लूनिभाः आटर््सपाखें ने.सं. ११२४ स निर्माण जूगु थुगु संकिपाया निर्माता पल्पसा डंगोल खः । थुकी बाखं व निर्देशक आर्यम नकःमि जुयादीसा छाँयाकार मनराजा श्रेष्ठ खः । संकिपाया कलाकारकथं हृदय प्रसाद मिश्र, पल्पसा डंगोल, सिन्तिया सेन ताम्राकार व कुञ्जना घिमिरे दुथ्याः । संकिपाय् मखुगु खँ नं सत्य धरोधर्म धकाः पाःफलकि खःगु खँ थें च्वने यः धयागु खँ न्ह्यब्वया तःगु दु ।
डेल्टा मल्टि मिडियापाखें ने.सं. ११२४ दँय् निर्माण जूगु थुगु संकिपाया निर्माता गोबिन्द व्यञ्जनकार व भाईकाजी महर्जन नयन खःसा निर्देशक राज शाक्य खः । थुगु संकिपाया निर्देशक राज शाक्य खः थुकी बाखं गोविन्द व्यञ्जनकारया बाखं दुथ्याना च्वंगु थुगु संकिपाय् कलाकारकथं राजेश महर्जन, सुमिका बज्राचार्य, राज शाक्य, पवन ताम्रकार दुथ्याः । थुकिया छायाँकार भाईकाजी महर्जन नयन खः । थुकी सर्गः नांयाम्ह मिजं व मिला नांयाम्ह मिसाया मतिनाया बाखं ब्वयातःगु दु ।
सिलु तिर्थय् वनेबलय् निम्ह तिपु वने मज्यू । वनकि बाये माले यः धइगु जन बिश्वास दुगु बाखंमेया लिधंसाय् दयेकूगु संकिपा ख । मेया कथं थ्व संकिपाय् नःलिम्ह कलाःम्हं आपालं जिद्दि यानाः सिलु वंम्ह मिजंया ल्यू ल्यू वनीबलय् लँय् हे महिताःतय्सं मिसाम्हेसित अपहरण यानायंकीगु बाखं न्ह्यब्वया तःगु दु । प्रेम प्रोदक्शन प्रा.लि.या ब्यानरय् दयेकूगु नेपालभाषाया न्हापांगु संकिपा ‘सिलु’ बाखंमेया लिधंसाय् ने.सं. ११०८ दँय् दयेकूगु सेलुलोइड संकिपा खः । थुगु संकिपाया निर्देशक प्रदिप रिमाल, निर्माता प्रेम वानिया व दानवहादुर महर्जन खः । कलाकारपिं जय श्रेष्ठ, नविना श्रेष्ठ, मदनकृष्ण श्रेष्ठ, हरिवंश आचार्य, भृगुराम श्रेष्ठ, किशोर मालाकार, साधना बस्नेत, सुशील श्रेष्ठ, बिष्ण मालाकार व प्रेम वानिया खः ।
नेपालभाषाया संकिपा ‘सुभाय्’ पिक्चर प्लानेटपाखें लोक बाखंया लिधंसाय् दयेकाः ने.सं. ११२३ स प्रदर्शन जूगु थुगु संकिपाया निर्माता श्री, विनोद, प्रकाश व आर्यम खः । आर्यम नकःमिया बाखं अले निर्देशन दुगु थुगु संकिपाय् कलाकारपिं हृदयप्रसाद मिश्र, सबिन शाक्य, शोभा बज्राचार्य, राजेन्द्रमान शाक्य, सुरेन्द्र के.सी.पिं दुथ्याः । थुकिया छायाँकार एम एस माइकल खः । थुगु संकिपाय्– थवंथवय् ल्वाना च्वने मज्यू, बुद्धि विवेक छ्यलाः ल्वापुयात ज्यंका यंकेमाः धकाः क्यनातःगु दु ।
सिलु व राजमति सेलुलोइड प्रबिधिं दयेकूगु संकिपा खः । नेपाल सरकार सूचना तथा संचार मन्त्रालय व चलचित्र बिकास बोर्डय् दर्ता नापं सेन्सर पास यानाः हलय् नियमित प्रर्दशन जूगु संकिपा ख । व हे कथं थुगु निगुलिं संकिपा स्वनिगलय् थीथी इलय्, थीथी हलय् प्रदर्शन जूगु ख
ने.सं. ११३८ दँय् निर्माण जूगु थुगु संकिपाया निर्माता गोपालकृष्ण नकःमि व अजः महर्जन अले बाखं व निर्देशक अमृत मान महर्जन खः । संकिपाया छायाँकार लूजः सिं, कलाकारकथं अमृतमान महर्जन, भिन्तुना जोशी, सुशिला तण्डुकार, रणेन्द्र महर्जन, सुरज व्यञ्जनकार व लक्ष्मी गिरीपिं दुथ्याः । संकिपाय् मतिनाय् थःगु ज्यान पानावंपिं स्वम्ह मतिनामिया बाखं ब्वयातःगु दु ।