दापा संगीतय् यक्व छ्यलाबुला दुगु छगू ताल खः– एकताल । एकताल स्वंगू स्वंगू मात्राया निगू विभाग जुयाः मुक्कं खुगू मात्राया ताल खः । थ्व तालय् ताः थायेबलय् १ मात्रा तिं व ४ मात्रा छु कथं थायेमाः । यल, ख्वप व किपू लागाय् एकताल च्वयातःगु दापाम्येया ताल येँय् लंताः च्वयातःगु दुसा अन लंताःकथं हे म्ये हाली, बाजं थाइ । एकताल मात्राया ल्याखं लंताः स्वयाः पाःगु खनेदुसा दादरा व कर्षा ताललिसे ज्वःलानाच्वंगु दु ।
१ २ ३ । ४ ५ ६
तिं । छु
थुगु बाजं विशेष विधिकथं किसली तयाः झिदँ झिंनिदँय् छक्वः न्हूपिन्त स्यनी । काहा पुइगु स्यनेज्या स्वला निसें खुला तक न्ह्याइ । थुकिया स्यनेज्या बाह्य व गुह्य यानाः निथी दइ । जात्रा, पर्व व द्यःयाथाय् पुइगु बोल बाह्य जूगुलिं बोल पुयाः अभ्यास यानाः स्यनेज्यू । सिथं यंकीबलय् पुइगु बोल गुह्य बोलकथं चाया एकान्तय् मेपिन्सं मतायेक बोल जक स्यनी, पुयाः अभ्यास याये मज्यू । काहा पुइगु बोल मेपिन्त कने मज्यू धैगु मान्यता दु । ख्वपय् काहा पुइगु स्यनेत थौंकन्हय्या भक्तपुर इँटा टायल कारखानाया च्वसं काहा फल्चा नांया विशेष फल्चा हे दु । जति, प्रताल, एकताल व मेगु छगू यानाः प्यंगू तालय् काहा पुइगु चलन दु ।