नेपालभाषा साहित्यय् रामभक्त भोमिया नामं च्वसु च्वयादीम्ह भाजुया खास नां रामभक्त प्रधान खः । वय्कःया कूल छेँ भोलाखा, भ्वँत खः । वय्कः ने.सं.१०६६ माघ २ गते भ्वँतय् बूगु खः । वय्कःया मांया नां नानीमैंया प्रधान व बाःया नां शिवलाल प्रधान खः ।
भाजु रामभक्त भोमिं विशेष यानाः कविता व समालोचनाय् ल्हाः तयादी । वय्कःया न्हापां प्रकाशित निशा नांगु कविता ने.सं.१०८३ स तत्कालिन दुसः नांगु पत्रिकाय् पिदंगु दु। वय्कःया प्रकाशित सफू– समय् बजि (पौ, ने.सं.१०८६), झीगु नःलि साहित्यय् छुं बिचाः (अनुवाद, ने.सं.१०८६), सिद्धिदास लुमंका (ने.सं.१०९७), भ्वमि निवन्ध संग्रह (ने.सं.१०९८) खः । अथहे वय्कलं सक्व देया देवी प्याखंया नापं मेमेगु नं यक्व सफू पिकयादीगु दु । कविता च्वयेगु, समालोचना यायेगु लिसें अनुवाद यायेगु ज्या नं वय्कलं यानादीगु दु ।