बा प्रेमबहादुर शाक्य व मां बालदेवी शाक्यया कोखं ने.सं. १०८६ ज्यापुन्हि कुन्हु येँया इतुंबहालय् निबन्धकार भाजु प्रतापमान शाक्य बूगु खः । इलय् ब्यलय् निबन्ध च्वयाः थीथी पत्रिकाय् पिथनादीम्ह भाजु शाक्यया मेगु म्हसिका प्रतापमान शाक्य ‘दीपक’ नं खः ।

वय्‌कलं निबन्ध च्वयेगु नापनापं नेपालभाषाया थीथी पत्रिका नाय्खिं दँपौ, जः दँपौ, पौभाः, गुंलाबाजं ब्वज्या १११८ लुमन्ति पौया सम्पादन नं यानादीधुंकूगु दुसा नेपाल लिपि गुथिया नायः जुयाः नं ज्या यानादीधुंकूगु दु । नेपाल लिपियात प्रचारप्रसार यायेगु ज्याय् थ्वय्‌कःया महत्वपूर्ण योगदान दु । कविता, निबन्ध च्वयेगु व पत्रपत्रिकाया सम्पादन यायेगु बाहेक थ्वय्‌कः छम्ह नेवाः अभियन्ता नं खः । नेवाः अधिकार तथा नेवाः भाषा, लिपि, साहित्य, संस्कृति संरक्षण व सम्वद्र्धनया ज्याय् न्ह्याबलें न्ह्यःने धस्वानादीम्ह व्यक्तित्व खः ।