काजि हंसमान सिंहया जन्म अबु काजि तुलसीमान सिंह व मां गणेकुमारी सिंहया कोखं ने.सं १०४० य् येँया भोटेबहालय् जूगु खः । राजदरबार सेवाय् कार्यरत जुयादीम्ह हंसमान सिंहयात अन काजिया दर्जा बियातःगु जूगुलिं वय्कःयात काजि हंसमान सिंह धायेगु जूगु खः । उगु इलय् दर्शन विषयय् एम.ए यानादीम्ह हंसमान सिंह नेपालभाषाया छम्ह कवि नं खः । नेपालभाषाया नापं नेपाली भाषं नं च्वसा न्ह्याकादीम्ह वय्कलं नेपालभाषाय् कविताया नापं दर्शन सम्बन्धी सफू, च्वखँ आदि च्वयाझाःगु दु ।
वय्कःया पिदंगु सफू खः – थः म्हसीगु मू लँपु (काव्य, ने.सं ११११), लुमन्ति छपासः (ने.सं ११११) आदि । नेपालभाषाय् थःत छम्ह दार्शनिक कवि कथं म्हसीकादीम्ह काजि हंसमान अद्वैत वेदान्त शास्त्र थेंजाःगु गहनगु विषययात नं थःगु मां भाषं सरल ढंगं ध्वाथ्वीक विवेचना यानाः ब्वया झाःम्ह स्रस्ता खः ।
काजि हंसमानं थःगु जीवनकालय् तत्कालिन सरकार पाखें जक मखु थीथी देश गथे बेलायत, फ्रान्स, स्पेन आदिपाखें नं तःगु पदक व सम्मान कायेखंम्ह छम्ह नेवाः खः । वय्कलं प्राप्त यानादीगु थज्याःगु छुं पदक व सम्मान खः — त्रिभुवन प्रजातन्त्र श्रीपद (छगूगु), गोरखा दक्षिणबाहु (छगूगु ), विशेष सेवा पदक आदि ।
स्वनिगः पिनें पिदंपिं नेपालभाषाया च्वमि नापं भाषिक अभियन्तापिं मध्ये भाजु हंशराज शाक्य नं छम्ह खः । वय्कःया जन्म बि.सं. १९३७ कार्तिक कृष्ण पक्षय् भोजपुर जिल्लाया खिकामाछा बजारय् जूगु खः । वय्कः ज्योतिष खः । वय्कलं फुकंसित हे न्हिइका च्वनादीगुलिं सकसिनं वय्कःयात हास्या धकाः धाइ । वय्कलं घडियागु हिसावं उबले कविता च्वयादिल । अथेहे खिकामाछा बजारया वर्णन यानाः कविता च्वयादिल । वय्कः वि.सं.१९९३ श्रावण अष्टमि कुन्हु दिवंगत जुयादिल ।