हरिमान दिवाकर

हरिमान दिवाकर

नेवाः कलाकारिता ख्यःया लोकंह्वाःम्ह कलाकारकथं हरिमान दिवाकर न्ह्यःने लाः । वय्‌कःयात यक्वसिनं “जोस पिहांवइ” धकाः न्ववाइगु खँग्वलं म्हस्यू । ९०० इपिसोड सिबें अप्वः हे क्यनेज्या जुइधुंकूगु नेपालभाषाया टेलिसिरियल ‘ख्वताबजि’या छम्ह पात्रं न्ववाइगु थ्व खँग्वः हे थौं वय्‌कःया म्हसीका जुयाब्यूगु दु । अबु कृष्णबहादुर दिवाकर व मां साइली दिवाकरया कोखं ने.सं. १०९० कौलागाः द्वादसि, सोमबारखुन्हु जन्म जुयादीम्ह वय्‌कलं दकलय्‌ न्हापां ‘अस्पतालय्‌ बूम्ह मचा’ नांयागु प्याखनय्‌ अभिनय यानादीगु खः । वि.सं. २०४५/४६ सालय्‌ जन–आन्दोलन न्ह्यानाच्वंगु इलय्‌ थःगु सक्रिय पलाः न्ह्याकादीम्ह दिवाकरजुं अबाय्‌ती ख्वपय्‌ व येँय्‌ थीथी नाटकय्‌ अभिनय यानादीगु खः । उगु इलय्‌ वय्‌कलं म्हितादीगु ‘शहिद’, ‘बिडम्बना’ लिसेंया नाटकत तसकं बय्‌बय्‌ जुल । येँय्‌ ‘बिडम्वना’ नांयागु नाटक क्यनाच्वंगु इलय्‌ आन्दोलन चर्के जूबलय्‌ बिस्युं वनाः लैनचौरय्‌ सुलेमाःगु खँ कनादीम्ह हरिमानजुं ‘विवश’, ‘शहिद’, ‘अर्थ न बर्थ’, ‘जनता जनार्दन’, ‘आयाँ क्वात’, ‘साइड इफेक्ट’या लिसें नीन्यागुलिं मल्याक नाटक व दबू प्याखनय्‌ अभिनय याना दीधुंकूगु दु । ‘आयाँ क्वात” ला पलिस्था ख्यालः कासाय्‌ सिरपाः त्याकेत तकं ताःलाःगु खः । वय्‌कलं ‘झ्वक मनीम्ह’, ‘न्हिसुतु’, ‘चकना’, ‘मि. फन्टुस’, ‘ख्वताबजि’, ‘स्वयेगु मखु ला’, ‘धाःसा धाल धाइ’, ‘ड्याड एण्ड सन्स’, ‘फय्‌गं’ नापं याना छगू दर्जनं मल्याक नेवाः सिरियलय्‌ नं म्हिता दीधुंकल । व लिसें ‘पानबती’, ‘अंश’, ‘जिपिं बदमास मखु’, ‘याकः म्ह्याय्‌’, ‘माया’, ‘तारेमाम’, ‘बांलाः मय्‌जु’, ‘पटाचारा’, ‘कृषा गौतमी’, ‘मुद्दा’, ‘तानांज्यः’ लिसेंया स्वंगू दर्जनं मल्याक नेवाः संकिपाया थीथी भूमिकाय्‌ म्हिता दीधुंकूगु दु । वय्‌कलं खस नेपाली भाय्‌या छुं छुं नाटक व टेलिफिल्मय्‌ नं अभिनय यानादीगु दु । उकी मध्यय्‌ ‘मदनबहादुर हरिबहादुर’ व ‘हिजो आजका कुरा’ थन न्ह्यथने बहःजू । वय्‌कलं भक्तपुर एफ.एम.य्‌ “कुचुकुचुु” नांयागु ज्याझ्वः नं न्ह्याकादी धुंकूगु दु । थथे आपालं नाटक, टेलिफिल्म, संकिपाय्‌ म्हितादी धुंकूम्ह हरिमान दिवाकरयात नेवाः जागरण मञ्च अन्तर्गतया संकिपा समितिपाखें ने.सं. ११३२ या लोकंह्वाःम्ह कलाकारकथं हंगुया नापनापं आपालं संघसंस्थांं थीथी सिरपाः व सम्मानपाखें छायेप्यूगु दु ।

हरिवंश आचार्य

कलाकःमि हरिवंश आचार्यया जन्म बिसं २०१४ साल कार्तिक १४ गते जूगु खः । वय्‌कःया अबुया नां होमञ्जय आचार्य व मांया नां गणेशकुमारी आचार्य खः । प्याखंम्वः, म्ये हालामि, च्वमि व निर्देशककथं लोकंह्वाःम्ह कलाकःमि हरिवंशं आचार्यं बिसं २०३८ सालं नेपाल राष्ट्र बैंकया रजत वर्ष पूवंगु लसता ज्याझ्वःया निंतिं मदनकृष्ण श्रेष्ठ लिसे जानाः “बैंकेश्वर” नांया ख्यालः ह्यब्वःगु खः । अनंनिसें मदनकृष्ण श्रेष्ठ व हरिवंश आचार्य नापंनापं पलाः न्ह्याकुगु खः । लिपा थुपिं निम्हेसिगु जोडि मह जोडिया नामं तसकं लोकंह्वाःत । कलाकःमि मदनकृष्ण श्रेष्ठलिसे जानाः भाजु हरिवंश आचार्यं नेवाः संगीत व कलाख्यलय्‌ नं यक्व योगदान यानादीगु दु । वय्‌कःया किसि न्याइम्ह मदनमान व किपालुं लिनाच्वंम्ह मनू नांयागु निगु नाटक दुसा नेवाः संकिपा “सिलु” व “राजमति” नं म्हितादिल । मह जोडिं यक्व खस नेपाली भाय्‌या ख्यालि, प्रहसन, टेलिफिल्म व संकिपा म्हितेगु जक मखु गुलिखे थ्व जोडिं च्वयेगु व निर्देशन नं याःगु दु । टेलिफिल्मय्‌ १५ गते, रात, लक्ष्मी, चिरञ्जीवि, वनपाले लगायत यक्व टेलिफिल्म तसकं लोकंह्वाःगु खः । अथे हे के घर के डेरा, लोभीपापी, फिलिम, बलिदान, शत्रु गते, महापुरुष आदि भाजु हरिवंश आचार्यया लोकंह्वाःगु खस नेपाली भाय्‌या संकिपा खः । वय्‌कलं तँ त सार्‍है बिग्रिस नि बद्रि, महाजात्रा आदि संकिपाय्‌ मदनकृष्ण श्रेष्ठ मदयेक याकःचां नं म्हितादीगु दु । संसारया आपालं आपा देशय्‌ थःगु कला न्ह्यब्वये धुंकुम्ह हरिवशं आचार्यं “महापुरुष” संकिपाया निंतिं २०७८ सालया राष्ट्रिय चलचित्र पुरस्कार या नापनापं लकि फिल्मी अवार्ड त्याकादीगु दु । राज्यस्तरं बिइगु थीथी विभुषणपाखें नं विभुषित जूइधुंकूम्ह हरिवंश आचार्य नेपाःया छम्ह ज्वःमदुम्ह कलाकःमि खः ।

हिसिला महर्जन

नेपालभाषाया निगूगु संकिपा “राजमति” या मू नकिं जुयाः संकिपाख्यलय्‌ पिलूवःम्ह हिसिला महर्जनया वास्तविक नां हिरा शोभा महर्जन खः । अबु हिरा बहादुर महर्जन व मां नानी छोरी महर्जनया म्ह्याय्‌ हिराशोभा महर्जनं शंकर देव क्याम्पसय्‌ एम कम तक ब्वनादीगु दु । व हे क्याम्पसया नेवाः साँस्कृतिक पुचः “चकना साहित्य पाला”पाखें इलय्‌ ब्यलय्‌ ग्वसाः ग्वइगु व मेगु कलेजं ग्वसाः ग्वइगुृ साहित्य व सांस्कृतिक ज्याझ्वलय्‌ हिरा शोभां ब्वति कयादिल । मचांनिसें हुलाप्याखं ख्यलय्‌ नुगः क्वसाःम्ह हिरा शोभां चकना साहित्य पालापाखें न्ह्यब्वःगु छपु “पिब्वयेमाःगु यथार्थ” नाटकय्‌ म्हिता थःगु अभिनय यात्रा शुरु यानादीगु खः । महेशमान लँजुवां च्वयादीगु व रमेशकाजी स्थापितं निर्देशन यानादीगु उगु नाटकय्‌ हिरा शोभां म्हितुगु पात्रया नां हिसिला खः । थ्व नां हे अनंलिपा वय्‌कःयागु परिचय जुया वन । “राजमति” धुंकाः मय्‌जु हिसिलां “चाण्डालिका” नांयागु बुद्धकालिन बाखंया लिधंसाय्‌ दयेकुगु संकिपा व नेपाःया ऐतिहासिक परिवेश न्ह्यब्वयातःगु खस नेपाली भाय्‌या संकिपा “कीर्तिपुर—द लिजेण्ड अफ किर्तिलक्ष्मी” अले “त्याग” नांयागु संकिपाय्‌ मू भुमिका म्हितादिलसा “तुयुमति” नांयागु संकिपाय्‌ पाहाँकथं अभिनय यानादिल । आपालं म्युजिक भिडियो नं म्हितादीम्ह हिसिलाजुया लिक्क वयाः जित धाल वं, यःसां मयः पह यायेमते, जयेगु जुल, जिगु देय्‌ जित यः लगायत दर्जनौं लोकंह्वाःगु म्युजिक भिडियो खः । चलचित्र विकास बोर्ढया ग्वसालय्‌ जूगु न्हापांगु राष्ट्रिय चलचित्र महोत्सवय्‌ “राजमति” संकिपाया निंतिं मय्‌जु हिसिलायात कृटिक्स अवार्ड विधाय्‌ बेस्ट एक्ट्रेसया सिरपा बिउगु खःसा श्रीगोपाल सिरपा, नेवाः सुपरस्टार सिरपा लगायत आपालं सिरपा व सम्मान पाखें छायेपियातःगु दु ।

हृदय प्रसाद मिश्र

ने.सं. १०८२ गुंलाथ्वः चौथि, सनिबारखुन्हु येँया प्याफःया द्वकाधः त्वालय्‌ जन्म जूम्ह वय्‌कःया अबुया नां श्याम प्रसाद मिश्र व मांया नां जानकी मिश्र खः । वय्‌कः नेवाःभाय व खस नेपाली भाय्‌या ख्यःया ख्यालिन्हिलाय्‌ पलाः न्ह्याका च्वनादीम्ह कलाकारया लिसें ख्यालिख्यलय्‌ मदिक्क च्वसा नं न्ह्याका च्वनादीगु दु । कलाकारिता ख्यलय्‌ अभिनयपाखें पलाः क्वातुकूम्ह हृदय प्रसाद मिश्रं कलाख्यलय्‌ दकलय्‌ न्हापां ने.सं. १०९८ दँय्‌ दबुलिइ ख्यालः म्हिताः पलाः तयादीगु खः । ख्यालि च्वसापाखे ने.सं. ११०१ दँय्‌ ‘सितु’ पत्रिकाय्‌ ‘द्यः पुजा लाकि मनू पुजा’ पिदंगु खः । वय्‌कः इमेज च्यानलया टेलिसिरियल ‘ख्वताबजि’या परिकल्पनाकार व संस्थापकया नापनापं च्वमि व अभिनेता नं खः । ने.सं. ११०१ दँनिसें स्टाय्‌ण्ड अप कमेडिइ ख्यालि–न्हिला न्ह्यब्वया वया च्वनादीम्ह वय्‌कलं आपालं नेवाः संकिपा, सिरियल व प्याखं म्हितूगु खः । वय्‌कलं टेलिसिरियलय्‌ डाय्‌ड सन्, स्वयेगु मखुला लिसें खस् नेपाली भाय्‌या टेलिसिरियलय्‌ नं म्हितादीगु दु । वय्‌कःया नेवाः भाय्‌या संकिपा ‘सुभाय्‌’या श्राद्धया लु तसकं लोकंह्वाः । नेपालभाषा संकिपा संघया नायःया नापनापं ख्यालिगुलु गुथिया छ्याञ्जे, सामुदायिक सेवा मञ्चया मूछ्याञ्जे, मिथिला पत्रिका सम्पादक मण्डलया दुजः जुयाः ज्या यानादीम्ह खः । विराट नेपालभाषा साहित्य सम्मेलनया धेंधेंबल्लाखय्‌ तःक्वः सिरपाः त्याकेधुंकूम्ह वय्‌कलं ठाकुरलाल सिरपाः, वीरेन्द्र ऐश्वर्य पदक, कुमारी स्वर्ण पदक २०५९, तितोसत्य ५०० भागय्‌ उत्कृष्ट कलाकारया अवार्ड, पेजथ्री पिपुल्स च्वइस अवार्ड २०७० बेस्ट कमेडि एक्टर अवार्ड त्याकेधुंकूगु दु ।