुजु वीरेन्द्रया कृपां थ्वय्‌कलं दरबारय्‌ हे स्थायीकथं सरोदवादनय्‌ लजगाः न्ह्याकादिल । अले अन हे वि.सं. २०६८ सालं अवकाश कयादीगु खः । अवकाश लिपा नं थ्वय्‌कलं होटलय्‌ ज्या न्ह्याका हे च्वनादिल ।
थ्वय्‌कःया सिर्जनात लिपांगु म्येचालय्‌ आपालं दु । थ्वय्‌कलं थःम्हं थानादीगु सरोदवादनया धून मुनाः फेवरेष्ट म्येचाः व फेवरेष्ट २ नामं सि.डी.चाः पिथनादीगु दु । वय्‌कलं गोर्खा दक्षिण बाहु तेश्रो व चौंथो, त्रिशक्ति पट्ट चौंथो लिसें थीथी संघसंस्थापाखें आपालं मानपदवी व सिरपाः कयादीगु दु । थ्वय्‌कः ने.सं. ११४१ सिल्लागाः दसमि, सोमबारखुन्हु मदुगु खः । थ्वय्‌कःया परिवारं थ्वय्‌कःया नामं वि.सं २०७८ सालं किराँतेश्वर संगीत आश्रम मोहनसुन्दर श्रेष्ठ पुरस्कार नं नीस्वना तःगु दु ।