बौ पुण्यभक्त माथेमा व मां प्रेमकुमारी माथेमाया क्वखं ने.सं. १०८४ ञलाथ्व ४ कुन्हु किलागः त्वालय् चिनाखँमि भाजु पुष्करभक्त माथेमाया जन्म जूगु खः । नेपालभाषा साहित्य ख्यलय् वय्कःया मू विधा छधाः प्याखं व चिनाखँ खयां नं माथेमा भाजुया च्वसा आपाः यानाः शायरी व गजल पाखे न्ह्याःगु दु । न्हापां छपुचः शायरी (ने.सं. ११०५, झी ल्याः २०३ ) नांगु शायरी ज्वनाः नेपालभाषा साहित्य ख्यलय् पिलूझाःम्ह पुष्करभक्त माथेमा थःगु विद्यार्थी कालय् थीथी साहित्य सम्मेलनय् तःकः सिरपाः त्याकादीधुंकूम्ह स्रष्टा खः । थ्वय्कः छम्ह च्वमि स्वया नं मूलतः छम्ह पत्रकार खः । सँझ्याः दँपौ, पौभाः स्वलापौया नापं नेपालभाषाय् थीथी पत्रिकाया सम्पादन यानादीम्ह वय्कः गोरखापत्र न्हिपौया निकःतक सम्पादक व अंग्रेजी भाय्या न्हिपौ राइजिङ्ग नेपालया नं (वि.सं २००८) सम्पादक जुयादीधुंकूम्ह खः । वय्कः हलिं नेवाः दबूया प्यक्वःगु सम्मेलन (ने.सं ११४२) या संयोजक नं खः । अथेहे वय्कः थौंकन्हय् हलिं नेवाः दबू केन्द्रीय कार्यसमितिया उपाध्यक्ष नं खः । भाजु माथेमां प्रधान पत्रकारिता सिरपाः, वातावरण पत्रकारिता अवार्ड अथेहे मेमेगु सिरपाः नं त्याकादीधुंकूगु दु ।