ने.सं. ११२४ दँय् ‘सुभाय्’ बनेज्या जूगु डिजिटल संकिपा खः । थुगु संकिपाया निर्देशक व च्वमि आर्यम नकःमि खः । कलाकार हृदय प्रसाद मिश्र, सबिन शाक्य, शोभा बज्राचार्य, राजेन्द्रमान शाक्य खः । थुगु संकिपा भि.सि.डि.पाखें बितरण जूगु खः । थौकन्हय् छुं नं कथंया संकिपायात डिजिटल प्रविधिं हिलाः प्रदर्शन, संरक्षण व वितरण यायेगु प्रचलन दु । पुलां पुलांगु संकिपा मध्यय् सिलु, राजमतिनिसें अनेक नेवाः संकिपा डिजिटलय् हिलाः प्रदर्शन व वितरण जुया वयाच्वंगु दु । नापं डिजिटल प्रविधिं न्हूगु संकिपाया बनेज्या जुया वयाच्वंगु दु ।
सप्तरङ्गी फिल्म्स पाखें निर्माण जुयाः ने.सं.११२३ स प्रदर्शन जुगु थुगु संकिपाया निर्माता सबिन शाक्य खःसा निर्देशक आर्यम नकःमि खः । थुकी कलाकारपिं सबिन शाक्य, आशिष्मा नकःमि, सुरेन्द्र के.सी., पल्पसा डंगोल, हृदयप्रसाद मिश्र दुथ्याः । संकिपाया संगीतकार मदनकृष्ण श्रेष्ठ व छायाँकार एम एस माइकल खः । थुकी मनू जुयाः अप्वः लोभ याये मज्यू धकाः क्यनातःगु दु ।
ने.सं.११२७ दँय् निर्माण जूगु थुगु संकिपाया निर्माता प्रकाश सुवाल खःसा निर्देशक आर्यम नकःमि खः । थुकी बाखं सनमकुमार श्रेष्ठ, संगीत विरेन शाक्य अले कलाकारकथं हृदयप्रसाद मिश्र, भिन्तुना जोशी, राजु महर्जन, राजु महर्जन जुजु, सुनिता राजभण्डारी व सनिश महर्जनपिं दुथ्याः ।
थुगु संकिपाय् काय् व म्ह्याय् निम्हं उत्ति ग्यं, काय्यात जक माया याये मज्यू धकाः समाजयात न्हायकं क्यनेगु कुतः जूगु खनेदु ।
नेपालभाषाया संकिपा ‘न्हिलाः न्हिलाः हुँ’ आर. के. प्रोदक्शनयापाखें निर्माण जूगु व श्यामकृष्ण श्रेष्ठं निर्देशन यानादीगु खः ।
थुकी श्यामकृष्ण श्रेष्ठ व किरणलाल श्रेष्ठया बाखं, छायाँकार राजभाई सुवाल व एम एस माइकल, संगीतकार गोविन्द ह्यूमत खः । कलाकार श्यामकृष्ण श्रेष्ठ, किरणलाल श्रेष्ठ, तुलसी डंगोल, मोहनकृष्ण श्रेष्ठ, तिमिला श्रेष्ठ, रजनी शाक्य, रामलाल मानन्धर, करण खडगी व पुनम खः ।
मुभि एन मोरपाखें ने.सं.११३३ दँय् निर्माण जूगु थुगु संकिपाया निर्माता मुभि एन मोर हे खः । थुकिया बाखं व निर्देशक आर्यम नकःमि खःसा छायाँकार दिपेन बस्न्यात खः । थुकी कलाकारकथं सबिन शाक्य, हृदय प्रसाद मिश्र, श्यामसुन्दर शिल्पकार, अर्णेश्वरी शिल्पकार, सुनिता श्रेष्ठ, राजाराम पौड्यालपिं दुथ्याः । संकिपाय् नेवाः सकलसिनं थःगु भाय् ल्हायेगु त्वःते मज्यू अले थःगु मौलिक सम्बत नेपाल सम्बतया न्हूदँ नं ल्वःमंके मज्यू धकाः क्यनातःगु दु ।