स्वनिगलं पिनें पिदंपिं नेपालभाषाया भाषिक अभियन्तापिं मध्ये भाजु कृष्णबहादुर शाही नं छम्ह खः । वय्‌कःया जन्म बि.सं.१९८९ भाद्र २८ गते येँय् डिल्लीबजारय् जूगु खः । लिपा वय्‌कः धरानय् वनाः सिँज्या यानादिल । वय्‌कः धरानय् नेपालभाषाया प्रचार प्रसार यायेगु ज्याया नापं चित्रकला व संगीतया क्षेत्रय् नं सक्रिय जुयादिल । वय्‌कलं धरानय् सरस्वति बाल अनाथ आश्रम चायेकादिल । उकिया सम्बद्र्धनय् न्ह्यचिलादिल । वय्‌कः २०६६ असारय् दिवंगत जुयादिल ।