नेपालभाषाया कविता ख्यलय् राज अक्षोभ्य नामं कविता च्वयादीम्ह भाजुया नां राजु शाक्य खः । वय्‌कःया जन्म वि.सं. २०४० कार्तिक २७ य् यल पुल्चोकय् जूगु खः । वय्‌कःया मांया नां इन्द्रशोभा शाक्य व बाःया नां कृष्ण शाक्य खः । वय्‌कःया कविता नेपालभाषाया थीथी साहित्यक पत्रपत्रिकाय् पिदनाच्वंगु दु, अले मेट्रो एफएम आदिइ प्रशारण नं जुयाच्वंगु दु । वय्‌कलं खस् नेपालीभाषं नं कविता च्वयादी । वय्‌कःया न्हापां पिदंगु कविताया शिर्षक विडम्वना, इतिहासको पानामा शहीद खः । थ्व कविता बि.सं. २०५७ स द वाक्सिंग मून नांगु पत्रिकाय् पिदंगु खः । वय्‌कः नेपालभाषाय् लिपांगु पुस्तायाम्ह आधुनिक कवि खः । पेशां वय्‌कः अधिवक्ता खः ।