नेवाः संगीत स्यनेगु छगू परम्परा किसली तयाः स्यनेगु खः । थ्व छगू औपचारिक व बन्द स्यनेज्या खः । थज्याःगु स्यनेज्याय् न्हापांखुसी सयेकः वःपिन्त न्हूस्यँमि धाइसा न्हापा सयेकातये धुंकूपिन्त पुलांस्यँमि धाइ । संगीत स्यनेज्या सुथां लायेमा धकाः भाकल यानाः दक्व न्हूस्यँमिपिन्सं नासःद्यःया नामय् सलिखय् जायेक जाकिया द्यःने ग्वःग्वय् छगः व दक्षिणा छगः तयाः म्हतिं छगः किसली फ्यायेमाः ।
आखाछेँय् नासःद्यःयात प्रत्यक्ष न्ह्यःने तयाः स्यनेज्या यायेकथं नासः सालाहइ । अथे सालातःम्ह नासःद्यः भाःपाः नासःधकिनं आखाछेँया ग्वाखं त्वपुयातइ । स्यनेज्या पूमवंतले दक्व स्यँमिपिन्सं फ्यानातःगु किसली व हे ग्वाखनय् स्वनातइ । थ्व नासःधकिंयात न्हियान्हिथं नीलः तिनाः, धुंधुपाँय् मत च्याकाः पुजा याना तयेमाः । स्यनेज्या पूवंकाः नासः लित तयेयंकलकि तिनि किसलीया ज्या क्वचाइ ।
जाकि, ध्यबा व ग्वःगु ग्वय् तयातःगु सलिं । नासःपुजां कलःया लिसें किसली नं तयायंकी । भाकल यानातःगु पुजा वने लिपा लाइगु अबस्थाय् किसली भागियाकाः तयेगु याइ ।
किसली तयाः संगीत प्याखं स्यनेत आखाछेँय् सालातःम्ह नासःद्यःयात स्यनेज्या क्वचायेव विधिपूर्वक नासःदेगलय् लित तयेयंकेगुयात नासः लित तयेगु धाइ ।
नासःपुजाबलय् नासःद्यः (बालाप्वाः) त्वपुइगु विशेष धकिंयात नासःधकिं धाइ । तुयूगु कापःया नासःधकिनय् कवंछ्यं व क्वस्वःगु पलेस्वां दुगु छझ्वः झल्लरया क्वसं कनाच्वंगु स्वंगः मिखा स्वथाय्, उकिया क्वसं स्वपु त्रिशूल, दथुया स्वंगः मिखाक्वसं अभय बाय् मयूर मुद्राया निपा ल्हाः, आदि च्वयातःगु दइ । नासःधकिं नासःपुजाया ज्वलंकथं पुंतय्सं च्वइगु खः । , तयाः संगीत प्याखं स्यनीबलय् आखाछेँय् नासःधकिं हे नासःद्यःया प्रतीक जुइ । स्यनेज्या क्वचालकि नासः लित तयेगु धकाः व नासःधकिं हाकनं नासः देगलय् विधिपूर्वक छायेयंकी ।