कलाशास्त्रीपिनि धापूकथं हलिमय् ८४ ताजिया कला दु । काष्ठकला व हे ८४ ताजिया कलामध्यय् छगू प्राचीन कला खः। धातुकला व प्रस्तर कला थें हे नेपाः दुने १२०० दँ न्ह्यःनिसें हे काष्ठकलाया उच्चतम विकास जूगु दु धयागु दसि येँ देय्या काष्ठमण्डप खः । थुकथं लिच्छविकालनिसें विकसित जुयावःगु काष्ठकला मल्ल काल थ्यंबलय् द्यः, देगः, सतः, फल्चा, बहाः, दरवार अले उकीदुने छ्यलातःगु झ्याः लुखा, त्वानाःसिँ, थां आदि काष्ठकलाया उत्कृष्ट विकासया दसु खः धायेफु ।
११ गूगुु सदीया इतुंबहाःया त्वानाःसिँ, १२÷१३ सदीया पन्तिया इन्द्रेश्वर महाद्यःया देगः, लिच्छविकालया चाँगुनारायण देगः अथे हे १२÷१३ सदीया यल रुद्रवर्ण महाविहार दुनेया सालभजिया मुद्राया त्वानाःसिँ, पूर्व मध्यकालया काष्ठकलाया विशिष्ट नमूना खः ।
नेपाःया काष्ठकला हलिमया उत्कृष्ट कला खः । ख्वपया न्यातपौ देगः, दतात्रय देगः, ख्वप दतात्रयया म्हय्खा झ्याः, येँ यतखाया देसय्मरु झ्याः, हलिंया ज्वःमदुगु दसु खः । सलंसः दँनिसें चकंगु वातावरणय् धस्वाना च्वंगु देगः, फल्चा, झ्याःया आकर्षण आःतलें भ्याः हे म्ह्व जूगु मदु ।
लिच्छविकालय् निर्माण जूगु काष्ठकार्य अप्वः धयाथें धार्मिक भावनां प्रेरित जूगु दु धयागुया दसि उगु ईया शिखर शैलीया देगः, बहाः, करुणामय लोकेश्वर, उग्रचण्डी भगवतीया मूर्ति खः ।
अथे हे मल्लकालय् देगः, लाय्कू, बहालय् छ्यलातःगु थीथी कथंया कलापूर्ण झ्याः, लुखा, त्वलं, त्वानाःसिँ, थां आदि निर्माण जूगु खनेदु ।