नेवाः संस्कृतिइ नसाज्वलं ज्वरे यायेगुलिसें मनू बुसांनिसें सीबलय्तक चिकं मदयेकं मगाः । तू, हाम्वः, ईका, पःका आदि चिकं दुगु पुसा काकाः चिकं पिकायेत नेवाःतय्गु विस्कंगु प्रविधि दु । ईका, पःका, व हाम्वःचिकं थीथी वासः दयेकेत व हाम्वःचिकं मत च्याकेत नं छ्यलीगु खः । न्हापांनिसें नेवाः नसा ज्वरे यायेत तूचिकं हे छ्यलीगु खः । व लिसें मचाबूम्ह मिसा, ह्याउँमचा व मेमेपिन्त नं माःबलय् तूचिकनं बुकेगु नेवाः चलन दु । तू काकाः चिकं पिकायेधुंकाःया खौ नं नेवाः तजिलजिइ मदयेकं मगाः । नेवाःतसें छुं नं अशुद्धिया इलय् खौ भ्याकं म्वः ल्हुयेगुयात तःधंगु शुद्धिकरणकथं नालातःगु दु । खौयात बँुज्याय् व स्वांमाय् साः व पशुपन्छिया नसा दाना दयेकेत नं ज्या काइ । नेवाः समाःज्वलं क्वं दयेकेत नं खौ तयेमाः ।
नेवाः परम्परागत प्रविधिकथं चिकं उत्पादन यायेत दकलय् न्हापा चिकं वइगु तू, हाम्वः, ईका, पःका आदियात हायाः यच्चुके धुनेवं उकियात क्यली । थ्व धूयात मिच्याःगु भुतुलिइ द्यःने द्यछुना तःगु भाजनय् भचाभचा लः हाः यायां पुत्तु पुइकाः बुक्क सी । हाम्वः, ईका पःका आदियात सियाच्वने म्वाः । तूयात नं मसिसे काकातःगु चिकंयात कचिचिकं धाइ । तू सीधुनागु चुंयात पू (चिकं काकेत तयेगु छताजि म्हिचा) दुने तयाः निगः गं (चिकं काकेगु प्यकुंलाःगु तःहाकः तग्वःगु छज्वः सिँ) दथुइ स्वत्ताक काकी । पू कातकि दुनेया चुं तिसिनाः हाइगु मगमग नस्वाःगु चिकं गालय् दुगु थलय् फया तइ । थ्व हे चिकं माःकथं दानाः थलबल बाय् पाकेतय् तयाः मिइ । चुं छक्वः जक काकां स्वयंक चिकं वइ मखु । अथे जूगुलिं पू दुनेया खौ (चिकं तिसिना काये धुनागु तू÷हाम्वः आदि) तछ्यानाः हाकनं पू दुने तयाः गं दथुइ काकी । निक्वःतक सुच्चुक चिकं काकेधुंकूगु खौ जक मेमेगु ज्याय् छ्यली ।