पूर्णबहादुर एम.ए. (पुर्णबहादुर श्रेष्ठ) या जन्म ने.सं १०३६ य् येँया केलत्वालय् जूगु खःसा लिपा थ्वय्कः यलया पुल्चोकय् च्वनेगु यानादिल । थ्वय्कः एम.ए डिग्री हासिल याःम्ह दलय् न्हापांम्ह नेवाः खः । उकिं थ्वय्कःया नांया लिउने एम.ए. उपनां नं घायेगु जूगु खः । वि.सं. १९९७ (ने.सं १०६१) सालया राजनैतिक पर्वय् जेलय् लाःम्ह छम्ह नेवाः थ्वय्कः नं खः ।
नेपालभाषा, नेपाली तथा अंग्रेजी भाषं च्वसा न्ह्याकादीम्ह थ्वय्कःया न्हापां पिदंगु च्वसु म्युनिसीपालिटीया आम्दानीया छुं विशेषता (पासा, १/३, ने.सं १०७३) खःसा मेमेगु नं विभिन्न विषयया तःपु मछि हे निबन्ध तत्कालिन थीथी पत्रपत्रिकाय् पिदंगु दु । ने.सं १०७१ य् राजसभाया सम्मानित सदस्य, योजना आयोगया सदस्य आदि जुयादीधुंकूम्ह थ्वय्कः नेपालभाषा परिषद्या छम्ह संस्थापक सदस्य नं खः ।