बा सत्यबहादुर जोशी व मां कल्याणदेवी जोशीया कोखं ने.सं. १०४८ पोहलाथ्व १२ कुन्हु मलंगवा सर्लाहीइ साहित्यकार भाजु रामहरि जोशीया जन्म जूगु खः । गाक्कं अध्ययन यानातःम्ह भाजु जोशीया साहित्य क्षेत्रय् नेपालभाषा, नेपाली व अंग्रेजी भाय् पाखे नं उतिकं हे च्वसा न्ह्याः । नेपालभाषा साहित्यया क्षेत्रय् धाःसा थःगु पलाः दकलय् न्हापां बाखं साहित्य च्वयाः न्ह्याकादीगु खः । वय्‌कःया दकलय् न्हापांगु बाखं प्रेम समाधि ने.सं. १०७२, नेपाल १/२ लय् पिदंगु खः । लिपा भाजु जोशीं थःगु च्वसायात समालोचनापाखे न्ह्याकादिल । व इलय् थ्वय्‌कः नं छम्ह लोकंह्वाःम्ह समालोचक खः । वय्‌कःया समालोचना आपाः यानाः ब्याख्या प्रधान जू । थ्वय्‌कःया नेपालभाषा समालोचना साहित्य पिदंगु न्हापांगु समालोचनात्मक च्वसु श्री केदारमान व्यथितयागु काव्य साधना खः ।