सुधीर ख्वबि ने.सं.१०७९ थिंलागा ७ कुन्हु मां मोतिमाया सिँकःमि व अबु दिलबहादुर सिँकःमिया कोखं जन्म जूम्ह सुधीर ख्वबिया मेगु नां टेकबहादुर सिँकःमि खः । ने.सं.१०९८य् मलः पत्रिकाय् शो केस दुनेया आदर्श न्हापांगु कविता ज्वनाः पिलू झाःम्ह सुधीर ख्वबि नेपालभाषाया छम्ह नांजाःम्ह आधुनिक कवि, बाखंच्वमि, गजलकार नापं छम्ह सशक्तम्ह हाइजिन नं खः । वय्‌कलं विद्यार्थी जीवनं निसें थीथी साहित्य सम्मेलनय् आपालं सिरपाः त्याकादीधुंकूगु दु ।

वय्‌कःया चक्रव्यूह (ने.सं ११००), पित्याः मिखा (ने.सं १११५), नतूचाय् तियातःगु वर्तमान व जः प्यंगू चिनाखँ मुना, न्हूगु वसन्त (ने.सं १११७) बाखं मुना, पलाः पलखय् गजल संग्रह व हायावंगु हः व छथ्वः हाइकु यानाः निगू हाइकुया सफू पिदनेधुंकूगु दु । कवि सुधीर ख्वबिं ने.सं.१११४ य् स्वनिगः दँपौया संयुक्त सम्पादन नं यानादीधुंकूगु दु । मतिनाया सवाः चिबाखंया नापं नेपाली भाषाया नं तःगू कविता संग्रहया सम्पादन यानादीगु दु ।

न्हूगु विश्वभूमि सिरपाः (ने.सं १११३), पलिस्था ख्यालः धेंधेंबल्लाः कासाय् उत्कृष्ट ख्यालः च्वमि सिरपाः व दँ मनू सिरपाः (ने.सं १११५), लुमिन सिरपाः (ने.सं ११३४) आदि पाखें वय्‌कः सम्मानित जुइधुंकूम्ह व्यक्तित्व खः । आपालं पत्रपत्रिकाय् च्वसु च्वयेगु नापं नेवाः सञ्चार टेलिभिजन ख्यः, सः छगू फरक अभिव्यक्ति नापं थीथी साहित्यिक संस्था नापं वय्‌कः सशक्त रुपं सकृय व्यक्ति कथं म्हस्यूम्ह स्रष्टा खः ।

लिपि क्विन नामं नं म्हसीका दुम्ह सुनिता डंगोल ने.सं. १११३ बछलागाः द्वादशी कुन्हु अबु सन्तु डंगोल व मां संगीता डंगोलया कोखं येँया लगंत्वालय् जन्म जूगु खः । समाजशास्त्रय् एम.ए. अध्ययन क्वचायेकादीम्ह वय्‌कः क्यापिटल एफ. एम. व नेपाल टेलिभिजनय् ज्याझ्वः न्ह्याकादीम्ह सञ्चारकःमि नं खः । नेसं ११३१ दँय् मिस नेवाः जुयादीम्ह वय्‌कलं नेसं ११३८ चौलानिसें रञ्जना लिपि क्यालिजात्रा व वर्कशप न्ह्याकाः त्वाःत्वालय् वनाः रञ्जना लिपि प्रचारप्रसार व प्रवर्द्धन यानादिल । नेसं ११४० दँय् हलिंन्यक कोरोना ल्वय् न्यनाच्वंगु इलय् वय्‌कलं फेसबुक लाईभया माध्यमं हलिं न्यंक रञ्जना लिपि व नेपालभाषा अनलाईन कक्षा न्ह्याकादिल । वय्‌कलं यैपुक व न्ह्यैपुक रञ्जना लिपि व नेपालभाषा स्यनेकने यानादीगुलिं वय्‌कःया ज्याझ्वलय् हलिं न्यंकया आपाःसिनं ब्वति काःगु खः । वय्‌कलं नेपालभाषाया न्हियान्हिथं ज्याखँ व खँल्हाबल्हाया आधारभूत पाठलिसें व्याकरणकथं नाम, सर्वनाम, क्रियापद, कारक विभक्ति, विशेषण, बचनया पाठ थीथी ग्राफिक्स व डिजिटल ज्वलं छ्यलाः अनलाइन माध्यमं स्यनादीगु खः । नेपालभाषा व रञ्जना लिपि सयेकीपिंत ग्वाहालि जुइमा धकाः वय्‌कःया दक्वं पाठ्यज्वलं युट्युबय् नं तयादीगु दु ।

वय्‌कलं व्यावसायिकरुपं रञ्जना लिपि छ्यलाबुला याकेगु निंतिं अभियान नं न्ह्याकादिल । वय्‌कःया इनापयात नालाकासें थीथी व्यावसायिक संस्थातय्‌सं नांग्वरः व थःपिनिगु उत्पादनय् रञ्जना छ्यलाबुला याःगु दु । वय्‌कलं तिसा, वसः व ट्याटुइ नं रञ्जना लिपिया कुटाक्षर छ्यलाबुला यायेगु ज्या न्ह्याकाः युवा पुस्ताया दथुइ नं रञ्जना लिपि लोकंह्वाकादीगु दु । वय्‌कलं येँ महानगरपालिकाया ब्वनेकुथिया नेपालभाषा स्यनामिपिंत नं नेपालभाषा व रञ्जना लिपि स्यनेकने यानादीगु दु ।

सुनिता डंगोल ने.सं ११४२ दँय् जूगु स्थानीय निर्वाचनय् येँ महानगपालिकाया उपप्रमुख पदय् नेपाःन्यंक दकलय् अप्वः भोट हयाः त्याकादीम्ह खः । येँ महानगरपालिकाय् निर्वाचित जुइधुंकाः वय्‌कलं महानगरया विकास निर्माणया ज्याया लिसेलिसें नेवाः जातिया कला, संस्कृति, व सम्पदा लिसें नेपालभाषा व नेपाललिपि रञ्जना लिपि च्वन्ह्याकेगु ज्याय् नं तिबः बियाच्वनादीगु दु ।

अबु विष्णुबहादुर मानन्धर व मां बद्रीमाया मानन्धरया कोखं वि.सं. २०३१ असार १५ गते येँय् मरुत्वाःया चसाद्वँय् मय्‌जु सुनिता मानन्धर बूगु खः । नेपालभाषा विषय कयाः स्नातकोत्तर ब्वने ज्याय् दकलय् अप्वः ल्याः हयाः चैन लाकौल सिरपाः त्याकाः ब्वंके ज्या यानाच्वंम्ह मय्‌जु सुनिता मानन्धर थौंकन्हय् जगतसुन्दर ब्वनेकुथिया प्रधानाध्यापक नं खः ।

पंचवीर सिरपाः व शेरलक्ष्मी पाखें छाय्‌पीधुंकूम्ह वय्‌कलं नेपालभाषां बुद्ध शिक्षा व मेमेगु च्वसुत च्वयादी । ने.सं. ११२९ दँय् धर्मादित्य धर्माचार्य व युवा बौद्ध समूह येँया ग्वसालय् जूगु च्वखँ धेंधेंबल्लाः कासाय् ल्यू सिरपाः त्याकादीम्ह मय्‌जु मानन्धरं नेपालभाषा साहित्य ख्यलय् आपाः यानाः बाखं विधाय् च्वसा न्ह्याकादी । बाखं च्वयेगु झ्वलय् मचा बाखं च्वयाः इलोहं एल्भिस सिरपाः (ने.सं. ११२८) त्याकादीधुंकूम्ह वय्‌कः मय्‌जुया किपासहितया मचा बाखं सफू तुंथिइ कुतुं वंम्ह खिचा मातृभाषा पिपल परियोजनापाखें पिथनेधुंकूगु दु । अथेहे वय्‌कलं च्वयादीगु अजा अजिं कनातःगु बाखं सफू युवा बौद्ध समूहपाखें पिदनेधुंकूगु दु ।

अबु अर्जुन राजभण्डारी व मां सूर्यमाया राजभण्डारीया कोखं ने.सं. १०९७ गुंलाथ्व ११ कुन्हु येँया वतुत्वालय् जन्म जूम्ह सुनिता राजभण्डारी नेपालभाषा, साहित्य, संकिपाया ख्यलय् नांजाःम्ह व्यक्तित्व खः । थ्व ख्यलय् वय्‌कःयात सुनिता जुनुया नामं अप्वःस्यां म्हसीकेगु याः। म्ये, चिनाखँ, चिबाखं गजल हाइकु व संकिपाया बाखं व धकिंबाखं च्वयेगुली ल्हाः न्ह्याःम्ह सुनिता जुनु मांभासं आखः ब्वनेदयेमाः धैगु अभियानया छम्ह अभियन्ता नं खः । मय्‌जु सुनिताया पिदंगु कृति खः— कात्तिप्याखनय् नृसिंह अवतार (ने.सं ११३६), जुजु रणजित मल्लया विरचित पृथुपाख्यान नाटक (सम्पादन ने.सं ११३६) । अथेहे वय्‌कलं डा. वसन्त विडारीया लुम्बिनीको मौन आह्वान नांगु नेपाली भाषाया सफूयात नेपालभाषां अनुवाद यानादीगु दुसा बद्रीरत्न बज्राचार्यया नेपालको बुद्धधर्ममा दशकर्मकाण्ड सफूयात नं नेपालभाषं अनुवाद व सम्पादन यानादीगु दु । नेपालभाषा स्नातकोत्तर तगिमय् प्रथम स्थान प्राप्त यानादीगुलिं वय्‌कःयातं नेपाल विद्या भूषण ख पदक, मोतिलानि सिरपाः, चैन लाकौल सिरपाः, सत्यहिरा सिरपाः, पीयुष पदक, हिसिना सिरपाः आदि लःल्हाःगु दुसा वय्‌कलं नेवाः सिनेमाया ख्यलय् यानादीगु थीथी ज्या गथे – बाखं, धकिंबाखं लेखन, निर्देशन, निर्माण आदिया नितिं नं वय्‌कः थीथी सिरपाः, हनापौ, सुभाय् पौ लःल्हाःगु दु । थौंकन्हय् वय्‌कः नेपालभाषाया शिक्षा ख्यलय् नेपालभाषा विषयया शिक्षकया रुपय् व नेवाः सिनेमा ख्यलय् छम्ह सक्रिय सिनेकःमि जुयाः ज्या यानाच्वनादीगु दु।

मां उजेली व बौ हरिनारायण मधिकर्मीया कोखं ने.सं. १०६३ कछलाथ्व म्हपुजा कुन्हु ख्वपया ग्वःमरि त्वालय् सुन्दर मधिकर्मिया जन्म जूगु खः । वय्‌कःया छेँया नां सुन्दर गोपाल मधिकर्मी खः । वय्‌कलं १६ दँ दुबलय् निसें कविता च्वय्‌गु यानादीगु खः । नेपालभाषाया न्हापां पिदंगु आधुनिक कविता संग्रह गाजलं दाःगु चा (ने.सं १०८६) सफुलिइ कविता दुथ्याःपिं कविपिं मध्ये सुन्दर मधिकर्मि नं छम्ह खः । नेपालभाषाया प्रगतिवादी नापं आधुनिक गद्य कविताया न्ह्यलुवा कवि सुन्दर मधिकर्मिं दकलय् न्हापां ने.सं. १०७९ य् ख्वपय् जूगु छगू साहित्यिक गोष्ठीइ फा नांया कविता ब्वनाः न्यंकादीगु खःसा ने.सं. १०८२ दँय् न्हापांगु विराट नेपालभाषा साहित्य सम्मेलनय् ग्यायेमते, ग्यायेमते पासा, न्हूगु जमाना वइतिनि नांगु कविता ब्वनाः आपालं दर्शकपिनिगु ताली फयादीगु खः । अथेहे वय्‌कःया ने.सं. १०८५ या सितु पत्रिकाय् दकलय् न्हापां मुद्रण जुयाः कविता पिदंगु खः । सुन्दर मधिकर्मिया न्हापां न्हापांगु कविता सुन्दर, सुन्दर सर्वहारा नामं पिदंगु दु । वय्‌कःया पिदंगु कविता मुनाय् वय्‌कःयात नेपालभाषा आधुनिक गद्य कविताया न्हापांगु पुस्ताया प्रगतिवादी आधुनिक कवि धकाः स्पष्ट स्पष्ट रुपं हे म्हसीका बियातःगु दु ।

नेपालभाषाय् पिदंगु वय्‌कःया आधुनिक कविता मुना — लबु गुगु दना वइ (ने.सं. १०९१), आलतनि मखु (ने.सं. १०९९), फसय् थ्वयाच्वंगु म्ये (ने.सं. ११०५) थःगु हे घाल (ने.सं. १११७), आकाश पियाच्वन (ने.सं. १११८), जिगु म्हगसया जाः (ने.सं. ११२१) आदि । अथेहे वय्‌कःया कविता नेपाली भाषाय् अनुवाद जुयाः सुन्दर मधिकर्मिको कविता (ने.सं. ११२३) नामं कविता संग्रह पिदंगु दु ।

सुन्दर मधिकर्मिं सम्पादक व सल्लाहकार जुयाः नं सफू व पत्रिका पिकयादीगु दु । गुगु छुं थथे दु –गाजलं दाःगु चा (सम्पादन), लबु (स्वलापौ, ने.सं. १०९१ निसें पिदनाः ३७ दँ तक पिदंगु), ह्याउँबाला (दँ १, ल्याः १, विराट नेपालभाषा साहित्य सम्मेलन गुथिया ख्वाःपौ), पँलासु (समसामयिक संकलन पत्रिका, ने.सं. १०९९) मिब्वाला (समसामयक संकलन पत्रिका, ने.सं. १०९९) आदि ।गाजलं दाःगु चाः व लबु पत्रिका पिथनाः नेपालभाषाया आधुनिक गद्य कविता च्वन्ह्याकेगुलिइ वय्‌कलं महत्वपूर्ण भूमिका म्हितादीगु दु । अथेहे सुन्दर मधिकर्मिं ख्वपया विराट नेपालभाषा साहित्य सम्मेलन गुथि न्ह्याकेत दुजः, मू दुजः, मू छ्याञ्जे, न्वकु, नायः व सल्लाहकार आदि जुयाः आपालं ग्वाहालि यानादीगु दु ।

मां रत्नकेशरी व अबु गणेशराम लाछिया काय्‌मचा भाजु सुभाषराम लाछि प्रजापतिया जन्म थिमिया चपाच्व त्वालय् ने.सं. ११०० पोहेलागा १० कुन्हु जूगु खः । थ्वय्‌कः थौंकन्हय् अमेरिकाय् च्वनादी । युनिभर्सिटी अफ वाशिङ्टनपाखें एथ्नोम्यूजिकोलोजी विषयय् नेवाः संगीतय् केन्द्रित पिएचडी तथा त्रि.वि.पाखें नेपालभाषा व नेपाली संस्कृति निगुलिइ एम.ए यानादीम्ह वय्‌कः निगुलिं डिग्रीइ बोर्ड प्रथम जुयादीम्ह खः । पेशां सफ्टवेयर इञ्जिनियरया ज्या याना च्वनादीम्ह वय्‌कः नेपालभाषा लेखन, अनुसन्धान, कलाकारितालिसें भाषिक व सांस्कृतिक अभियन्ता कथं सक्रिय जुया च्वनादीगु दु ।

मचांनिसें नेपालभाषा च्वज्याय् न्ह्यज्याःम्ह वय्‌कःया न्हापांगु कविता लबु स्वलापतिइ पिदंगु खः । वयां लिपा झिंन्यादँ दुबलय् वय्‌कःया मचासू नांया सफू पिदन । थ्व बाहेक नेपालभाषाय् वय्‌कःया नेपाःगाःया सांस्कृतिक बाजं, ईमेल इन्टरनेट सिइके, बुद्ध धर्मय् कर्मया अवधारणा, नेपालभाषा नाटकया संगीत पक्ष, मल्लकालीन रणभूमि वाभू लगायत मेमेगु भाषाया नं यानाः छगू दर्जनति मौलिक सफू पिदंगु दुसा वय्‌कलं मध्यपुर बहुभाषिक पौ, नेपाः सः वाःपौ, ब्वनामि दँपौ, नेपालमण्डलया ख्वाःपाः प्याखं लगायत बागू दर्जन मल्याक सफू, पत्रपत्रिका सम्पादन यानादीगु दु । अथेहे वय्‌कलं दर्जनौं ज्यापौ च्वयाः थीथी गोष्ठीइ न्ह्यब्वयादीगु दु । विशेषतः हुला प्याखं व अभिनय मार्फत कला क्षेत्रय् दुहांझाःम्ह वय्‌कलं ख्वपब्यापी हुलाप्याखं कासाय् न्हाप, स्वनिगःब्यापी हुलाप्याखं कासाय् ल्यू, पलिस्था ख्यालः कासाय् स्वकःतक न्हाप, स्वकःतक सर्वोकृष्ट निर्देशकया सिरपाः, चकना अन्तर क्याम्पस ख्यालः कासाय् सर्वोकृष्ट निर्देशनया सिरपाः त्याकादीगु दु । अथेहे स्वनिगःब्यापी परम्परागत बाजं कासाय् न्हाप, युथ इनिसिएटिभ अवार्ड लगायत न्यय्‌गुलिं मल्याक थीथी सिरपाः व हनापाखें वय्‌कः विभूषित जुयादीगु दु । नेपालभाषायात इन्टरनेटय् दुथ्याकेगु व नेपालभाषाया डिजिटलीकरण यायेगुलिइ वय्‌कःया तःधंगु योगदान दु ।

वय्‌कः नेपालभाषा संस्कृतिया वेबसाइट ज्वजलपा डट कमया च्वमि व छम्ह संस्थापक, नेपालभाषाया दकलय् तःधंगु पोर्टल नेपालमण्डल डट कमया संस्थापक व निर्देशक, नेपालभाषा डिजिटलीकरण परियोजनाया परिकल्पनाकार व नेपालभाषाया दकलय् तःधंगु अनलाइन खँग्वः धुकू व मोबाइल एप नेपालभाषा डटअर्गया संस्थापक व निर्देशक खः ।

नेपालभाषाया थीथी खलः पुचलय् च्वनाः ज्या यानादीम्ह वय्‌कः सिक्किम, भारतया नेवाः भाषा व संस्कृति ब्वनेकुथिया संस्थापक प्रशिक्षक, नेवाः ब्वनामि दबूया संस्थापक मूछ्याञ्जे, नेवाः अर्गनाइजेशन अफ अमेरिका सियाटल च्याप्टरया संस्थापक नायः, हलिं नेवाः दबूया छम्ह संस्थापक, निवर्तमान मूछ्याञ्जे अले दबुलीया संस्थापक व कार्यकारी निर्देशक नं खः ।

पण्डित दिव्यवज्र बज्राचार्य व केशरी बज्राचार्यया म्ह्याय् मय्‌जु सुमति बज्राचार्य वि.सं. २००२ सालय् येँया ज्याथा छुस्याबहालय् जन्म जूगु खः । बुद्धधर्म सम्बन्धी थीथी सफू च्वयादीम्ह वय्‌कःया नेपालभाषाय् पञ्चस्कन्ध हे पञ्चबुद्ध नांगु सफू पिदंगु दु । वय्‌कलं थः अबुजु पं. दिव्यवज्र बज्राचार्यया आपालं सफू सम्पादन यानाः पिकयादीगु दु ।

ल्याय्‌म्ह पुस्ताया नेवाः अभियन्ता भाजु सुमन साय्‌मिया जन्म बि.सं.२०३० बैशाख १ गते कालिमाति त्वालय् जूगु खः । वय्‌कःया मांया नां ललिता मानन्धर खः । वय्‌कःया बाः कालिमातित्वाःया न्हापायाम्ह वडा अध्यक्ष, नांजाःम्ह समाजसेवी, भाषासेवी जीवनराज मानन्धर खः ।

नेपालभाषा व नेवाः सरोकारय् विशेषरुपं च्यूताः कयाः भाजु सुमन साय्‌मि लिपांगु इलय् सक्रिय जुयादीम्ह व्यक्तित्व खः । सतक विस्तारया नामय् नेवाःतय् पुलांगु बस्ति न्हंकाछ्वयेगु तातुनाः यक्व हे नेवाःतय् छेँ थुनाः, विस्थापित यानाहयेवं थुकिया बिरुद्ध वय्‌कः कानुनी लडाईया लिसेलिसें आन्दोलन न्ह्याकाः न्ह्यचिलादीम्ह खः । सामाजिक सेवाय् नापं सक्रिय जुयादीम्ह भाजु सुमन साय्‌मि उपत्यकाब्यापि सतक बिस्तार पीडित संघर्ष समितिया केन्द्रिय नायः, राष्ट्रिय पहिचान संयुक्त संघर्ष समिति निर्देशन कमिटीया दुजः, गुथि विधेयक एकीकृत आन्दोलनया दुजः, उपत्यका सरोकार मंचया नायः, मातातीर्थ बृद्धाश्रम समितिया नायः, मानवअधिकार सचेतना केन्द्रया सल्लाहकार व युनाइटेड युथ क्लबया दुजः नं खः ।

नेपालभाषा साहित्य लागाया युवा हस्ताक्षर सुमा श्रेष्ठ (बनेपाली) बौ लुम्प्रसाद व मां पूर्णकुमारी श्रेष्ठया कोखं ने.सं. १०९० सालय् ख्वपया इनाचो त्वालय् जन्म जूगु खः । वय्‌कः नेपालभाषा व नेपाली भाषा निगुलिं भाषाय् सव्रिय स्रष्टा खः । वय्‌कलं नेपालभाषाय् चिबाखं, चिनाखँ व च्वसु विधाय् थःगु च्वसा न्ह्याकादीगु दु । मिसातय्‌गु अभाव, वेदना व उमिगु संघर्षयात कयाः साहित्यिक चेतनाय् मुखरित जुयाः साहित्य सिर्जना याइम्ह सुमा श्रेष्ठ पेशां नेपाल सरकारया उपसचिव पदय् ज्या यानादी ।

थीथी पत्रपत्रिकाय् च्वसा पिथनादीम्ह सुमा श्रेष्ठं नेपाल साहित्य मदिर : छगू म्हसीका नांगु छगू अनुसन्धानात्मक ग्रन्थ च्वयादीगु दु । उगु सफुलिइ नेपाल साहित्य मन्दिरया भाषिक, साहित्यिक, गोष्ठी व साहित्यिक प्रशिक्षणया ऐतिहासिक उपलब्धिबारे न्ह्यथनातःगु दु । उगु कृतियात योगवीर सिंह कंसाकार ११३६ सिरपाः प्रदान याःगु दु । उकथं वय्‌कःयात राष्ट्रव्यापी लघुकथा धेंधेंबल्ला वि.सं. २०६२ स उत्कृष्ट चिबाखंया सम्मान प्रदान याःगु दु । नापं वय्‌कः इन्द्रेणी साँस्कृतिक समाजया कविता धेंधेंबल्ला ने.सं. ११३३ स न्हाप जुयादीगु खः । प्रकाश महर्जन, अगिब बनेपालीनापं जानाः सुमा श्रेष्ठं नेवाः लोकबाखं व नेवाः स्रष्टा नांगु सफूया सहलेखन यानादीगु दु । सुमा श्रेष्ठ नेपाल साहित्य मन्दिरया कार्यसमितिया दुजः जुयाः नं सव्रिय जुयादीगु दु ।

भाजु सुरेन्द्रमान अमात्यया जन्म अबु मास्टर अनन्तमान अमात्य व मां सेती अमात्य (महाकवि सिद्धिदास अमात्यया म्ह्याय्‌चा) या कोखं यलया स्वथनारायण त्वालय् ने.सं १०७२ य् जूगु खः । थ्वय्‌कः सन् १९९९ निसें बेल्जियमय् च्वंच्वनादीगु खः । नेपालभाषा विषय कयाः एस.एल.सी तगिंनिसें बी.ए तक ब्वनादीम्ह थ्वय्‌कः नेवाःत तसकं म्होजक दुगु बेल्जियमय थेंज्याःगु कतः देशय् च्वनाः नं थःगु मांभाय् नेपालभाषाया सेवा यानाच्वनादीम्ह छम्ह नेवाः काय्‌मचा खः । थ्वय्‌कःया सक्रियताय् बेल्जियम पासा पुचः गुथि स्थापना जूगु दुसा प्यदँतक थ्व गुथिया छम्ह दुजः जुयाः ज्या यानादीगु दु । अथेहे थ्वय्‌कः हलिं नेवाः दबूया नं छम्ह संस्थापक सदस्य खःसा एनआरएन बेल्जियमया नं संस्थापक सदस्य खः ।

थ्वय्‌कःया अग्रसरताय् इलय् ब्यलय् बेल्जियमय् बेल्जियम पासा पुचः गुथि मार्फत् महाकवि सिद्धिदासया बुदिं न्यायेकेगु, म्हपुजा हनेगु याःगु दुसा थौंकन्हय् नेपाल संस्कृति नांगु हलिं नेवाः लय्‌पौया व्यवस्थापक नं जुया च्वनादीगु दु । दिनाःदिनाः पिदनाच्वंगु थ्व लय्‌पौयात वय्‌कलं बेल्जियम पाखें हानं निरन्तरता बीगु कुतः यानादीगु दु । थथेहे वय्‌कलं नेपालभाषा व नेपालीं चिनाखँ, हाइकु व निबन्ध च्वयाः नेपाल संस्कृति व मेमेगु पत्रिकाय् पिथनादीगु दु ।