जुजु जगज्जय मल्ल मैथिलीया नापं नेपालभाषां नं तःपु म्ये चिनावंम्ह येँया जुजु जयप्रकाश मल्लया अबुजु व रानी कुमुदिनी देवीया भाःत खः । थःगु प्रत्येक म्येपतिकं ‘कुमुदिनीदेवी’ पति धकाः थःत परिचित यानाथकूम्ह जुजु जगज्जय मल्ल थः रानी कुमुदिनीदेवी नाप जानाः नेपालभाषां तःपु म्ये चिनावंगु दु ।
थ्वय्कलं थीथी विषययात थियाः म्ये चिनावंगु दु । भक्ति, स्तुति, लाय्कू श्रृंगारिक, औपदेशिक, शोक आदि थ्वय्कःया म्येया विषयवस्तु जूगु दु । जगज्जय मल्लया धाथें कवि व्यक्तित्व वय्कलं चिनाथकूगु श्रृंगारिक म्येय् पिज्वःगु दुसा वय्कःया शोक म्येय् थः काय् राज्यन्द्रप्रकाश मल्ल मत्यवं मृत्यु जूगुया वेदना दु । थ्वय्कःया थीथी विषयया यानाः गुपु म्ये लुयावःगु दु । थ्वय्कःया म्ये सरल, सहज व सुबोध जू ।