यल, क्वालखुया भाजु पुरुषोत्तमलाल व मय्जु पूर्णलक्ष्मीया काय्मचा उत्तमलाल सन् १९४३ स बूगु खः । वय्कः भारत, कलकत्ताया पिसिडेन्सि कलेजपाखें सन् १९५५ स स्नातकोत्तर क्वचायेका वःम्ह खः । लिपा सन् १९६२ स वेलायतया डुरहम विश्वविद्यालयपाखें विद्यावारिधि उपाधि कयादीगु खः । जैविक प्रविधि व मलिकुलर बायोलोजि अले जेनेटिक इन्जिनियरिङ्ग ख्यलय् थ्वय्कः विश्वस्तरय् नांजाःम्ह विज्ञ खः । आपालं अन्तरराष्ट्रिय संघ संस्थापाखें थ्वय्कःयात तःगूकथं हनातःगु दु ।

येँ, वँतुया भाजु खड्गमान व मय्जु प्राणमायाया काय्भाजु उपेन्द्रमान सन १९३४ स बूगु खः । वय्कः भारतया पटना विश्वविद्यालयपाखें भूगोल बिषयस् सन् १९५१ स स्नातकोत्तर क्वचायेका दीम्ह खः । नेपालय् भूगोल बिषयया अध्ययन व अध्यापनया ख्यलय् थ्वय्कःया मूवंगु ल्हाः दु ।

येँ, गणबहाःया भाजु गोविन्दबहादुर व मय्जु लक्ष्मी देवीया काय्भाजु उमेशबहादुर सन १९४३ स बूगु खः । वय्कः भारतया रुडकिपाखें इन्जिनियरिङ्ग शिक्षा क्वचायेका वःम्ह खः । लिपा वेलायतया एडिन्वर्ग विश्वविद्यालयपाखें सन् १९७६ स एमफिल उपाधि कयादिल । थ्वयकः नेपाःया शहरी बिकासया ख्यलय् योजना दयेकेगुली आपालं भूमिका दुम्ह विज्ञ खः ।

भारतय् भौतिकशास्त्र विधाय् विद्यावारिधि यानावःम्ह कमलकृष्ण नेपालय् आणविक ख्यःया शिक्षा प्रसार प्रचार अले अनुसन्धानया ज्या न्ह्याकेगुली छम्ह न्ह्यलुवाः खः । नेपाल राष्ट्रिय विज्ञान तथा प्रविधि प्रतिष्ठानया संस्थापक सचिव जुयादी धुंकूम्ह थ्वय्कःया कुतलय् नेपाल आणविक समाज नीस्वनेगु ज्या जूगु खः । छगू इलय् वय्कः थः हे थुगु समाजया नायः जुयादिल ।

अबु सूर्यमान वैद्य व मां रत्नमाया वैद्यया कोखं ने.सं. १०३४ गुंलाथ्वः एकादसिखुन्हु जन्म जूम्ह यल लगंख्यःया करुणाकर वैद्य नेपाःया परम्परागत प्रविधि व शिल्प सम्बन्धय् दुग्यंगु अध्ययन यानावंम्ह विज्ञ खः । थ्वय्कः सेरामिक्स विशेषज्ञ जक मखसे नांजाःम्ह लोकसाहित्यविद् नं खः । थ्वय्कलं थःगु हे कुतलं परम्परागत प्रविधि, ज्ञान आदिया सम्बन्धय् अतिकं मूवंगु संकलन पिथना दीगु दु ।

भाजु कोमलबहादुरया काय्मचा कल्याणबहादुरया जन्म सन् १९४४ स येँय् जूगु खः । वय्कः भारत बम्बईया प्राविधिक प्रतिष्ठानपाखें इन्जिनियरिङ्ग विधाय् सन १९६८ स स्नातक क्वचायेका वःगु खः । लिपा वैंककया एसियाली प्राविधिक प्रतिष्ठानपाखें स्नातकोत्तर उपाधि कायेत वय्कः सफल जुल । मेकानिकल इन्जिनियरिङ्ग विधाय् नेपाःया छम्ह न्ह्यलुवाःकथं नांजाःम्ह थ्वयकः चिनि उद्योग व घरेलु उद्योगया ख्यलय् तःदँतक सेवा यानादिल ।

येँया भाजु डम्बरबहादुर व मय्जु कृष्णकुमारीया काय्मचा किशोरकुमार सन् १९४४ स बूगु खः । भारतया मद्रासं दन्त चिकित्साया ख्यलय् स्नातक जुयावःम्ह थ्वय्कलं लिपा १९७७ स वेलायतं एफआरसीएस उपाधि कयादिल । अथे हे आयरलैण्डया विश्वविद्यालयपाखें थुगु हे बिषय कयाः उच्च शिक्षा ब्वनादिल । वय्कः विशेषतः म्हुतु व ख्वाःया अत्याधुनिक विधिया शल्यचिकित्सा प्रविधिया न्हापांम्ह मनू खः ।

असं, येँया भाजु आशारत्न व मय्जु लक्ष्मीमायाया काय्मचा कुलरत्न सन् १९१८ स बूगु खः । भारतया पटना विश्वविद्यालयपाखें सन् १९३७ स स्नातक यानावःम्ह थ्वय्कः नेपाःया न्हापांम्ह इन्जिनीयर खः । स्वनिगलं पिनेवनेगु लँपु त्रिभुवन राजपथ दयेकेगु ज्याय् नेपाःयापाखें मूप्राविधिक कथं वय्कलं ज्या यानादीगु खः । प्रमुख इन्जिनीयर जुयाः सार्वजनिक निर्माण विभागया सन् १९५१ निसें १९५७ तक भाला कयादीगु खः । लिपा येँया न्हूसतकनिसें आपालं मूमू सतकत दयेकेगु ज्याय् भूमिका म्हितादिल । सेवाकालय् वेलायतया लण्डन वनाः आर्किटेक्चरल एशोसियसन स्कुल अफ आर्किटेक्चरपाखें स्नातकोस्तर तक ब्वनावल । वय्कः त्रिभुवन विश्वविद्यालय, इन्जिनियरिङ्ग अध्ययन संस्थानया न्हापांम्ह डिन नं खः । वय्कलं भाजु रामकृष्ण शर्मानाप जानाः राजमार्गया डिजाइन व निर्माण सम्बन्धय् निर्देशिका सपूm पिकया दिल ।

महाराजगञ्ज, येँया भाजु जगतनारायण व तुलसीमायाया काय्मचा कृष्ण मानन्धर सन १९४६ स बूम्ह खः । त्रिभुवन विश्वविद्यालयपाखें सन् १९६९ स्नातकोत्तर क्वचायेका दीम्ह थ्वय्कलं सन् वेलायतया साउथअम्पटन विश्वविद्यालयपाखें विद्युतीय रसायनशास्त्र विधाय् विद्यावारिधि उपाधि कयादीगु खः । थुगु बिषयस नेपाःया न्हापांम्ह ज्ञाता खः, थ्वय्कः तःदँतक त्रिविवि अन्तर्गत प्राध्यापन सेवाय् ज्या यानादिल ।

येँ, प्याफः त्वाःया भाजु नीलपराक्रम व मय्जु देवकुमारीया काय्मचा कृष्णगोपाल सन् १९४० स बूगु खः । भारतया गोरखपुरं स्नातकोस्तर उतीर्ण जुयावःम्ह वय्कः लिपा जर्मनीया हाय्मवर्गपाखें जलीयकृषि विधाय् विद्यावारिधि पूवंकावःगु खः । नेपालय् ब्यवस्थित व वैज्ञानिक प्रविधिकथं मत्स्य पालनयात न्ह्याकेगुली न्ह्यलुवाः खः, थ्वयकः । थ्वय्कलं नेपाःदुने दइपिं न्याया प्रकारया धलःसफू अले मत्स्य पालन सम्बन्धय् बिस्कं कृति पिथनादीगु दु ।