येँ देय्यात रक्षा यानाच्वंपिं अजिमा मध्ये पासिक्व अजिमा जमःया स्वधाःहितिं कमलादि वनेथाय् बिज्यानाच्वंगु दु । ‘पा’ सिथय् क्वसं च्वंम्ह अजिमा जूगुलिं पासिक्व अजिमा धाःगु खः । द्यःया मूलुखाय् तिकातःगु शिलापत्र व जात्रा याइम्ह द्यःया मूर्तिइ ‘शुभ संवत् ८९१ पौष शुक्ल ७ पासिको माहेश्वरी…” च्वयातःगु दु । दँय्दसं चउलाथ्व चतुर्दशीनिसें पुन्हितक पासिक्व अजिमाया जात्रा याइ । चउलाथ्व त्रयोदशीकुन्हु छ्वय्लाभू याइ । चउलाथ्व चतुर्दशीकुन्हु द्यः कुहां बिज्याकाः द्यः पुज्यानाः दुगु भोग बी । सीकाःभू भ्वय् नये सिधयेवं द्यः खतय् बिज्याकी । द्यः जात्रा यानाः न्ह्यः न्ह्यः तग्वःगु पात्रय् थ्वँ जायेकाः पात्र ज्वंम्ह थाकुलियात छत्रं कुइकाः पीगमय् स्वनी । ल्हुतिपुन्हिकुन्हु जमःमित खा, हँय्, दुगु, फै आदि भोग बियाः द्यः पुज्याःवइ । सुथय् कमलादि गणेद्यःया गुथ्याःत पासिक्व अजिमा द्यःयाथाय् दाफा थाःवइ । बान्हि बीवं गुथ्याःतय्सं ग्वंगः भोग बियाः द्यः पुज्याइ । ग्वंगःया आभू द्यःयात क्वखायेकी । द्यःयात भुजा छाये धुंकाः प्रसादया रुपय् मस्तय्त मरःजा नकी । सँन्याःकाःई जुइवं द्यःयात गमं थनाः खतय् बिज्याकी । धिमेबाजं थानाः न्ह्यः न्ह्यः थाकुलिं पात्र ज्वनाः द्यःखः जात्रा यानाः जन्माःद्यः रथय् तयेथाय् द्यःखः दिकी ।
उखे कमलादी गनेद्यःयात नं देगलं खतय् बिज्याकाः जमलय् जात्रा यानाहयेवं ‘द्यः ल्वाकेगु’ धकाः पात्र न्ह्यःने निम्हं द्यःया थाकुलिपिंसं इताः च्याकाः हिलाबुला याइ । गणेद्यः खः ल्यूल्यू द्यः जात्रा यानाः थःने क्वःने द्यःखः चाःहीकाः म्ह्याय्मस्तय्थाय् पुजा फयाः द्यः छेँय् थ्यनेवं थाकुलिनकिनं द्यःयात सिँफं लुयाः लसकुस यानाः दुकाइ । चउलागा पारुकुन्हु ‘भू यायेगु’ धकाः थाकुलि व नकिं गोप्य च्वनाः द्यःयात पुज्यानाः ग्वंगः भोग बियाः थाय्भु छाइ लिसें सीकाःभू नं याइ । द्वितीयाकुन्हु ‘त्वाःभ्वय् नकेगु’ धकाः जात्राय् ग्वाहालि याःपिंत म्हतिं कूछि कूछि बजि, प्यता घासा तयाः भ्वय् नकेवं जात्रा क्वचाइ ।