विश्वहर्ष यलया छम्ह नांजाःम्ह बौद्ध पण्डित खः । थ्वयकः अमृतानन्द, सुन्दरानन्दपिनि समकालिन कवि खः धैगु खँ विश्वहर्षं चिनाथकूगु छपु म्येया अन्त वाक्यं क्यं । वय्‌कःया जीवनकाल सम्बन्धी तःथाय् भ्रम खनेदुसां

वय्‌कःया वास्तविक जीवनकाल वय्‌कःया हे म्येय् न्ह्यथनातःगु साल ने.सं ९५५ पाखे खः धैगु सीदःवःगु दु । आःतक थ्वय्‌कःया प्यपु म्ये यलया बौद्ध विहार व भोजपुरया शाक्यमुनि दाफा भजनय् लूगु दु । थुपिं म्ये भक्ति सम्वन्धी जूगु दु । गणपति, शाक्यमुनि बुद्ध, करुणामय आदिपिनिगु स्तुति नापं सिद्धार्थया जीवनी तथा यशोधराया विलाप आदि थ्वय्‌कःया भक्ति सम्बन्धी म्येया विषय खः । थ्वय्‌कःया भक्ति काव्यय् भक्ति व श्रृंगारयात यइपुक ह्वनातःगु खनेदु।