लक्ष्मी गिरी

लक्ष्मी गिरी

नेपाःया नांजाःम्ह कलाकार लक्ष्मी गिरीया जन्म येँया जयबागेश्वरीइ ने.सं. १०७४ प्वहेलागाः चौथि, सनिबारखुन्हु जूगु खः । वय्‌कःया अबुया नां मुक्तिनाथ पौडेल व मांया नां उजेली अधिकारी खः । अनया गौशालाय्‌ च्वंगु शारदा निम्न माध्यमिक विद्यालय नांयागु ब्वनेकुथिइ ब्वनाच्वंगु इलय्‌ हे अनया प्याखं हुलाः थःगु कला यात्रा न्ह्याकादीगु खः । वय्‌कलं वि.सं. २०४५ पाखे संकिपाय्‌ अभिनयया यात्रा न्ह्याकादिल । उगु हे दँय्‌ ‘भुमरी’, ‘फेरि भेटौंला’, ‘कन्यादान’ व ‘माया’ नांयागु संकिपाय्‌ म्हितादीगु खः । वय्‌कलं खस नेपाली भाय्‌या जक मखसे नेपालभाषा, मैथिली, भोजपुरी लिसेंया भाय्‌या संकिपाय्‌ म्हितादीगु दु । ‘यांमिखा’, ‘काय्‌मचा ल्याय्‌म्ह’, ‘कुलंगार’, ‘पटाचारा’, ‘त्याग’, ‘कीर्तिपुरः अ लिजेन्ड अफ कीर्तिलक्ष्मी’ लिसेंया आपालं नेपालभाषाया संकिपाय्‌ म्हितादीगु दुसा ‘सास ननद भौजाइ’, ‘सास ननद नौकरानी’ लिसेंया भोजपुरी भाय्‌या संकिपा वय्‌कःया न्ह्यथनेबहःगु संकिपा खः । अथे हे वय्‌कःयात खस भाय्‌या लोकंह्वाःगु टेलिसिरियल ‘तीतो सत्य’ टेलिसिरियलपाखे नं यक्वसिनं म्हस्यू । आपालं संघसंस्थालिसे स्वानादीम्ह लक्ष्मी गिरी नेपाल चलचित्र कलाकार संघया उपाध्यक्ष नं जुयादीधुंकूम्ह खः । ‘झोला’ नांयागु संकिपाय्‌ सशक्त अभिनय यानादीगुलिं वय्‌कःयात २०७० दँया राष्ट्रिय चलचित्र पुरस्कार समारोहय्‌ सम्माननीय राष्ट्रपति डा. रामवरण यादवपाखें सर्वोत्कृष्ट सहअभिनेत्रीया सिरपाः अले नेपाल सरकारया चलचित्र विकास बोर्डं वि.सं २०७९या राष्ट्रिय चलचित्र पुरस्कारय्‌ दीर्घकालिन साधना सम्मानपाखें सम्मानित याःगु दु ।

लक्ष्मीकुमार महर्जन

संकिपा, टेलिसंकिपा, दबू प्याखं, म्यूजिक भिडियोया कलाकार लक्ष्मीकुमार महर्जन ने.सं. १०९३ कछलागाः दसमि, बसुबारखुन्हु अबु गुणसिं महर्जन व मां पुनुमाया महर्जनया कोखं किपुलिइ जन्म जूम्ह खः ।
ने.सं. ११११ दँय्‌ सँझ्याः साहित्य पाःलाःया ‘व हे मुलु सुका’ नाटक म्हिताः कलाख्यलय्‌ पलाः न्ह्याकादीम्ह वय्‌कलं ने.सं. १११६ दँनिसें नाटक निर्देशनय्‌ नं पलाः न्ह्याकादीगु खः ।
वय्‌कलं न्हूगु पलाः, न्ह्यलं चायेकि, विद्रोह, रङ्ग नम्बर आदि नाटकया निर्देशन व अभिनय यानादीगु दु । अथेहे वय्‌कलं छधाः प्याखं ‘लिथु’, टेलिप्याखं ‘बाखंचा’, संकिपा ‘सेरीव बन्जाः’ लगायतय्‌ थःगु अभिनय कला न्ह्यब्वया दीगु दु ।
‘व मनू सु मनू’पाखें मलेशियाय्‌ जूगु सिल्भर इन्टरनेशनल म्यूजिक अवार्डय्‌ बेस्ट मोडलया सिरपाः त्याकादीम्ह वय्‌कःया अभिनय दुगु ‘उच्च शिक्षा’ व ‘म्युजियम’ चिहाःसंकिपां नं थीथी सिरपाः त्याकूगु दु ।

लुजः सिंह

नेपालभाषा संकिपाख्यलय्‌ सिनेमाटोग्राफर जुयाः ज्वःमदुगु योगदान बियाच्वनादीम्ह खः भाजु लुजः सिंह । सन् १९७६ मार्च २५ तारीख खुन्हु जन्म जुयादीम्ह भाजु लुजः सिंह छम्ह फोटोग्राफर, सिनेमाटोग्राफर, निर्देशक व भिजुअल सम्पादक जुयादी । अमृत साइन्स क्याम्पसं प्रवीणता प्रमाण पत्र तगिं व पब्लिक युथ क्याम्पसं वाणिज्य शास्त्रय्‌ स्नातक तगिंतक ब्वनादीम्ह भाजु लुजः सिंह “नेपालभाषा पत्रिका”या संस्थापक फत्ते बहादुर सिंहया छय्‌ जुयादी । नेवाः संगीत व संकिपाख्यलय्‌ दिपा मकासे पलाः न्ह्याकाच्वनादीम्ह लुजः सिंहं सन् २०११य्‌ छ हे मदुसा, २०१६य्‌ स्वयेनगु व २०२१य्‌ कर्म नांयागु नेवाः संकिपाया किपालुमि जुयाः ज्या यानादिल । आपालं आपाः म्युजिक भिडियोया किपालुमिया ज्या यानादी धुंकूम्ह लजः सिंहंया छन्त छु जुल, ज्वरा ज्वरा पर्सि, हेरामाया मैंचा गन वनेगु, जित जन्म बियाः, कान्हे मैंचा लगायत म्युजिक भिडियो लोकंह्वाः । थ्यंमथ्यं न्येय्‌पुं मल्याक म्येया म्युजिक भिडियोय्‌ किपालुमि, निर्देशक बाय्‌ सम्पादक जुयाः ज्या यानादीम्ह भाजु सिंहं यक्व खस् नेपाली भाय्‌या संकिपा व म्युजिक भिडियोया सिनेमाटोग्राफिया ज्या नं यानादीगु दु । “कथा काठमाण्डौं” नांयागु खस नेपाली संकिपाया लुजः सिंह किपालुमि खःसा वय्‌कलं “नभ्य” नांयागु खस् नेपाली भाय्‌या संकिपाया निर्देशन नं यानादिल । नेवाः फिल्म सोसाइटीया नायः जुयाःदी धुंकूम्ह भाजु लुजः सिंहं “लेट अस लिभ टुगेदर”, “बिस्काः जात्रा”, “इम्प्रेशन अफ लुम्बिनि” लगायतया आपालं डकुमेण्ट्रि दयेकादीगु दु । लुजः सिंहं “इम्प्रेशन अफ लुम्बिनि”पाखें नेपाल अन्तर्राष्ट्रिय चलचित्र महोत्सव २०१२ य्‌ नेपाली पानोरामा सिरपा त्याकेत ताःलागु खः । अथेहेतुं वय्‌कःया “विद्रोही नारी” विश्व विख्यात एकेडेमि अवार्डय्‌ नं ब्वति काःगु खः ।