बिसं १९९४ दँय् आल्क्वय् अबु आनन्दज्योति वज्राचार्य व मां चिनिमाया बज्राचार्यया कोखं जन्म जूम्ह कान्छा गुरुजु ‘अकेला’ छम्ह अतिकं सक्रियम्ह कलाकार खः । वय्कः उगु इलय् खःप्याखं व थीथी संस्थां ग्वसाः ग्वइगु सांस्कृतिक ज्याझ्वलय् म्ये हालाः व थःगु संगीतं जायेकाः मेमेपिं कलाकारतय्त हाय्के बियाः ज्वः मदुगु प्रतिभा न्ह्यब्वया च्वंम्ह छम्ह होनहार कलाकार खः । थ्वय्कःया योगरत्न शाक्यं च्वयादीगु, थम्हं हे लय् चिनादीगु व सूरजवीर बज्राचार्यं हालादीगु ‘बर्से जु बर्सात सुपाँय् छ, घनघोरं छ बर्से जु’ बोलया म्ये लोकं ह्वाः ।
थ्वय्कलं ब्वाला क्लबया ग्वसालय् लय्लय्पत्तिकं त्वाःत्वालय् ने.सं. ११०० दँया दुने जूगु यल नेपालभाषा साहित्य संगीत मुंज्याय् सःपाखे न्हाप सिरपाः त्याकादीगु दु । थ्वय्कः बि.सं. २०६३ दँय् मन्त ।