मञ्जुवर्ण महाविहार बेखाः त्वाःया छगू पुलांगु महाविहार खः । ख्वप, थालाछेँ नागपुखूया पूर्ख, बेखाः पुखूया दक्षिण दिशाय् अवस्थित थुगु महाविहारयात वाउँ बहाः धकाः नं म्हसीकेफु ।
ने.सं. ९८६ या भाजु मनया सफुलिइ श्री मञ्जुवज्र विहार, ने.सं. १००५ या वज्राचार्य महाविहारया सफुलिइ श्री सुगत, श्री मञ्जुवज्र विहार धकाः नां छुनातःगु विहार हे मञ्जुवर्ण महाविहार खः धकाः धायेगु याना वयाच्वंगु दु ।
मञ्जुवर्ण महाविहारया निर्माणया तिथिमिति क्वःजिक धायेमफुसा मध्यकालया अन्तिम इलय् थुगु विहार स्थापना जूगु अनुमान यानातःगु दु । थुगु विहार दुनेया द्यःपिनि पुजा पाठ प्रसन्नशील विहारया शाक्यतपाखें पूवंकाच्वंगुलिं प्रसन्नशील महाविहार व मञ्जुवर्ण महाविहारया स्वापू दु धयागु अनुमान यायेफु ।
न्यनेदुकथं प्रसन्नशील विहारया छथ्वः शाक्यत मध्यकालपाखे आचार्यभिशेक यानाः बज्राचार्य जूगु व इमिगु निंतिं हे चूडाकर्म यायेत थुगु विहार दयेकूगु खः । उकिं आचार्यभिशेक यानाः वज्राचार्य जूपिनि चूडाकर्म याइगु विहार खः । प्रसन्नशील महाविहार व मञ्जुवर्ण महाविहार संघया दिगुद्यः छम्ह हे खः ।
क्षेत्रफलया ल्याखय् मञ्जुवर्ण महाविहार तःधं मजूसां कलाया ल्याखय् बांलाःगु विहार खः । विहारय् पश्चिमाभिमुख महावैरोचनया क्वाःपाः द्यः दु । क्वाःपाःया जवखवं प्रस्तर सिंह दु । दथुइ वज्रधातु चैत्य दु । अष्टमंगल सहितया बहाःया मूलुखाय् महावैरोचन व निखेर मञ्जुश्री षडक्षरीया नापं पञ्चबुद्ध व बज्रसत्वपिनि कलात्मक मूर्ति सहितया तोरण दु ।
अथे हे मूलुखाया जवंखवं गणेद्यः, मांकाःद्यः व नासःद्यःया रुपय् पूजा यायेत दयेकातःगु ग्वाखंप्वाः व दक्षिणपाखें विश्वकर्मा (विकमा)द्यः स्थापना यानातःगु दु ।