कृष्णचन्द्रसिंह प्रधानया जन्म ने.सं १०४५ नागपञ्चमी कुन्हु मां सूर्यमाया प्रधान व बौ सूर्यप्रसाद सिंहया कोखं येँया तुंछेँगल्लीइ जूगु खः। थ्वय्‌कः नांदंम्ह च्वमि हृदयचन्द्रसिंह प्रधानया किजा खः । थ्वय्‌कः २२ दँ तक कन्या मन्दिर माध्यमिक विद्यालयया शिक्षक जुयादिलसा लिपा नेपाल राजकीय प्रज्ञाप्रतिष्ठानया सह–सदस्य (१९६९–१९७४) व साझा प्रकाशनया जनरल मेनेजर (१९७५–१९८८) तक नं जुयादिल । नेपालभाषाया नापं नेपाली भाषाय् च्वसा न्ह्याकादीम्ह कृष्णचन्द्र सिंहं कविता, निबन्ध नापं समालोचना नं च्वयेगु यानादीसां थ्वय्‌कः नेपालभाषाय् जक मखु नेपाली भाषाय् नं समालोचकया रुपय् उलि हे नांदंम्ह च्वमि खः । थ्वय्‌कःया कवि व्यथित र काव्य साधना नांगु समिक्षात्मक सफूयात मदन पुरस्कार प्राप्त जूगु दु ।

नेपालभाषाय् थ्वय्‌कःया न्हापां पिदंगु च्वसु नेपालभाषा साहित्यया विकास व झीगु ज्या (निबन्ध, पासा १/२ ने.सं १०७३) खः । थःगु निबन्धया माध्यमं झीगु समाजय् सामाजिक, सांस्कृतिक, राजनैतिक ख्यलय् विद्यमान विसंगति व्यथितिप्रति हास्यया नापं स्याचुक्क व्यंग्य प्रहार याइम्ह निबन्धकार खः । न्हाय् थ्वय्‌कःया थज्याःगु हे हास्य व्यंग्य निबन्धया छगू दसु खः ।

नेपालभाषा साहित्यय् कृतिया समालोचना व समालोचनाया सिद्धान्त निगू पक्षय् नं योगदान बियादीम्ह कृष्णचन्द्रसिंहया समालोचनाया ख्यलय् न्हापां पिदंगु सफूझीगु साहित्यय् बाखं (ने.सं. १०९७) खःसा लिपा ने.सं १११८य् पलाःचिं नांगु समालोचनाया संग्रह पिदंगु दु । न्हापां साहित्यया मू, प्रगतिशील साहित्य व झीगु ज्या, प्रगतिशील साहित्यया लँपु आदि थेंज्याःगु सैद्धान्तिक समालोचनाया च्वसु च्वयाः प्रगतिशील समालोचनाया वकालत यानादीम्ह कृष्णचन्द्रसिंह प्रधानं लिपा थ्व पद्धतियात त्वःतादिलसा गहन अध्ययन, तीक्ष्ण अन्तर्दृष्टि दुम्ह निर्भिक व त्याजीक निर्णय बीम्ह समालोचक कथं थःत प्रतिष्ठापित यानादिल ।

अथेहे नेपालभाषाया ख्यलय् थ्वय्‌कलं मथुराकृष्ण साय्‌मिया निगू सफू यज्यू (ने.सं १०८४) व रमा (ने.सं १०८६)या सम्पादन यानादीगु दुसा च्वसापासां पिदनीगु पासा नांगु बाःछि पौया नं सम्पादन यानादीगु दु । थ्वय्‌कः सम्पादक जुसांनिसें स्वलातक थ्व पत्रिका न्हिपौया रुपय् पिदनसा साहित्यिक लेख रचना बाहेक थ्व पत्रिकां समसामयिक राजनैतिक गतिविधिया बुखँ नं बीगु यात, गुगु तत्कालिन युवा वर्गय् अतिकं लोकंह्वाःगु खः । कृष्णचन्द्रसिंह प्रधान मदन पुरस्कारया नापं रत्नश्री स्वर्णपदक, साझा पुरस्कार, प्रतिभा पुरस्कार आदि थीथी सिरपालं सम्मानित जुयादीगु दु ।

भाजु कृष्णचरण चखुंया जन्म ने.सं १०७७ थिंलागा दशमी कुन्हु अबु इन्द्रलाल चखुं व मां सूर्यमाया चखुंया कोखं यलया इलाछेँ त्वाः लुँहितिइ जूगु खः । पेशां सिभिल इञ्जिनियर वयकः दाजु गोबिन्दलाल चखुंया हःपालं थःगु स्कूल जीवनं निसें नेपालभाषा तथा थ्वया साहित्य ख्यलय् पलाः न्ह्याकादीम्ह छम्ह मातृभाषा अनुरागी खः । वय्‌कलं तत्कालिन थीथी साहित्य सम्मेलनय् ब्वति कयाः सिरपाः त्याकादीगु दुसा थीथी पत्रपत्रिकाय् नं वय्‌कःया बाखं, च्वखँ चिनाखँ पिदंगु दु । वय्‌कःया दकलय् न्हापां नेपालभाषां पिदंगु च्वसु छ्याकः (ने.सं १०९२) च्वखँ खःसा ककः (ने.सं १०९४), कुकुल्यांकू (ने.सं १०९५) तत्कालिन कुलां पत्रिकाय् पिदंगु निबन्ध खः ।

लिपा १०९५ य् इञ्जिनियरिङ्ग ब्वनेत वय्‌कः सोभियत रुस झायादिल । थन नेपालय् थेंज्याःगु वातावरण मदुसां वय्‌कलं च्वयेगु त्वःतामदी, तर वय्‌कःया च्वसाया धाः प्रगतिशील साहित्य रचना पाखे न्ह्यात । लिपा ब्वने क्वचायेकाः नेपाः लिहां वयेधुंकाः वय्‌कः मांभाय्‌या भाषिक साहित्यिक गतिविधिपाखें तापाः मजूसां कलम न्ह्याकेगु ज्या मजुल । थ्वयां लिपा वय्‌कः बेलायत झायादिल । थम्हं च्वसा न्ह्याकाः नेपालभाषाया सेवा यायेमफुसां अग्रज नेवाःतय्‌सं स्वनातःगु पासा पुचः गुथि युकेया नायः व पासापुचः गुथि र्बोड अफ स्टदीजया नायः जुयाः नेवाः पहिचान तथा नेवाः एकबद्धताया नितिं छम्ह नेवाः न्ह्यलुवा जुयाः ज्या यानादिल । थज्याःगु ज्याया क्रमय् वय्‌कःया मेमेपिं नेवाः न्ह्यलुवाःत नाप नं सर्म्पक जुल । फलतः नेवाःतय्‌त छपाः कुसाया दुने हयाः छप्पं छधी जुइकेगु निंतिं हलिं नेवाः गुथि नीस्वने माःगु छगू अवधारणा ब्वलन । थुकियात मूर्तरुप बीत वय्‌कःपिनिगु पासा पुचः गुथिं न्हापांगु हलिं नेवाः सम्मेलन लन्दनय् यायेगु भाला कयाबिल । पासा पुचः गुथि यूकेया संयोजकत्वय् ई.स. २०११ य् स्वन्हुयंकं लण्डनया अफ्रिकन स्टडिजया हलय् सत्यमोहन जोशी, प्रा. माणिकलाल श्रेष्ठ, पद्मरत्न तुलाधर आदिपिनिगु उपस्थितिइ सम्मेलन जुल । सम्मेलनं हलिं नेवाः दबू नीस्वनेगु प्रस्ताव पारित यात । थ्वहे सम्मेलनं डा. बालगोपालयात न्हापांम्ह नायः व भाजु कृष्ण चखुंयात न्हापांम्ह न्वकु ल्यःगु खः । थौंकन्हय् वय्‌कः हलिं नेवाः दबूया छुं पदय् मदुसां थम्हं फुगु ग्वाहालि यानाच्वनादीगु दु ।

ने.सं १०५९ स थानकोटया चुनिखेलय् जन्म जुयादीम्ह कृष्णप्रकाश श्रेष्ठ कतः देशय् अर्थात् रुसय् च्वनाः नं थःगु मातृभाषां साहित्यया सिर्जना यानादीम्ह तथा नेपालभाषा तथा थ्वया साहित्य संस्कृतियात रुसय् म्हसीके बियादीम्ह छम्ह विद्वान नापं मातृभाषा अनुरागी खः । कृष्णप्रकाश श्रेष्ठया बाल्यकाल पश्चिम नेपाःया बैतडीइ बिते जूगु व लिपा एस.एल.सी ब्वनेत येँ लिथेंसेलिं तिनि वय्‌कलं नेवाः भाय् ल्हाये सयेकादीगु खः ।

कृष्णप्रकाश श्रेष्ठ सन १९५८ य् रुसय् झाया सन १९६३ य् पत्रकारिताय् स्नातकोत्तर ब्वने क्वचायेकाः वय्‌कलं अन हे थःगु कर्मभूमि दयेका दिल । अन वय्‌कलं अनेक रुसी सफू खँय् भासाय् व खँय् भासा व नेपालभाषाया अनेकन कृतित रुसी भाषाय् अनुवाद यानादिल ।

नेपाली नेपालभाषा तथा रुसी भाषां च्वसा न्ह्याकादीम्ह कृष्णप्रकाश श्रेष्ठया लेखनया मू विषय —अनुवाद, कोश, समालोचना, साहित्यिक इतिहास व लोकबाखं संकलन जूगु दु । थथे वय्‌कःया नेपालभाषां पिदंगु न्हापांगु च्वसु यःम्हेसित (झी, २/६ १०९७) नांगु कविता खः । अथेहे नेपालभाषा सम्बन्धी वय्‌कःया पिदंगु सफू खः —नेपाली नेपालभाषा शव्दकोश (ने.सं १०९८), नेपालभाषा साहित्य (वि.सं २०५४), अथे हे वय्‌कलं रुसी विदुषी ल्युदमिला नाप जानाः नेपाली व नेपालभाषाया लोकबाखंया रुसी भाषाय् भाय् हीकाः ३५९ पृष्ठया सफू (वि.सं २०५४) पिकयादीगु दु ।

कृष्णप्रसाद श्रेष्ठं थःगु जीवनया उत्तरार्द्ध पाखे नेपालभाषाया मल्लकालिन कवि रणजीत मल्ल लिसें महाकवि सिद्धिदास, शुक्रराज शास्त्री, वासु शशी, गिरिजाप्रसाद जोशी नापं रुक्मिणी अमात्य तकया जम्मा नीच्याम्ह कविपिनिगु न्यय्पु कवितायात नेपालभाषाया नापं रुसी भासाय् अनुवाद सहितगु ह्वयेत्येगु स्वां नांया कविता संग्रहया पाण्डुलिपि वय्‌कलं त्वःताझाःगु दु । थ्व सफूया निंतिं वय्‌कलं नेपालभाषाया काव्ययात कया च्वयातयादीगु (रुसी भाषा व नेपालभाषाय् दुथ्यानाच्वंगु) ताःहाकःगु समालोचनात्मक भूमिका नं त्वःताथकादीगु दु । थुगु सफू पिथनेत वय्‌कलं येँ हलिं नेवा गुथि अथेहे हलिं नेवा दबूया दुजःपिं नापं खँ ब्याकेधुंकूगु नं खः । हलिं नेवाः दबूया ग्वसालय् सन २०२० डिसम्बर ३० व ३१ तारिख निन्हुयंकं जूगु ग्लोबल नेवाः : न्ह्यःनेया लंपु जुम कन्फरेन्सय् ब्वति कयाः वय्‌कलं रूसय् नेपालभाषा व साहित्यया स्थिति विषयय् ज्यापौ न्ह्यब्वयादीगु खः ।

थथे मौलिक, अनुदित व सम्पादित यानाः थीथी बिधाया सच्छि व न्यागू सफू पिथनाझाःम्ह कृष्णप्रकाश श्रेष्ठ ८३ दँया वैशय् २९ मार्च २०२१ कुन्हु कोविडया कारणं थःगु नश्वर देह त्वःताझाल ।

भाजु कृष्णप्रसाद दुवाल ने.सं. १०६० इ बाः गणेशबहादुर दुवाल व मां खिलकुमारी दुवालया कोखं जन्म जुयादीगु खः । वय्‌कःया ने.सं. १०७४ य् नेपाल पत्रिकाय् स्वां नांया कविता दकलेय् न्हापां प्रकाशित जूगु खः । वय्‌कलं नेपालभाषा व खस् नेपाली भाषाय् बाखं, कविता व निबन्ध च्वयेगु यानादी । वय्‌कःया प्रकाशित कृति जिं हालागु म्ये (ने.सं.१०८६) व बाल बाटिका (ने.सं.१०८६) खः ।

सगं (ल्हाःतं च्वयापौ) व चिराक पत्रिकाया सम्पादक जुयादीम्ह भाजु कृष्णप्रसाद दुवालं सिद्धिदास महान (ने.सं.१०७८) सफूया नं सम्पादन यानादीगु दु । भ्वँतय् नेपालभाषा साहित्यया प्रचार प्रसार यायेगुलिइ वय्‌कःया तःधंगु योगदान दु ।

बौ पद्मनारायण मानन्धर व मां इन्द्रमाया मानन्धरया क्वखं ने.सं १०५५ यंला (वि.सं. १९९२ भाद्र १४ गते) येँ, झोछेँया न्हूसाः त्वालय् चिनाखँ व च्वखँ च्वमि भाजु कृष्णप्रसाद मानन्धर ‘लुम्बि’या जन्म जूगु खः । एस.एल.सी तक ब्वनेज्या यानादीम्ह भाजु लुम्बिं नेपालभाषाया साहित्य ख्यलय् थःगु साहित्यिक पलाः चिनाखँ पाखें न्ह्याकादीगु खः । वय्‌कःया न्हापांगु कृति सिद्धिचरणयात जिगु खँ चिनाखँ नेपाल पत्रिका, ६७ इ पिदंगु खः । आपाः धया थें वय्‌कःया कविताय् थः दुनेया उसिंमसिं दनाच्वंगु असन्तोष व आक्रोशया भाव व्यक्त यानातःगु खनेदइ । नेपालभाषा साहित्यया सेवा यायेगु झ्वलय् वय्‌कलं जीवनया लँपुइ (ने.सं.१११४) व आत्म–विलाप (ने.सं. १११५)नांगु निगू कविता संग्रह पिथनादीगु दु । थुकथं नेपालभाषा साहित्यया सेवा यायां ने.सं १११७ य् वय्‌कलं थःगु नश्वर देह त्याग यानादिल ।

स्वनिगलं पिनें पिदंपिं नेपालभाषाया भाषिक अभियन्तापिं मध्ये भाजु कृष्णबहादुर शाही नं छम्ह खः । वय्‌कःया जन्म बि.सं.१९८९ भाद्र २८ गते येँय् डिल्लीबजारय् जूगु खः । लिपा वय्‌कः धरानय् वनाः सिँज्या यानादिल । वय्‌कः धरानय् नेपालभाषाया प्रचार प्रसार यायेगु ज्याया नापं चित्रकला व संगीतया क्षेत्रय् नं सक्रिय जुयादिल । वय्‌कलं धरानय् सरस्वति बाल अनाथ आश्रम चायेकादिल । उकिया सम्बद्र्धनय् न्ह्यचिलादिल । वय्‌कः २०६६ असारय् दिवंगत जुयादिल ।

ने.सं १०७९ य् बौ बिष्णुकुमार बोडे तथा मां न्हुछेमाया बोडेया कोखं जन्म जूम्ह कृष्णभक्त बोडे थःगु विद्यार्थीकालं निसें नेपालभाषाया भाषिक साहित्यिक क्रियाकलापय् संलग्न जुयादीम्ह छम्ह मातृभाषा अनुरागी खः । वय्‌कः विराट साहित्य सम्मेलन गुथिया निर्वतमान नायः व सल्लाहकार, नेपाल प्रज्ञाप्रतिष्ठान मातृभाषा विभागया दुजः, याताजः नेपालभाषा साहित्य दबूया संस्थापक दुजः आदि जक मखुसे थः स्वय्म हे छम्ह स्रष्टा खः ।

नेपालभाषाया न्हूगु काव्य विधा हाइकुयात ब्वलंकेगु निंतिं वय्‌कलं आपालं मेहनत यानादीगु दु । थम्हं स्वयमं हे हाइकु च्वयाः ने.सं ११२२–११२६ दुने प्यंगू हाइकु संग्रह – जिगु लु, मिचलः, अजिस्वां व ह्याँउल स्वां पिकयादिलसा हाइकुया प्रचारप्रसार व मेपिंत नं हाइकु च्वकेबीगु नितिं, नेपालभाषाया हाइकुया जातः (ने.सं ११३६) व हाइकुया चाकः दुने (ने.सं ११२८) धकाः हाइकु सम्बन्धी सैद्धान्तिक जः ह्वलीगु सफूया नापं थौंया हाइगु सम्बन्धी थःगु दुष्टिकोण ब्वयातःगु जिगु मिखाय् थौंया हाइकु (ने.सं. ११२२) सफू पिकयाः हाइकु काव्य ब्वलंकेगु ज्याय् आपालं योगदान बियादिल ।

अथेहे नेपालभाषाया आधुनिक बाखंया विकासया नितिं बाखं दबू थेंज्याःगु संस्थाया संस्थापक दुजः जुयाः बाखं दबूयात प्रचारप्रसार यायेगुया नापं थम्हं नं कःघाये मफुगु ई (ने.सं ११२९), मक्वाःगु भुतू (ने.सं ११३५) थेंज्याःगु न्हूबाखं संग्रह पिकयाः नेपालभाषाया आधुनिक बाखंया विकासय् महत्वपूर्ण तिबः बियादिल । वय्‌कःया थज्याःगु ज्याया कदर स्वरुप— जरिमैंया साखः लुमन्ति सिरपाः, लुभिन लुमन्ति नेपालभाषा सिरपाः आदि सिरपालं सम्मानित जुयादीगु दु ।

पत्रकार केके मानन्धर (कृष्णकाजी)या जन्म अबु न्हुछेमान मानन्धर व मां विकुमाया मानन्धरया कोखं वि.सं २०३७ भदौ ५ गते कृष्णाष्टमी कुन्हु थिमिइ जूगु खः । वि.सं. २०६३ सालय् सगरमाथा टेलिभिजनं पत्र–कारिता सुरु यानादीम्ह वय्‌कः थौंकन्हय् इमेज च्यानलय् नेपालभाषा समाचार प्रस्तोता जुया च्वनादीगु दु । लहना वाःपौया संस्थापक सम्पादक नं जुयादीधुंकूम्ह वय्‌कः थेम्मृङ लय्‌पौया निर्देशक नं जुयादीगु दु ।

जुजु पृथ्वीनारायण शाहं किपुलिइ हःताः याःगु विषययात कयाः दयेकूगु कीर्तिपुर दि लिजेन्ड अफ कीर्तिलक्ष्मी संकिपाय् वय्‌कलं कला निर्देशनया लिसें, पटकथा व संवाद लेखनया भूमिका म्हितादीगु दु । अथेहे नेवाःत सँदेशय् वनीगु विषयय् दयेकाच्वंगु च्वापु फय्बहुभाषी संकिपाय् नं वय्‌कः आवद्ध जुयाच्वनादीगु दु । लिसें वय्‌कलं तःगू भिडियो डकुमेन्ट्री दयेकादीगु दु ।

नेवाः पत्रकार राष्ट्रिय दबूया महासचिव जुयाच्वनादीम्ह वय्‌कः केन्द्रीय मानन्धर संघया केन्द्रीय सदस्य, भिंछेँमूलाँ टोल सुधार समितिया अध्यक्ष नं खः । नेपालभाषा सञ्चार ख्यलय् व सामाजिक सेवाय् योगदान यानादीगुलिं वय्‌कःयात न्हापांगु पलाः, मध्यपुर सञ्चार, सगरमाथा टेलिभिजन आदि पाखें सम्मान यायेधुंकूगु दु ।

केदार सितुया नामं नेपालभाषाया ख्यलय् नांजाःम्ह च्वमि केदारप्रसाद श्रेष्ठया जन्म मां दिलमाया व बौ रामप्रसाद श्रेष्ठया कोखं ने.सं. १०८२ इ यलया लुंहिटी चालाछेँ त्वालय् जूगु खः । थःगु विद्यार्थीकालं निसें नेपालभाषाया ख्यलय् च्वसा न्ह्याकाः थीथी साहित्य सम्मेलनय् तःगू सिरपाः त्याकादीम्ह थ्वय्‌कःया न्हापां प्रकाशित जूगु च्वसु तत्कालिन नीलः (ने.सं ११०२ : १) पत्रिकाय् पिदंगु आयतन नांगु कविता खः । नेपालभाषाया ख्यलय् थ्वय्‌कःया च्वसा — कविता, हाइकु, बाखं, चीबाखं व उपन्यास ख्यलय् न्ह्याःगु दुसा बाखं विधाय् थ्वय्‌कःया स्वंगू सफू — धकं धयाव (ने.सं. ११०३), ख्वाःपाःत (ने.सं. ११३०) व घाःत स्याःमचाःगु (ने.सं. ११३५) पिदंगु दु । अथेहे उपन्यास विधाय् नं ल्हाः न्ह्याःम्ह थ्वय्‌कलं निगू उपन्यास स्वम्हम्ह मनू (ने.सं. १११२) व तथागत (ने.सं. ११३५) पिकयादीगु दु ।

थ्वय्‌कः फ्रायडया यौनमनोविज्ञानयात नेपालभाषाया बाखनय् दुतिनाः नेपालभाषाया मनोवैज्ञानिक बाखंयात अझ न्ह्यज्याकादीम्ह, बाखनय् परम्परागत संरचनाया थासय् न्यूनतम संबाद, वातावरण, पात्र, बाखंचु दुथ्याकाः स्वच्छन्दरुपं बाखं च्वयाः पाठकपिंत प्रभाव लाकेफुम्ह बाखंच्वमि खः । थ्वय्‌कःया बाखंयात कवितात्मक बाखं नं धायेगु याः । थ्वय्‌कःया थज्याःगु बाखंया कारणं नेपालभाषा परिषद्ं थ्वय्‌कःयात ने.सं ११४२ या केशवलाल सिरपाः देछाःगु दु ।

देशय् विद्यमान आर्थिक, राजनैतिक विकृति विसंगति, व्यथिति आदियात आत्म प्रलापया शैली एकनासं थःगु नुगः खँ प्वंके थें यानाः प्वंकातःगु स्वम्ह मनू उपन्यासं नेपालभाषाय् सीदयेक उत्तरआधुनिकवादया लहर दुहांवयेधुंकूगु खँयात नं स्पष्ट यानाब्यूगु दु । थौं साहित्यया छुं नं विधा थथे हे जुइमाः धैगु निश्चित नियम मदयेधुंकल धैगु क्यनाब्यूगु दु । थःगु लजगाः बाहेक पत्रकारिताया ख्यलय् नं ज्या यानादीम्ह केदार सितुजुं बाखं उपन्यासया सफू पिकायेगु बाहेक आखे नांगु पत्रिका नं सम्पादन यानादीगु दु ।

बौ दामोदरनाथ न्यौपाने व मां सुमित्रा न्यौपानेया क्वखं येँया न्ह्योखा त्वालय् ने.सं. १०४८ (वि.सं. १९८४ मार्ग १४) य् निबन्धकार केदारनाथ न्यौपानेया जन्म जूगु खः । वय्‌कःया मेगु नां राम खः । नेपालभाषा न्यौपानेजुया थःगु मांभाय् मखुसां नेपालभाषां च्वसु च्वइपिं विभाषीया दथुइ वय्‌कः नं छम्ह खः । नेपालभाषाया साहित्य ख्यलय् भाजु न्यौपानेया न्हापांगु च्वसु नेपाल पत्रिकाय् ने.सं. १०६३ इ पिदंगु संरक्षक, शिक्षक व विद्यार्थीतय् पारस्परिक सम्बन्ध खः ।

छम्ह विभाषी जुयाः नं च्वसापासाया सेक्रेटरी जुयाः ज्या यानादीम्ह भाजु न्यौपानेया नेपालभाषाय् बिस्कंगु योगदान दु । कन्या मन्दिर माध्यामिक विद्यालयया संस्थापक तथा प्रधानाध्यापक भाजु न्यौपानेया न्हापांगु सफू केहेँयात पति ने.सं. १०७२य् पिदंगु खःसा वय्‌कलं च्वयादीगु झिंप्यपु च्वसु मुनाः झी फुक्कं स्वतन्त्र नांगु सफू भाजु भूषणप्रसाद श्रेष्ठजुं ने.सं. ११३८ बछलाथ्व १० कुन्हु पिथनादीगु खः । नेपालभाषा थःगु मांभाय् मखयां नं थ्वय्‌कलं कन्या मन्दिर माध्यामिक विद्यालयय् नेपालभाषा ब्वंकेगु व्यवस्था यानाः नेपालभाषा थपू यायेगुली बस्कंगु योगदान बियादीगु दु । थज्याःगु हे नेपालभाषाया ख्यलय् बिस्कंगु लुमन्ति त्वःताः ने.स. १०९१ (वि.स. २०२८ असोज १८) य् वय्‌कः दिवंगत जुयादिल ।