भाजु राजन साही ने.सं. ११०४ चिल्लागाः द्वादसि, बसुबारखुन्हु येँ, मरु ध्वाखाय्‌ जन्म जुयादीगु खः । वय्‌कःया बाःया नां राजु साही व मांया नां सरोजा साही खः । वय्‌कः नेपालया लोक व आधुनिक प्याखनय्‌ समर्पितम्ह व्यक्तित्व खः । बि.सं.२०६२ निसें वय्‌कः नेपाल भाषाया संकिपा ‘गज्याः गज्याःपिं मनू दै थन’ पाखें न्ह्यज्याना दीगु खः । नेपालभाषा सिरियल ‘समय्‌बजि’ ७०० गू ब्वतक नृत्य निर्देशक व कलाकार जुयादीम्ह वय्‌कलं यक्व हे म्यूजिक भिडियो, सांस्कृतिक ज्याझ्वः, संकिपाय्‌ कलाकार व नृत्य निर्देशक जुयादीगु दु ।

वय्‌कलं उत्कृष्ट निर्देशक म्यूजिक भिडियो पेज थ्री पिपुल्स एवार्ड न्हाप सिरपाः, बेष्ट डान्सर सिरपाः, नेशनल बक्स अफिस म्यूजिक भिडियो अवार्ड, हिरालानि ताम्राकार संगीत सिरपाः कयादीगु दु । अथे हे वय्‌कः खड्गी सेवा समिति, हेटौंडा मानन्धर संघ, वीरगंज नेवाः महोत्सब आदिपाखें सम्मानित जुयादीम्ह व्यक्तित्व खः । वय्‌कः इन्द्रविनायक, इन्द्रजात्रा दशअवतार, नेवाः फिल्म सोसाइतिलिसे आवद्ध जुयादी ।