हिरण्य भोजपुरे नेपाःया संगीत ख्यलय् नांजाःम्ह म्येच्वमि, लय्चिनाम व म्येहालामिलिसें साहित्यकार नं खः । थ्वय्कःया जन्म ने.सं. १०६३ कछलागाः चौथि, सुक्रबारखुन्हु भोजपुरया देउराली जूगु खः । थ्वय्कःया अबु चण्डीप्रसाद श्रेष्ठ व मां लक्ष्मीदेबी श्रेष्ठ खः । थ्वय्कःया इहिपाः उर्मिला श्रेष्ठलिसे ने.सं. १०९० चिल्लाथ्वः दुतिया, सोमबारखुन्हु जूगु खःसा थ्वय्कःपिनि छम्ह म्ह्याय् दु ।
मचाइलंनिसें म्ये हाले न्ह्याःम्ह थ्वय्कः परिवारलिसें येँय् च्वंझाल अले येँय् हे ब्वनादिल । एस.एल.सी. पूवनेधुंकाः क्याम्पसय् ब्वब्वं हे थ्वय्कः हेटौंडाय् वनाः विद्युत प्राधिकरणय् लजगाः न्ह्याकादिल । वि.सं. २०१८ सालय् हेटौंडाय् नवकला कुञ्ज संगीत पुचः नीस्वनाः संगीत सिर्जना जक मखु आपालं संगीतकःमिपिं नं दयेकादिल । थ्व हे संगीत पुचलं हेटौंडाय् नेवाः संगीत ब्वलंकेत नं आपालं तिबः जूगु खः । थुबलय् हे लजगाःया झ्वलय अन थ्यंम्ह झी महाकवि गिरिजा प्रसाद जोशी नं नवकला कुञ्जलिसे स्वापू ब्यात । जोशीजु साहित्यलिसें म्ये संगीतय् नं उतिकं हे नुगः क्वसाःम्ह जुयाः थ्वय्कःपाखें अन नंं आपालं नेवाःम्येत सिर्जना जुल । उबलय्या छुं छुं म्येत लिपा म्येचालय् नं पिदंगु दु । हिरण्यजुं हे हालादीगु छपु म्ये ‘भाःतनिंतिं भुटनदेबी ग्वंगः फ्यात का, मज्जां च्वनाः नयेयःसा ड्राइभर भातः का’ गुलि लिपा थःगु खस म्येमुना म्येचाः ‘एक अञ्जुली’ स दुथ्याका दीगु दु । थ्वय्कःया तिरिमय्जु ला झन् नेवाः म्ये ख्यलं हे वःम्ह खः । लिपा वि.सं. २०२२ सालय् लेकाली समूह स्वनाः संगीत सिर्जनाय् झं क्वात्तुक्क न्ह्याः वन । ‘मलाइ प्यारो लाग्छ मलाइ राम्रो लाग्छ’ लिसें आपालं लोकंह्वाःगु म्येत सिर्जना यानादिल ।
हिरारत्न तुलाधरया उपनां भाइदाइ खः । वय्कः काष्ठ कलाया छम्ह ज्वः मदुम्ह कलाकार खः । वय्कःया जन्म ने.सं. १०४० यंलागाः पारु, बुधबारखुन्हु येँया तूक्यब, भ्वताहितिइ जूगु खः । वय्कःया अबुजु जोगरत्न तुलाधर खःसा वय्कलं थःगु हे अनुभवकथं ने.सं. १०७० स काष्ठकला ख्यलय् ज्या न्ह्याकादीगु खः । वय्कलं सिँयागु थी थी मूर्ति तथा सिँया तस्वीर फ्रेमय् थी थी द्यः व विशिष्ट मनू तय्गु कलात्मक चित्र दयेकेगु यानादी । कला ब्वज्या— १) नेपाल कला प्रदर्शनी (२०१३), २) शिल्पकला प्रदर्शनी (२०२८), ३) एकल कला प्रदर्शनी नाफा हल (२०२८) ४) एकल कला प्रदर्शनी भरतपुर (२०२८) सिरपाः— १) राष्ट्रिय कला प्रदर्शनी सान्त्वना पुरस्कार (२०३०) चौधौं राष्ट्रिय कला प्रदर्शनीइ प्रशंसा पुरस्कार ।
न्ह्यथने बहःगु कृति— १) तात्कालिन नारायणी अञ्चलाधीशया कार्यालयस श्री गणेशया मूर्ति व सिँया तस्वीर निर्माण २) तात्कालिन राजसभा भवनया मू लुखाय् ८ फिटया देगःया प्रतिमूर्ति लीया पाताय् कतांज्या यानाः निर्माण ३) भारतया आन्द्र प्रदेशया पुत्तपर्तिइ श्री साइबाबाया निवासय् ६ फिटया कलात्मक पशुपतिया देगः दयेकूगु ४) तात्कालिन श्री ५ महाराजाधिराज तथा वडामहारानीया मैत्रीपूर्ण निमन्त्रणाय् थी थी इलय् झाइपिं मित्रराष्ट्रया राष्ट्राध्यक्षयात काठमाण्डौ नगर पंचायतपाखें याइगु नागरिक अभिनन्दन समारोह ज्याझ्वलय् उपहारकथं द्यछाइगु काष्ठमण्डपया कलात्मक प्रतिमूर्ति दयेकूगु।