ने.सं ११०० कुन्हु बाः ज्ञानु महर्जन व मां सुलोचना महर्जनया कोखं भाजु राकेश महर्जन येँया ग्वाछेँमुगः गल्ली, बसन्तपुरय् जन्म जूगु खः । नेपालभाषा साहित्यया ख्यलय् वय्कलं बाखं, समालोचनाया नापं सर्ट फिल्मया स्क्रिप्ट च्वयेगुली ल्हाः न्ह्याकादीगु दु । न्हूबाखं च्वयेगुलिइ तसकं हे सक्रियम्ह वय्कःया बाखंया ख्यलय् धुकधुक, धुकधुक (ने.सं. ११४१) नांगु बाखं संग्रह पिदंगु दु । थ्व बाखं संग्रहलय् बाखं थथे हे जुइमाः धयागु स्थापित मान्यतायात त्वाःथलाः बाखं मखुथें जाःगु बाखं नं दुथ्यानाच्वंगु दु । बाखनय् मनोविज्ञानयात तसकं हे बांलाक छ्यलातःगु दु । अथेहे थ्वय्कलं समालोचनाया ख्यलय् भृकुटी उपन्यासय् ऐतिहासिकता (समालोचना, ने.सं ११३८) नांगु सफू पिकयाः अनुसन्धानया नापं समालोचना ख्यलय् नं थःगु सहभागिता क्यनादीगु दु । साहित्यिक सफू बाहेक भाजु राकेश महर्जनं फिल्म सिद्धान्तया खँ (फिल्म सिद्धान्त ११४०) नांगु सफू पिकयाः नेपालभाषाय् नं फिल्म सम्बन्धी प्राविधिक विषयया सफूया अभावपूर्ति यानादीगु दु । भाजु राकेश महर्जन विराट सुरत्न सिरपाः ने.सं ११३९ व मोतिलानि सिरपाः ने.सं ११३९ आदिं सम्मानित जुयादीगु दु ।