बा सत्यबहादुर जोशी व मां कल्याणदेवी जोशीया कोखं ने.सं. १०४८ पोहलाथ्व १२ कुन्हु मलंगवा सर्लाहीइ साहित्यकार भाजु रामहरि जोशीया जन्म जूगु खः । गाक्कं अध्ययन यानातःम्ह भाजु जोशीया साहित्य क्षेत्रय् नेपालभाषा, नेपाली व अंग्रेजी भाय् पाखे नं उतिकं हे च्वसा न्ह्याः । नेपालभाषा साहित्यया क्षेत्रय् धाःसा थःगु पलाः दकलय् न्हापां बाखं साहित्य च्वयाः न्ह्याकादीगु खः । वय्कःया दकलय् न्हापांगु बाखं प्रेम समाधि ने.सं. १०७२, नेपाल १/२ लय् पिदंगु खः । लिपा भाजु जोशीं थःगु च्वसायात समालोचनापाखे न्ह्याकादिल । व इलय् थ्वय्कः नं छम्ह लोकंह्वाःम्ह समालोचक खः । वय्कःया समालोचना आपाः यानाः ब्याख्या प्रधान जू । थ्वय्कःया नेपालभाषा समालोचना साहित्य पिदंगु न्हापांगु समालोचनात्मक च्वसु श्री केदारमान व्यथितयागु काव्य साधना खः ।
चित्रकार रामानन्द जोशीया जन्म वि.सं. १९८५ सालय् यलया क्वालखुइ अबु व्रम्हानन्द जोशी व मां रत्नमाया जोशीया कोखं जूगु खः । फाइन आर्ट ब्वनादीम्ह वय्कलं प्राध्यापन व कलाकारिता यानादीगु दु । चिकं रङ्गया चित्र च्वयादीम्ह वय्कलं दकलय् न्हापां “कलाको आवश्यकता किन ?’ धयागु च्वसु ने.सं. १०८५ सिल्लागाः तृतिया, बसुबार (वि.सं. २०२१ फागुन ७ गते) गोरखापत्रय् पिथना दिल । वय्कलं जुजु व लानिया पोट्रेट (ख्वाः जक) लिसें समसामयिक विषयय् द्वःछिपालं मल्याक चित्र च्वयादीगु दु । वय्कलं नेपाः लिसें भारत, इरान, जापान व बेलायतय् झिक्वः याकः चित्रकला ब्वज्या यानादीगु दु । अथे हे मंकाः कला ब्वज्या न्हय्क्वः यानादीगु दु । वय्कलं सन् १९६२ स भारतया बम्बइलय् सर्वोत्कृष्ट पुरस्कार त्याकादीगु दु । वय्कःयात वि.सं. २०३१ सालय् शुभराज्याभिषेक युवा महोत्सव पदक द्यछाःगु खः । वय्कः वि.सं. २०४५ सालय् स्वर्गारोहण जूगु खः ।
ख्वपया देगमना, तेखाचो त्वालय् मां रत्नमाया भुजू व बौ बुद्धिलाल भुजूया काय् जुयाः जन्म जुयादीम्ह रामेश्वर भुजू हास्य कलाकार नापं चिनाखँ, नाटक व साहित्यया थीथी विधाया च्वमि खः । थ्वय्कःया च्वसा नेपालभाषा व खस भाषा निताखय् नं न्ह्याःगु दु । थ्वय्कया प्यंगु कृति पिदंगु दु । उकी नेपालभाषाया न्हूगु देय्, न्हूगु हिउपाया म्हगस व न्हूगु हिउपाः (चिनाखँ मुना) व अंगुलिमाल (नाटक ११३८) खः । ने.सं.१०८० य् पलिस्था जूगु ख्वपया बाल साहित्य मण्डलपाखें नेपालभाषा साहित्य व कलाकारिता ख्यलय् पलाः न्ह्याकादीम्ह रामेश्वर भुजू थौंकन्हय् नेपाल साहित्य मन्दिरपाखें नेपालभाषा व नेपालभाषा साहित्य थपूया लँय् पलाः न्ह्याका च्वनादीगु दु ।
बि.सं.२०२९ चैत्रय् बाः जगन्नाथ श्रेष्ठ व मां लक्ष्मीप्रभा श्रेष्ठया क्वखं बिजेश्वरी ससुख्वाः येँय् जन्म जुयादीम्ह भाजु रामेश्वर मिश्रण नेपाल भाषा कविता ख्यलय् उदयीमान च्वमि खयानं छम्ह सक्तम्ह कवि खः । वय्कलं कविता, गजल, मुक्तक व हाइकु विधाय् सक्रीय रुपं च्वसा न्ह्याका वयाच्वनादीगु दु । लुमन्ति दबूया नायः जुयादीधुंकूम्ह भाजु श्रेष्ठ नःलि लक्ष्मीदेवी साहित्य सिरपालं सम्मानित जुयादीधुंकूगु दु । वय्कल मूति नांया सफूया सम्पादन यानादीगु दु । नेपालभाषाया थीथी पत्रपत्रिकाय् वयकःयागु च्वसु निरन्तररुपं पिहां वयाच्वंगु दु ।