भाजु रामशरण साय्मि नेपालभाषा व थ्वया साहित्यया उत्थानय् सक्रिय कृयाशील कार्यकर्ता खः । वय्कःया जन्म ने.सं.१०७६ यंला थ्व १३ सोमवार कुन्हु कालिमाति येँय् जूगु खः । वय्कःया बाःया नां द्वारिका नारायण मानन्धर व मांया नां हिरादेवी मानन्धर खः । कालिमाति त्वालय् नेपाल संबत्या न्हूदँ हनेगु ज्या वय्कःया हे सक्रीयताय् ने.सं. १०९५ निसें न्ह्याःगु खः । वय्कःया हे सक्रियताय् पासापिं नाप जानाः टाइप यानाः तय्जु पत्रिकाया प्रकाशन जूगु खः । अथेह झीझी थ्वः कालिमातिया स्थापनाय् नं वय्कःया ज्वःमदुगु योगदान दु ।
वय्कः ब्वनेगु सिलसिलाय् भारतया रुड्की विश्वविद्यालय झाल । निसःति नेपाली विद्यार्र्थीत ब्वनाच्वंगु उगु विश्वविद्यालयय् वय्कलं नेपाल संबत्या न्हूदँ न्यायेकेगु व म्हपुजा यायेगु ज्या न्ह्याकादिल । अथेहे वय्कलं अन ब्वनाच्वंपिं नेवाः विद्यार्थी मुंकाः रुवि नेपालभाषा गुथि नीस्वनादिल । अन ब्वनाच्वंपिं विद्यार्थीपिंके ध्यबा म्हया नेपालभाषाया उपन्यास, नाटक, ख्यालः आदि तःगू हे सफू रुवि नेपालभाषा गुथि, रुड्की भारत पाखें प्रकाशन यायेगु ज्या यानादिल । वय्कः नेपालभाषा मंकाः खलः येँया ग्वहालि पुचःया दुजः नं खः ।