येँ, चिकंमुगःया भाजु ज्ञानरत्नया काय्भाजु नन्दराम सन १९४९ स बूम्ह खः । सन् १९७२ स मास्को विश्वविद्यालयपाखें खनिज विज्ञानया बिषयस स्नातकोत्तर यानावःम्ह थ्वय्कः नेपाल सरकारया खानी विभागय् तःदँतक सेवारत जुयादिल । थ्वय्कः अर्घाखाँची जिल्लाय् सिमेन्ट उद्योगया आधारभूत खनिज चूनढुङ्गा उत्खनन यायेगुली अथे हे सुर्खेतय् सिमेन्ट कारखानाया निंतिं माःगु प्राविधिक निर्देशनया भूमिका म्हितादीम्ह खः ।
येँया भाजु पे्रमबहादुर व मय्जु आसामायाया काय्भाजु सन् १९४१ स बूम्ह खः । भारतया सागर विश्वविद्यालयपाखें सन १९६७ स चित्रमय भौगर्भिक विधाय् ब्वनावःम्ह थ्वय्कः भाजुयापाखें नेपालय् दक्कलय् न्हापां रिमोट सेन्सिङ्ग प्रविधिपाखें भौगर्भिक सर्भेक्षणया ख्यलय् आपालं ज्या न्ह्याकादीगु खः । थ्वय्कलं नेपाःया भौगर्भिक नक्सा दयेकेगु ज्याय् न्ह्यथने बहःगु तिबः बियादीगु दु ।
येँ, असंत्वाःया भाजु गोवद्र्धनलालया काय् भाजु नर्मदालाल भारतं एमबिबिएस ब्वनाः झाःम्ह खः । नेपालय् विशेषत क्षयरोगयात नियन्त्रण यायेगु ज्याय् थ्वय्कःया आपालं मूवंगु तिबः दु । थ्वय्कःया कुतलं नेपालय् दक्कलय् न्हापां वीर अस्पतालदुने क्षय रोग उपचारया विशेष ब्यवस्था जूगु खः, थन हे एक्स–रे प्रविधि सहित प्रयोगशाला दयेकेगु ज्या नं जूगु खः ।
मलंगवा, सर्लाहीया भाजु होमबहादुरया काय्मचा नविनमान सन् १९३७ स बूम्ह खः । भारतं विज्ञान बिषयस स्नातकोत्तर यानावःम्ह थुम्ह भाजुं वेलायतया शेफिल्ड विश्वविद्यालयस खनिज विज्ञानया ख्यलय् उच्चशिक्षा क्वचायेका दिल । नेपाल सरकारया सेवाय् तःदँतक ज्या यानादीम्ह थ्वय्कलं सन् १९७० स वेलायतया इम्पेरियल कलेजं विद्यावारिधि यानादिल । खानी उत्खनन व अनुसन्धानया ख्यलय् थ्यय्कः नेपाःया छम्ह न्ह्यलुवाः खः ।
यलया भाजु गोविन्द अमात्यया काय्भाजु नारायण गोविन्द सन् १९३९ स बूम्ह खः । विहार विश्वविद्यालयपाखें सन १९६१ स एमबिबिएस क्वचायेका वःम्ह थ्वय्कलं स्वास्थ्य उपचारया ख्यलय् आपालं सेवा यानादिल । लिपा वेल्स, वेलायतय् वनाः उच्चशिक्षा ब्वनावःम्ह थ्वय्कलं विशेषतः क्षयरोग निवारणया ख्यलय् छगू अभियान हे न्ह्याकादिल । देय्या आपालं जिल्लाय् अस्पतालया प्रमुख जुयाः थुगु ख्यलय् सेवा यानादिल ।
तानसेन, पाल्पाया भाजु तुलसीप्रसाद व मय्जु भुवनदेवीया काय्भाजु नारायणप्रसाद सन् १९४७ स बूम्ह खः । सन् १९७३ स सोभियत संघ, लुम्बिबा विश्वविद्यालयपाखें मेकानिकल इन्जिनीयरिङ्ग क्वचायेका वःम्ह थ्वय्कः नेपालय् कम मूल्यया यातायात साधनया विकासया ख्यलय् आपालं भूमिका म्हितावंम्ह भाजु ख ः ।
मकवानपुर, भीमफेदिया भाजु कीर्तिलाल जोशी व मय्जु बालकुमारीया काय्भाजु नारायणहरि सन १९३३ स बूगु खः । भारतं हे विज्ञान विषयस स्नातकोत्तर शिक्षा क्वचायेकाः, अनया सागर विश्वविद्यालयपाखें भौतिकशास्त्र विधाय् सन १९६४ स वय्कः विद्यावारिधि उपाधि कायेत ताःलात । नेपालय् विज्ञान शिक्षायात न्ह्यज्याकेगुली थ्वय्कःया आपालं योगदान दुगु जुल ।
येँ, न्याबहाःया भाजु पे्रमानन्द व मय्जु ललितया काय्भाजु निरञ्जन कपाली सोभियत संघया विश्वविद्यालयपाखें सन १९६९ स इन्जिनियरिङ्ग क्वचायेका वःगु खः । विशेषतः लघु जलविद्युत परियोजनाया डिजाइनया ख्यलय् थ्वय्कः नेपाःया छम्ह न्ह्यलुवाः खः । सुनकोशी, नाम्चे आदि थाय्या जलविद्युत परियोजनाय् थ्वय्कलं प्राविधिक तिबः बियादीगु दु ।
अक्कलमान नकर्मि
गुगुं औपचारिक शिक्षा मदुसां थःगु कुल पुर्खाया लजगाःया पाखें ब्यवहारिक ज्ञान व सिप मुंकादीम्ह थ्वय्कः छम्ह प्रविधि विकास अले सुधारया ख्यलय् थःगु कथं योगदान बियावंम्ह ब्यक्तित्व खः । सन् १९४६ स स्वनिगलय् जन्म जूम्ह वय्कः भाजु गोपालमान नकर्मिया काय् खः । काठमाठौं मेटल इण्डस्ट्रिज नांया थःगु हे ज्यासः न्ह्याका वयाच्वंम्ह थुम्ह भाजुं विशेष यानाः जलशक्ति उपयोगया झ्वलय् परम्परागत लःघः संचालनय् आधुनिककथं सुधार यायेगु व लघु जलविद्युत ख्यलय् न्ह्यथनेबहःगु प्रविधि विकास याःगु खः । वय्कलं थःगु कथंया चिचीग्वःगु टर्वाइन डिजाइनया बिकास याःगु खः ।
थुज्वःगु सिर्जनात्मक ज्याया निंतिं वय्कःयात नांदंगु रोलेक्स सिरपाः व राइट् लाइभहुड अवार्डपाखें अन्तरराष्ट्रिय स्तरया सम्मान ब्यूगु खः । सन् २०१७ स नकर्मि मदुगु खः ।