ने.सं. ११०४ दँय्‌ नेपालय्‌ नेपाल टेलिभिजन नीस्वने धुंकाः ने.सं.१११६ दँय्‌ टेलिभिजनया पर्दाय्‌ न्हापांगु नेपालभाषाया टेलि संकिपा बाह्र बजे क्यनेज्या जुल । ने.स. १११८ दँय्‌ सांग्रीला च्यानलपाखें हावालासा नांया न्हापांगु नेपालभाषाया ज्याझ्वः वल । थुगु हे ज्याझ्वलय्‌ ‘लुमंका च्वना छन्त’ नांया नेपालभाषाया न्हापांगु म्यूजिक भिडियो नं क्यनेज्या जुल । ने.सं.१११६ दँय्‌ नेपाल टेलिभिजनया धकिनय्‌ ‘बाह्र बजे’ नांया टेलि संकिपा प्रदर्शन जुल । थुगु टेलि संकिपाया च्वमि व निर्देशक रामशेखर नकःमि खः । कलाकार आशाकाजि थकू, कृष्ण नापित, मदनकृण श्रेष्ठ व हरिवंश आचार्य खः ।