भाजु विश्वेश्वरदास श्रेष्ठया जन्म ने.सं. १०६३ स्वांयापुन्ही कुन्हु सक्वय् जूगु खः । वय्‌कःया मांया नां पूर्णमाया श्रेष्ठ व बाःया नां धर्मदाश श्रेष्ठ खः । वय्‌कः छम्ह कविया नापं भाषिक अभियन्ता नं खः । वय्‌कलं मन्तुना नांया कविता न्हापां च्वयादीगु खः । मचा कविता च्वयेगुलि वय्‌कः पोख्तम्ह कवि खः । वय्‌कःया प्रकाशित कृति– मचा पासा (मचा कविता, ने.सं.१११५) खः । वय्‌कलं सः लय्‌पौ व न्ह्यवःसा मचा पत्रिका सम्पादन यानादीगु दु । सक्वय् नेपालभाषा प्रचारप्रसारय् वय्‌कःया तःजिगु योगदान दु ।