सन १९४४ स जनकपुरय् जन्म जूम्ह जनकलाल भाजु सोभियत संघं सन १९६८ स जलविद्युत बिषयस स्नातक अले सन १९७८ स विद्यावारिधि क्वचायेकादीम्ह खः । विशेष यानाः जलश्रोतया वहु उपयोग प्रविधिया ज्ञाता थ्वय्कः नेपाःया जलश्रोतयात कयाः दुग्यंक अध्ययन यानादीम्ह छम्ह विशेषज्ञ खः ।
येँ, वँतुया भाजु खड्गमान मल्लया म्ह्याय् जयश्री वेलायत सिफिल्ड विश्वविद्यालयपाखें भौतिकशास्त्र विधाय् उच्च शिक्षा हासिल यानाःझाःम्ह ब्यक्ति खः । नेपालय् भौतिकशास्त्र विज्ञानया ख्यलय् आधारभूत ज्या यानावंम्ह थुम्ह मय्जुया कुतलय् नेपालय् दक्कलय् न्हापां भौतिकशास्त्र अध्ययनया प्रयोगशाला स्वनेगु ज्या जूगु खः ।
भाजु लक्ष्मीनारायण व मय्जु मोहनमायाया काय्मचा जुजुभाइ येँ, डिल्लीबजार त्वालय् सन् १९४४ स बूम्ह खः । संयुक्तराज्य अमेरिकाया वासिङ्गटन विश्वविद्यालयपाखें सन् १९७२ वनस्पति विज्ञानय् स्नातकोत्तर यानवःम्ह थ्वयकलं लिपा सन् १९८६ स संयुक्तराज्य अमेरिकाया इलिनोइ विश्वविद्यालयपाखें बूबःया बालिइ खनेदइगु बिषेश कथंया ल्वय्या सम्बन्धय् विद्यावारिधि उपाधि कयादीगु खः । वनस्पति शास्त्रया वय्कः नेपाःया नांदंम्ह वैज्ञानिक खः ।
जलविद्युत शक्तिया वारे ज्ञाता अले नेपाःया थीथी जलविद्युतीय आयोजनायात न्ह्याकेगुली नेतृत्वदायी भूमिका म्हितावःम्ह ब्यक्ति डम्बरबहादुर नेपालीया जन्म जगाति, ख्वपय् अबु रत्नलाल श्रेष्ठ व मां सानुमाया श्रेष्ठया कोखं ने.सं. १०७१ दिल्लागाः दसमि, सनिबारखुन्हु जूगु खः । सन् १९८७ स संयुक्तराज्य अमेरिकापाखें विद्यावारिधि हासिल यानावःम्ह थ्वय्कलं नांदंगु चिलिमे जलविद्युत परियोजनाय् मू भूमिका म्हितादीगु खः ।
वय्कः काठमाडौं विश्वविद्यालय, इन्जिनीयरिङ्ग कवःया डीन व विद्युत प्राधिकरणया उप–निर्देशक कथं ज्या याये धुंकूम्ह खः ।
येँ, महाबू त्वालय् सन् १९३७ स बूम्ह तीर्थबहादुर सन् १९६२ स भारतया अलिगढ विश्वविद्यालयपाखें वनस्पति शास्त्रय् स्नातकोत्तर क्वचायेका दीम्ह खः । लिपा फ्रान्सया ग्रेनोवल विश्वविद्यालयपाखे विधावारिधि उपाधि कयादिल । वय्कः नेपाःया जैविक भूगोल व वनस्पतिया सम्बन्धय् विस्तृत शोध यानादीम्ह विज्ञ खः । वय्कलं हिमाली क्षेत्रया वातावरणीय स्थिति, वनस्पति व अरुण तथा वरुण उपत्यकाया स्वां–सिमाया बारे विशेष अध्ययन यानादीगु दु ।
ख्युंलँ, थाय्मदु, येँया भाजु रत्नमानया काय्भाजु तीर्थमान सन् १९४८ स बूगु खः । संयुक्तराज्य अमेरिका, मिचिगन राज्य विश्वविद्यालयपाखें स्नातकोत्तर अले सन् १९८९ स संयुक्तराज अमेरिकाया फ्लोरिडा विश्वविद्यालयपाखें विद्यावारिधि उपाधि कयादीम्ह थ्वय्कः वन्यजन्तु ब्यवस्थापन सम्बन्धय् विज्ञ खः । नेपालय् जक दइपिं घडियाल जातया गोहीया कृतिम प्रजननया ज्याय् थ्वय्कःया आपालं ल्हाः दु ।
बागलुङ्गया भाजु पशुपति श्रेष्ठ व मय्जु चन्द्रकुमारीया काय्मचा तेजकुमार सन् १९४२ स बूगु खः । सन् १९७६ स त्रिभुवन विश्वविद्यालयपाखें विद्यावारिधि उपाधि कयादिल । वन्यजीवतय् ब्यवहार सम्बन्धय् विशेष शोध यानादीम्ह थ्वय्कः नेपालय् दुपिं डल्फिनतय् सम्बन्धय् दुग्यंक अध्ययन यानावयाच्वंम्ह खः । वय्कलं नेपालय् वन्यजन्तु समाज, झङ्गःपंक्षी अवलोकन क्लब थुज्वःगु संस्थाया संस्थापकया नापनापं अन्तरराष्ट्रिय स्तरया आपालं मान, सम्मान व पदक नं कयातःगु दु ।
येँ, केलत्वाःया भाजु रत्न वीर सिंह व मय्जु हीरादेवीया काय्भाजु त्रिरत्न वीर सन १९४४ स बूगु खः । सोभियत संघं सन् १९७१ स भूगर्भशास्त्रय् स्नातकोत्तर यानावःम्ह थ्वय्कः खानी अन्वेषणया ज्याय् न्ह्यलुवाः खः । वय्कः विशेषतः सुर्खेत व दैलेखय् सिमेन्ट उद्योगयात ज्याख्यले दुगु स्तरया सख्वाःल्वहंया खोज यानादीम्ह खः ।
येँ, मरुत्वाः, भगवतिवारीया वैद्य वेदमानन्द व ज्वालादेवीया तःधिकःम्ह काय्मचा सन् १९४५ स बूम्ह खः । भारतया गोरखपुर विश्वविद्यालयपाखे विज्ञानया विधाय् स्नातकोत्तर क्वचायेकाः जर्मनीया फ्रिवर्ग विश्वविद्यालयपाखें विद्यावारिधि उपाधि कयादीम्ह खः । विशेष यानाः स्वां–सिमाया वैज्ञानिक अध्ययन अले स्वां–सिमाया मनोअवस्थायात दुग्यंगु अध्ययन दुम्ह ब्यक्ति, थ्वय्कलं त्रिविविया शिक्षाध्यक्ष अले लिपा राष्ट्रिय विज्ञान प्रतिष्ठानया उप–कुलपति जुयाः सेवा यानादीगु खः ।
येँ, गुच्चात्वालय् सन् १९३३ स बूम्ह दिनेशनाथया अबुजु कृष्णबहादुर अले मां भूमाली देवी खः । स्नायु सम्बन्धी शल्यचिकित्सा विशेषज्ञकथं नांजाःम्ह थ्वय्कलं सन १९५६ स दरभङ्गा विश्वविद्यालयपाखें डाक्टर ब्वना वयेधुंकाः बम्बे विश्वविद्यालयपाखें हानं उच्च शिक्षा हासिल यानादीगु खः । हलिंया थी थी संस्थातपाखें आपालं सम्मान कया तयेधुंकुम्ह वय्कः सन् १९५७ निसें मदिक्क चिकित्सकया कथं सेवा याना वयाच्वंम्ह खः । वीर अस्पतालयया न्यूरो सर्जरी डिपार्टमेण्टया प्रमुख जुयाः ज्या यानादीम्ह वय्कःया नेतृत्वय् सन् १९६२ निसें नेपालय् थुगु ख्यलय् शल्यचिकित्सा यायेगु ज्या न्ह्याकूगु खः ।