जेस्सी पेनी इन्टरटेंटमेंट व वाइल्ड बुल्स प्रोडक्शनपाखें ने.सं. ११३९ दँय् निर्माण जूगु थुगु संकिपाया निर्माता राजभक्त श्रेष्ठ व मन्दिरा मानन्धर खः । पुलां बाखंयात कयाः दयेका तःगु संकिपाया निर्देशक रवि साय्मि खःसा संगीतकार बालकृष्ण वंशी खः । संकिपाया छायाँकार भवानी शिलाकार अले थुकी कलाकारकथं सुशिल राजोपाध्याय, साकार पन्त, पुष्कर माथेमा, उदेन न्हूसाय्मि, अमिता जोशी, अन्नपूर्णेश्वरी श्रेष्ठ, ओमशंकर श्रेष्ठ, संघरत्न शाक्य, सुरज व्यन्जकारपिं दुथ्याः । संकिपाय् मल्लकालिन जुजु प्रताप मल्लया पालय् येँदेसय् दुम्ह नांजाःम्ह तान्त्रिक जामनः गुभाजुया पुरुषार्थं जाःगु बाखं ब्वयातःगु दु ।
ने.सं.११३० दँय् निर्माण जूगु संकिपाया बाखं व निर्देशक सुरेन्द्र तुलाधर अले थुकी निर्मल रत्न शाक्यया संगीत दुथ्याः । थुगु संकिपाया छायाँकार सुमन तण्डुकार खःसा कलाकारकथं सुनिता श्रेष्ठ, अर्णेश्वरी शिल्पकार, बिनु मानन्धर, सुरेन्द्र महर्जन, सुरेन्द्र तुलाधरपिं दुथ्याः । थःगु मिखाया न्ह्यःने जूगु घटनाया हुनिं जीवनय् वःगु ह्यूपाः थन ब्वयातःगु दु ।
चिराग फिल्म्स्पाखें ने.सं. ११३० दँय् निर्माण जूगु थुगु संकिपाया निर्माता पुजा श्रेष्ठ व शुभ तण्डुकार अले थुकिया बाखं व निर्देशक सुरेन्द्र तुलाधर खःसा छायाँकार सुरेश बज्राचार्य खः । थुकी कलाकारकथं राजु महर्जन, हरिश तण्डुकार, स्वतन्त्र संसार महर्जन, भोगेन्द्र मानन्धर, भिन्तुना जोशी, दिपा शाक्यपिं दुथ्याः । समाजं बदमाश धकाः धयातःपिं छथ्वः ल्याय्म्हत गय् जुयाः बदमाश जुल, इमित बांलाःगु लँपुइ हयेत जुइगु कुतः हे थ्व संकिपाया बाखं खः ।
नेपाल खड्गी सेवा समिति, थिमि नगदेशपाखें ने.सं.११३० दँय् निर्माण जूगु थुगु संकिपाया निर्माता रमेश खडगी, सह निर्माता विनोद शाही व सुरेश खडगी खःसा निर्देशक प्रभाकर देव शर्मा खः । थुकी गोविन्द ह्यूमत व किशोर शाहीया संगीत दुसा रविन्द्र शाहीया बाखं दु । संकिपाया छायाँकार मदन महर्जन अले थुकी कलाकारकथं रबिन्द्र शाही, किशोर शाही, मधु शाही, अनिता शाही, सुरेन्द्र के.सी., सुरेश खडगी, पल्पसा डंगोल, रमेश खडगी, राजु शाही, बुद्ध खडगी, शंकर खडगी, राजु खडगीपिं दुथ्याः ।
यलय् सिद्धिनरसिंह मल्ल जुजु जुयाच्वंगु इलय् बांलाःपिं मिस्त खनकि न्ह्याम्ह हे जूसां, न्ह्यागु जातयाम्ह जूसां कलाः तयाजुइम्ह जुयाच्वन । जुजुया थज्यागु पहः व चर्तिकलायात जनताया न्ह्यःने किपालुया माध्यमं जुजुया यौनलीलायात ब्यंगकथं धकिनय् झ्याल्चा नामं क्यनेज्या याःगु खः । झ्याल्चा क्यनीबलय् झ्यालय् तुयूगु पर्दा तयाः दुने चिलाख मतं क्यनाः संकिपाया अवधारणाय् न्यागूनिसें च्यागूतकया यौन लिलाया आशन मनू व वया ल्हाःपाया इसारां क्यनीगु नेवाः परम्परागत किचःकथं क्यनेगु संकिपा खः । थनिं ३५० दँन्ह्यः मल्लकालंनिसें न्ह्याना वयाच्वंगु उगु झ्याल्चा प्याखं थांैतक यलया च्यासः त्वालय् यंलाथ्वः, द्वादसिखुन्हु अर्थात यँयाःया लसताय् सम्यबजि इनेधुंकाः सन्ध्याया इलय् आःतक्क क्यना वयाच्वंगु दु । अथे हे छघौतक क्यनीगु थुगु झ्याल्चा क्यनेज्याया निंतिं अवाले जातिया छगू गुथि नं नीस्वना तःगु दु । भिमसेनया गद्दा साधना व भैरवया पुजा यायेधुंकाः दाफा भजनया बोल व तालया लिधंसाय् झ्याल्चा क्यनेगु ज्या न्हाइगु खः ।
चिनारी नेपाल अष्टे«लियापाखें ने.सं. ११३६ दँय् निर्माण जूगु संकिपाया निर्माता गंगाबहादुर नेमकुल अले निर्देशक रबि डंगोल खः । गंगा बहादुर नेम्कुलया बाखं दुगु थुगु संकिपाया छायाँकार रबि सायमि खः । कलाकारकथं गंगाबहादुर नेम्कुल, कोपिला तामाङ्ग, श्यामसुन्दर शिल्पकार, अर्णेश्वरी शिल्पकार, रुमन जोशी, शान्ति वाइबा, ओम तण्डुकार, रन्जिता ब्लोन तामाङ्ग, रत्नकाजि लूनिभाः अले बालकलाकारकथं सुलगना नेम्कुल व चेतन नेम्कुलपिं दुथ्याः । छम्ह मिसा टेम्पो चालकया जीवनय् वइगु थीथी समस्यायात संकिपाय् ब्वयातःगु दु ।
सुकुन्दा फिल्म प्रोडक्शनपाखें ने.सं. ११३७ दँय् निर्माण जूगु थुगु संकिपायाया निर्माता मिन्जु शाही व नरेश शाही खःसा निर्देशक बासु शाही खः । संकिपाया संगीतकार बालकृष्ण वंशी खःसा छायाँकार नरेश शाही खः । कलाकारकथं सबिन शाक्य, अर्णेश्वरी शिल्पकार, जस्मीन श्रेष्ठ, नरेश सिं, पल्पसा डंगोल, श्यामसुन्दर शिल्पकार, हरिमान दिवाकर, रवि महर्जन, प्रभात कुमार खेँय्पिं दुथ्याः । थुकी मनू शारिरीक रुपं सुस्त जूसां वया मन पवित्र जुल धाःसा अज्याःम्ह मनुखं आपाःसियागु नुगः त्याके फइ धकाः क्यनातःगु दु ।
नेपाल उत्थान सांस्कृतिक परिषदपाखें ने.सं. ११३५ दँय् निर्माण जूगु थुगु संकिपाया निर्देशक बालमुकुन्द प्रजापति खः । श्याम श्रेष्ठया बाखं दुगु संकिपाया छायाँकार सागर खडका खः । थुकी कलाकारकथं हरिकृष्ण दुवाल, राजकुमार चक्रधर, विष्णु श्रेष्ठपिं दुथ्याः । संकिपाय् थिमिइ च्वंपिं किसानतय् थःगु थासय् ज्या मगानाः तापलय् वनाः ज्या याः वनेगु परम्पराया बाखं ब्वयातःगु दु ।
आर्यम नकःमि फिल्म्सपाखें ने.सं. ११२६ दँय् निर्माण जूगु थुगु संकिपाया निर्माता गंगादेबी मानन्धर व एम बि नछ्यं खःसा थुकी बाखं व निर्देशक आर्यम नकःमि खः । अले संकिपाया छायाँकार मनराजा श्रेष्ठ खःसा कलाकारकथं हृदयप्रसाद मिश्र, भिन्तुना जोशी, आशिष्मा नकःमि, शोभा बज्राचार्य, सुनिता राजभण्डारीपिं दुथ्याः । संकिपाय् घमण्ड धयागु अप्वः याये मज्यू धकाः क्यनातःगु दु ।
लुँमधि अजिमा प्रोडक्शनपाखें ने.सं. ११३७ दँय् निर्माण जूगु थुगु संकिपाया निर्माता व बाखं दीपक कपाली खःसा निर्देशकपिं प्रवीण लाकौल व उमेश मान प्रधान खः । संकिपाया संगीतकार दीपक कपाली व अनिल तुलाधर खःसा छायाँकार सोहन मानन्धर खः । कलाकारकथं निक्की महर्जन, रुपेन्द्र श्रेष्ठ थक्वाः, योगेन ज्यापु, अनुज डंगोल, रेश्मी महर्जन, रेना महर्जन, मञ्जु श्रेष्ठ, अन्नपुर्णेश्वरी श्रेष्ठ, हरिमान दिवाकर, सुशील श्रेष्ठ व सुशील राजोपाध्यायपिं दुथ्याः ।