किपूया ध्वाखासि त्वालय्‌ ने.सं. ११०५ चिल्लाथ्वः एकादसि, आइतबारखुन्हु दिपक महर्जन व रमाकुमारी महर्जनया कोखं संगीतकःमि दीपा महर्जनया जन्म जूगु खः । थौंकन्हय्‌ रत्नराज्यलक्ष्मी क्याम्पसय्‌ प्राध्यापन यानादीम्ह वय्‌कः नेवाः संगीतख्यलय्‌ लोकंह्वाःम्ह म्येहालामि खः । वय्‌कलं २०६४ सालय्‌ रेडियो नेपालय्‌ भ्वाइस टेस्ट पास यानादीगु खः । वय्‌कलं तःपु हे ज्वःम्ये, याकः म्ये, पुचः म्येय्‌ थःगु सः बियादीगु दुसा सरप्राइज एल्बम नं पिदनेधुंकूगु दु । वय्‌कः इन्द्रेणी सांस्कृतिक समाजया ज्यासना पुचःया दुजः खः । वय्‌कः नेपाल विद्याभूषण ‘ख’ पदक, मोतिलानि सिरपाः, अले पेज थ्री अवार्डय्‌ ज्वःम्ये व याकःम्येया निंतिं सिरपाः त्याकादी धुंकूगु दु ।