भु थें चाकलाःगु ल्वाकाः झ्याँय्‌झ्याँय् सः वयेक थाइगु धातुया बाजं खः – भुस्याः । भुस्याः तालया मात्रा क्यनीगु ग्वाहालि बाजं खः । गुंलाबाजनय् धाः थाइबलय् व चिग्वः धिमय्‌लिसे ग्वाहालि बाजंकथं भुस्याः थाइगु खः । छथ्वः बाजनय् थाइगु भुस्याःया ल्याः थाय्‌पतिकं पाः । म्ह्वतिं नं छज्वः धाः बाय् धिमय्‌लिसे छजु भुस्याः थाइ । गनं व छजु स्वयां उप्वः नं थाः । थ्यं मथ्यं २५–३० सेमी व्यास व १.५ मिमी फिगु भुस्यालय् दथुइ १० सेमी व्यासया दथुइ ह्वः दुगु ५ सेमी तःजाःगु द्वम्बः दइसा १० सेमीया सि दइ । द्वम्बः ह्वतं पिकयातःगु चिखि निपा ल्हाःया पतिनय् हिनाः छपातं मेगुलिइ ल्वाकाः भुस्याः थाइ । भुस्याः छपातं मेगुलिइ ल्वाकाः झ्याँय् बोल वयेकीसा सि जक थीकाः तिंर बोल पिकाइ । थ्व बाजं कँय्यागु दयेकी ।