म्येच्वमि नापं पत्रकार रेखा शाक्य (राजमति) अबु राजमान शाक्य व मां मञ्जु शाक्यया कोखं पाहांचःह्रेखुन्हु येँया इतुंबहालय् जन्म जूगु खः ।
वय्कलं च्वयादीगु म्येमुनाया न्हापांगु कृति ने.सं. ११२८ कछलागाः चःह्रेखुन्हु पिदंगु नेपालभाषाया सोलो एल्बमकथं ‘ध्वः छध्वः रेखाया’ सिडी पिदंगु खः । थुकी दुथ्याःगु व मेमेगु म्ये यानाः वय्कलं च्वयादीगु मुक्कं १६ पु म्ये पिदने धुंकूगु दु । अथेहे ‘गबलें गबलें छं जितः’, ‘अय्लाः अय्लाः’, ‘इतुम्बहाःया व म्ह्याय्मचा’, ‘ल्यू ल्यू न्ह्यः न्ह्यः वयाः’, ‘जिं ला छन्त ययेके धुन’, ‘ल्वःमंकाः चिलं गां झीगु’ म्येया म्यूजिक भिडियो पिदने धुंकूगु दु ।
वय्कःया डेब्यु एल्बमया ‘ध्वः छध्वः रेखाया’ म्येचाःया टाइटल म्येयात कालिका एफएमपाखें नेपालभाषाया दकलय् बांलाःगु म्येकथं भाषाभाषी गीत पुरस्कार २०६७ पाखें सम्मानित याःगु खः । अथेहे वय्कःयात ‘छुं छुं म्हगस अथें पू मवनेयः’ म्येया निंतिं नेशनल पावर न्यूज म्यूजिक अवार्ड २०१९ (वि.सं २०७६) दकलय् बांलाःगुु म्येया सिरपाः लःल्हाःगु खः । नेवाः पत्रकार राष्ट्रिय दबूपाखें नं च्याक्वःगुु दँमुंज्याया लसताय् वय्कःयात बाबुराजा ज्यापु फोटो पत्रकारिता सिरपाः लःल्हाःगु दु ।
रेडियो नेपाल पलिस्था जुइधुंकाः अन म्ये हाःम्ह न्हापांम्ह नेवाः मिसा खः– पद्मदेबी मानन्धर । थ्व खँ नेपालभाषाया न्हापांगु सामान्य ज्ञान सफुती नं न्ह्यथना तःगु दु । अबलय् वय्कलं खस भाय्या म्ये हालादीगु खः । लिपा वय्कः नेपाः सरकारपाखें छात्रवृत्ति कयाः भारतय् शास्त्रीय संगीत सयेकः वंबलय् अनया हे गुरु रंगराव कादम्बरीलिसें ब्याहाः यानादीगु खः । लिपा पद्म कादम्बरी नामं वय्कलं शास्त्रीय संगीत ख्यलय् आपालं योगदान यानादीगु दु ।
बौ केदार लाल श्रेष्ठ व मां जगना देवी श्रेष्ठया कोखं ने.सं. १०७३ कौलागाः आमै (लक्ष्मीपुजा), सुक्रबारखुन्हु येँया वंघः, नौमुगः गल्लिइ बूम्ह भाजु रेबन्त लाल श्रेष्ठ नेपालभाषाया लोकंह्वाःम्ह कलाकःमि खः । त्रिभुवन विश्वविद्यालयपाखें आइएतक अध्ययन यानादीम्ह भाजु श्रेष्ठ म्ये, प्याखं, नाटक व म्यूजिक भिडियोय् प्याखंम्वः जुयादी । समय्बजि, चाकुमाकु, कुचुकुचु आदि टेलिसिरियलया वय्कः छम्ह लोकंह्वाःम्ह प्याखंम्वः खः ।
कलाकःमि भाजु रेबन्त लाल श्रेष्ठ ने.सं. १०९५ निसें मुनासः संस्थापाखें यक्व ख्यालः म्हितादिलसा लिपा पलिस्था संस्थापाखें नं ख्यालः कासाय् ब्वति कयादिल । वय्कलं ‘द्वंकाः नं तये मज्यूगु पलाः’ नांया बाखं मुना सफू पिथना दीगु दु । भाजु श्रेष्ठयात न्याक्वःगु मुनासः ख्यालः कासाय् अभिनय हःपाः सिरपाः व न्याक्वःगु पलिस्था बांलाःम्ह ख्यालःम्वः सिरपालं छाय्पिया तःगु दु ।