सन् १९६२ सेप्टेम्बर ८ कुन्हु यल, मंगः बजारय् बाः प्रेमलाल राजकर्णिकार व मां खेतकुमारी राजकर्णिकारया क्वखं भाजु धर्मराज राजकर्णिकारया जन्म जूगु खः । भाजु धर्मराज राजकर्णिकार नेपालभाषा साहित्यया हाइकु ख्यलय् झिंनिदँ झिंस्वदँ निसें मदिक्क हाइकु च्वयाः वैच्वनादीम्ह हाइजिन खः । समसामयिक बिषययात कयाः वय्‌कलं हाइकु च्वयादी । वय्‌कःया च्वसा नेपालभाषाया लिसेलिसें खस् नेपाली नं उलि हे प्रखर रुपं न्ह्यानाच्वंगु दु । वय्‌कःया हाइकुइ प्रेम, व्यंग्य, आक्रोसया सः लिसेलिसें पारिवारीक विघटन, नेवाः समाजया चित्रण पिलुयाच्वंगु झीसं खंकेफुसा नेपालभाषाया हाइकुइ यौनयात दुथ्याकेगु ज्या वय्‌कः पाखें जूगु समीक्षकपिनि धापू दु । वय्‌कःया पिदंगु हाइकु सफूया नां बुंगाःचा (ने.सं.११३९) खः ।