म्ये हालामि एन्जेला सिंह श्रेष्ठ अबु आनन्द राम सिंह व मां उमा सिंह श्रेष्ठया कोखं ने.सं. १०९४ प्वहेलागाः सप्तमि, सोमबारखुन्हु महावौद्ध, असंत्वालय् बूगु खः । झिंछदँ दुसांनिसें संगीत ख्यलय् मदिक्क पलाः तया च्वनादीम्ह वय्कलं संगीत विषयय् स्नातक अध्ययन यानादीगु खःसा वय्कलं नेपालभाषाया ३५ पु म्येया लिसें खस नेपाली व हिन्दीनापं यानाः मुक्कं ३५० पु म्ये हालादीगु दु । देसंपिने नं मांभाय् व तजिलजिया प्रचार यायेगु तातुनाः ‘पासा पुचः गुथि’ स्वनाः सक्रिय जुया च्वनादीम्ह एन्जेलाया न्हापांगु कृति ‘बसन्त ऋतुइ’ खः । २०४६ सालय् पिदंगु ‘लँय् वःम्ह मय्जु’ म्येचालय् थुगु म्ये दुथ्याना च्वंगु दु । वय्कःया ‘कःसिइ च्वंगु गमलाय्’, ‘छ हे वइगु आशं स्व रे’, ‘गुलिसिनं धाइ मिखा बांलाः’ अतिकं ययेकूगु म्ये खः । वय्कलं एनवाइसी सेलिब्रिटी सिंगर अफ दि इयर २००६, यूके ग्लोबल मोशन पिक्चर अवार्ड नेपाल २०१९ सिरपाः त्याकादीगु दुसा संगीत ख्यलय् योगदान यानादीगुलिं थीथी सघसंस्थापाखें वय्कःया हनेज्या नं जूगु दु ।
वि.सं. २०११ सालय् न्यूरोडय् जन्म जूम्ह वय्कःया बाः नांजाःम्ह साहित्यकार दौलतविक्रम विष्ट, अले मां नूतन कुमारी विष्ट खः । वय्कःया अतिकं लोकंह्वाःगु नेवाः म्ये ‘दकलय् यःगु जि स्वंमाचा’ खः । थुगु म्ये महाकवि गिरिजाप्रसाद जोशिं च्वयादीगु खः । नेपाली पप संगीत जगतया दकलय् नांजाःम्ह म्ये हालामि वय्कः थौंकन्हय् अमेरिकाय् दी ।
कमल क्षेत्री नेवाः खय् संगीत ख्यलय् नांजाःम्ह शास्त्रीय संगीतविज्ञ ज्ञातालिसें म्येहालामि व लय्चिनामि खः । थ्वय्कःया जन्म ने.सं. १०६१ दँय् येँया कुमारीगालय् जूगु खः । थ्वय्कःया अबु पुण्यलाल क्षेत्री व मां टेककुमारी क्षेत्री खः । मचा इलंनिसें हे संगीतय् भ्यलय्पुंम्ह थ्वय्कलं दकलय् न्हापां थः पाजुबाज्या पद्मबहादुर ‘रामायण बाः’ व भैरबबहादुर थापापाखें संगीत सयेकादीगु खः । लिपा कलकत्ताय् झायाः अन वय्कलं प्रेमनाथ कारञ्जित (प्रधान) व त्रेलोक्य सम्सेर राणा (टि.एल. राणा) पाखें नं संगीत सयेकादिल । थ्वय्कलं रेडियो नेपालय् दकलय् न्हापां हालादीगु म्ये ‘जलिजलि कति बाँचुं म’ खः। वि.सं. २०२६ सालपाखे रेकर्ड जूगु ‘माया कल्ले दियो नेप्टीलाई लाईटर’ संगीत ख्यलय् थ्वय्कःयात म्हसीका ब्यूगु मध्यय् छपू म्ये नं खः । अथेहे वय्कलं वि.सं. २०२८ सालय् पाखे ‘जीवन दबू’ ज्याझ्वलय् दकलय् न्हापां हालादीगु नेवाः म्ये च्वमि विष्णुहरि व लय्चिनामि श्यामबहादुर थापाया ‘हाकनं छकः लिहां वःसा…..’ खः । छम्ह गैर नेवाः जुयाः नं थ्वय्कलं नेवाः संगीत ख्यलय् गजल म्येत पिथनाः आपालं योगदान यानादीगु दु । थ्वय्कलं हालादीगु ‘भचा भचा त्वंकि रे अय्लाः’ लिसें मेमेगु गजल म्ये तसकं हे लोकंह्वाः । गैर नेवाः जुयाः नेवाः म्येचाः पिथंम्ह व न्हापां नेवाः गजल हालादीम्ह नं थ्वय्कः हे खः । थ्वय्कलं नेवाः संगीत ख्यलय् गजल व मेमेगु यानाः स्वचाः म्येचाः पिथना दीगु दु ।
वि.सं. २०२७ सालपाखे सांस्कृतिक संस्थानय् लजगाः न्ह्याकादीम्ह थ्वय्कलं मुनामदन नाटकया सहायक संगीत निर्देशक खःसा मेमेगु आपालं नाटकय् नं संगीत तयादीगु दु । थ्वय्कलं ‘आमा’ संकिपालिसें आपालं नाटकय् म्हितादीगु दु । लिसें शास्त्रीय राग सम्बन्धित सफू ‘रागहरूको साँचो’ नं पिथना दीगु दु । च्यासःम्ह स्वयां अप्वःसित संगीत स्यनादीम्ह थ्वय्कःया चेलापिं मध्यय् नेवाः संगीत ख्यलय् नांदंपिं लोचन भट्टराई, स्वयम्भुराज शाक्य, नरसिंगलाल श्रेष्ठपिं नं खः । थ्वय्कःया कलाःलिसें निम्ह काय् व निम्ह म्ह्याय्पिं दु । पक्षघातया ल्वचं तःदँ उसाँय् मदया च्वंम्ह थ्वय्कः ने.सं. ११३९ चौलाथ्वः चौथि, मंगलबारखुन्हु मदुगु खः । वय्कःया भचा भचा (ने.सं.११०८), धय्ब्यूगु यौवन (ने.सं.१११७), , याउँक च्वने (ने.सं.१११७), ख्वःगु नुगः (ने.सं.१११९, वय्कःया छपु म्ये दुथ्याः, पिकाकः तारारत्न स्थापित) म्येचाः पिदंगु दु ।
कमला श्रेष्ठ (स्थापित) प्याखं हुलामिलिसें नेवाः व खस संगीत ख्यलय् अतिकं लोकंह्वाःम्ह म्येहालामि खः । थ्वय्कःया जन्म ने.सं. १०६८ कौलागाः सप्तमि, सोमबारखुन्हु जूगु खः । थ्वय्कःया अबु रामबहादुर श्रेष्ठ खःसा मां ईन्द्रमाया श्रेष्ठ खः । थ्वय्कःया इहिपाः तारारत्न स्थापित लिसें वि.सं.२०२६ सालय् जूगु खःसा थ्वय्कःपिनि स्वम्ह काय्पिं दु ।मचा इलंनिसें प्याखं हुलेगु व संगीतय् नुगः क्वसाःम्ह थ्वय्कः झिंस्वदँया बैंसंनिसें संगीत ख्यलय् दुहां झाल । रेडियो नेपालय् वि.सं. २०१८ सालय् दुहां झाःम्ह थ्वय्कलं वि.सं. २०२४ सालय् रेडियो नेपालय् म्ये हालाः न्हाप सिरपाः त्याकादीगु खः । थ्वय्कलं हालादीगु आधुनिक, भजन व लोकम्ये लोकंह्वाः। उकिसनं लोक लसय् हालादीगु म्यें हे वय्कःया ल्वःमंके मफैगु म्हसीका जुयाबिल । अथे जुयाः थ्वय्कःयात ‘लोकगीतकी रानी’ धकाः नं धायेगु याः । ‘तारे भिरमा बजियो लस्सरी, लाको माया छुट्ने कसरी’ व ‘सरर मलेवा घुम्छ बादल मुनि मायालाई’ लिसें आपालं म्येत लोकंह्वाः । उकिसनं नारायणगोपाललिसें हालादीगु म्ये ‘ईश्वर तैंले रचेर फेरी कसरी बिगारिस्’ नं छपु जीवन्त म्ये खः । थ्वय्कलं निसलं मल्याक म्ये हालादीगु दु । अथेहे थ्वय्कलं नेवाःलिसें खस, भोजपुरी व मैथिली भाय्या संकिपाय् नं म्ये हालादीगु दु । थ्वय्कलं नातिकाजी श्रेष्ठ, शिवशंकर मानन्धर, नारायणगोपाल गुरुवाचार्यलिसें आपालं संगीतकारया लसय् म्ये हालादीगु दु ।
नेवाः संगीत ख्यलय् नं थ्वय्कःया आपालं योगदान दु । थ्वय्कःया आपालं नेवाः म्येत नं उतिकं लोकंह्वाः । ने.सं. १११९ स थ्वय्कःया म्येमुना म्येचाः ‘ख्वःगु नुगः’ पिदंगु दु । थ्व म्येचाः वय्कःया भातः तारारत्न स्थापितं पिथनादीगु खः । अथे हे ने.सं. ११२१ स पिदंगु
‘सुमरण या भगवन्’ म्येचालय् नं थ्वय्कलं छपु भजन म्ये हालादीगु दु ।
थ्वय्कलं भारतया इलाहाबादया प्रयाग संगीत समितिपाखें स्नातक यानादीगु दु । वि.सं. २०२५ सालय् राष्ट्रिय सांस्कृतिक संस्थानपाखें लजगाः न्ह्याकादीगु खः । म्ये हालेगु लिसें थ्वय्कः छम्ह सफलम्ह प्याखं हुलामि नं खः । थ्वय्कलं ‘हिजो आज भोलि’ संकिपाय् प्याखं हुलामिकथं म्हितादीगु दु । नुगःचुया ल्वचं कयाः थ्वय्कः ने.सं. ११३८ चौलाथ्वः दुतिया, सोमबारखुन्हु ६९ दँया बैंसय् मदुगु खः । कमला श्रेष्ठया नेवाःम्ये मध्यय् लुमंके बहःगु म्ये थुकथं दु— गुलित फसाद बियेत्यना कृष्ण (लोक, बार्हमासे), ल्याय्म्हम्ह दाजु तंचाया ला छु (च्वमि– दुर्गालाल श्रेष्ठ लोक लसय्), वाउँगु सिमाचाय् म्हासुम्ह झंगःचा (लोक, बसन्त), भावुक खः जि धात्थें हे पासा (च्वमि– तारारत्न स्थापित, लय्ः स्वयम्भुरत्न शाक्य), झाल प्राण परदेश नुगल मछिन दैब (लोकम्ये), गुलि छन्त मुलय् तयाः गुलि लुकुंछिना जुयाः (च्वमि व लय्– चन्द्रमान शाक्य), मतिनाया खिपतं चिनाः जितः (स्वयम्भुराज शाक्यलिसे, च्वमि– अशोक श्रेष्ठ, लय्ः सुमन कपालि), छन्त जिं छु बी दुगु जिके ला छुं मखु (च्वमिः तारारत्न स्थापित, लय्– कमल क्षेत्री), हे गुरु गणपति मंगल मुरति (सुमरण या भगवन्, ने.सं. ११२१)
कविता जोशी नेपालभाषाया म्ये हालादीम्ह लोकंह्वाःम्ह म्येहालामि खः । वय्कःया जन्म ने.सं. १०९५ दँय् जूगु खः । वय्कःया बाः नांजाःम्ह गायक द्वारिकालाल जोशी खः । वय्कःया मांया नां कमला जोशी खः ।मचांनिसें हे वय्कलं नेपालभाषाया म्ये हालावैच्वनादीगु खः । नांजाःगु म्येचाः ‘चुलिचिया चं चं’ व ‘कतांमरिचा’ सिडिइ वय्कलं हालादीगु लोकंह्वाःगु मचा म्ये रेकर्ड दु । वय्कलं थ्व बाहेक भजन, ज्ञानमाला भजन व थीथी संकिपाय् नं म्ये हालादीगुया लिसें, ‘अय् दाइचा छ ला साप झंगः खनिं’, ‘बहनी बहनी हुं कुलामय् जि’, ‘जिं हे मसीक जिगु जीवन’, ‘जीवनया रंग’, ‘घालं उप्वः’, ‘ल्यूल्यू न्ह्यःन्ह्यः वयाः’ आदि सलंसःपु म्ये हालादीगु दु ।
मय्जु कविता जोशी म्येहालामि जक मखु वय्कलं हिट्स एफएमय् झिदँतक नेपालभाषाया ज्याझ्वः न्ह्याकादीगु दु, अथे हे नेपालभाषां न्वचु स्यनेगु ज्या नं यानादीगु दु । वय्कलं लाइभ म्ये हालेगुली दकलय् बांलाःगु सः सिरपाः व २०७९ स बेष्ट फिमेल सिंगर सिरपाः कयादीगु दु ।
भाजु काकाभाइ (शम्भुमान) मानन्धर ख्वपया थाथुला क्वाथन्दौ त्वालय् ने.सं. १०४९ यंलाथ्वः चौथि (चथाः)खुन्हु मां चन्द्रमाया बौ पृथ्वीमान मानन्धरया चीधिकःम्ह काय् जुयाः जन्म जुयादीगु खः । मचांनिसें कला ख्यलय् नुगः क्वसाःम्ह जुयाः निदँ मदुबलय् निसें थः अबु मदयेका च्वनेमाःसां कका साहु लहरमान मानन्धरया हःपालं ख्वप देय्या आपालं दबुलिइ थ्यं मथ्यं खुदँया वैंसंनिसें थःत कला ख्यलय् समर्पित जुयाः न्ह्यचिला दिल ।
छकः छेँँय् मत सिनाच्वंगु इलय् ककाबाज्यां भजन हालेत हार्मोनियम थायेत तयातःगु थासय् च्वनाः मचाम्ह काकाभाइं हार्मोनियमय् प्रष्ट जुइक धूनय् थःगु पतिं ब्वाकाच्वंगु खनाः थः काय्चिया सांगीतिक ज्ञान बांलाक ध्वाथुइका दीगु जुयाच्वन । उगु इलय् मिसामस्तय्त प्याखं, म्ये हालेत मस्त स्यनी धकाः दबुली छ्वयेगु चलन मदु । अले वय्कःयात लुँयागु तिसां तीकाः वय्कःया ककां थाय् थासय् दबुली मिसामचाया रुपय् प्याखं ल्हुइकेत यंकादीगु जुयाच्वन । गुकिया लिच्वःकथं वय्कः बुलुहुं बुलुहुं म्ये चिनेगु, नृत्य, गायन, संगीत, वाद्यवादन, सापारु ज्वःछि पिदनीगु रामायणी प्याखं स्यनेगु व नाटक म्हितेगुया नापनापं निर्देशनय् नं पारंगत जुजुं वन ।
वय्कलं गुरु वस्ताद विवेकदासपाखें शास्त्रीय संगीतया ज्ञान कयादीगु खः । वय्कःया आपालं वाद्यवादनपाखे नुगः क्वसाःगु हुनिं जुइमाः न्ह्यागुं न्हूगु पुलांगु बाजं वय्कलं याउँक व अःपुक हे थाये सयेका दी । वय्कलं हार्मोनियम, तवला, मादल, भ्वाइलिन, धिमे, बाँसुरी, लालाखिं, पछिमा, आकर्डिन बाजं थानादीगु दु ।
न्हापान्हापा नाटकय् मिसा पात्रया भूमिका नं मिजंपिन्सं हे म्हितेगु याना वयाच्वंगु खः । वय्कः व पासापिनिगु आपालं कुतलं मिसा मस्तय्त हे दबुली नाटकय् म्हितकेत पित हयेत ताःलाना दीगु खः ।
वय्कलं थःम्हं हे निर्देशन यानाः म्हितादीगु नाटकत– च्यवन ऋषि, जलन्धर, प्रेम मिलन, कीचक वध, भीमसेन, उषाहरण, बेसन्तरया मचादान, साहसी महिला, प्रतापसिंह, सत्य हरिश्चन्द्र, वाणासुर, कामदेव भष्म, समाज, शाहवंशको देन, श्री स्वस्थानी व्रतकथा आदि खः । नेपाल साहित्य मन्दिर, नृत्य कला मन्दिर, दत्तात्रय रास भजन मण्डल, दीपंकर भजन खलः, विराट नेपालभाषा साहित्य सम्मेलन, बाल साहित्य मण्डल आदि सम्मेलनय् न्ह्यब्वइगु लसकुस म्येय् अप्वः यानाः वय्कलं लय् तयाः थः शिष्यपिन्त न्ह्यब्वया दीगु दु । काकाभाइ मानन्धरं नेपाल साहित्य मन्दिर (२०१०) व नृत्य कला मन्दिर (२०१२) दथुया सांस्कृतिक ताँया भूमिका म्हितादीगु दु ।
काकाभाइ मानन्धरया सक्रियताय् थःगु हे संगीत संयोजनय् थःम्हं नं म्ये हालाः, मेपिन्त नं हःपाः बियाः “दीपंकर ज्ञानमाला भजन” बौद्ध भजन मुनाया अडियो म्येचाः पिथनादीगु दु । वय्कःया सक्रियताय् “जलन्धर” नाटकया टिकट शो तकं यायेत ताःलाःगु खः । थुगु नाटकया म्ये व वय्कलं लय् चिनादीगु म्येत मुनाः वय्कःया तःधिम्ह म्ह्याय् प्रतिसरा साय्मिं “उनैको यादमा” सिडी म्येचाः नं पिथंगु खः । थ्वय्कः ने.सं. १११६ तछलाथ्वः मंगलचौथिखुन्हु मन्त ।
बिसं १९९४ दँय् आल्क्वय् अबु आनन्दज्योति वज्राचार्य व मां चिनिमाया बज्राचार्यया कोखं जन्म जूम्ह कान्छा गुरुजु ‘अकेला’ छम्ह अतिकं सक्रियम्ह कलाकार खः । वय्कः उगु इलय् खःप्याखं व थीथी संस्थां ग्वसाः ग्वइगु सांस्कृतिक ज्याझ्वलय् म्ये हालाः व थःगु संगीतं जायेकाः मेमेपिं कलाकारतय्त हाय्के बियाः ज्वः मदुगु प्रतिभा न्ह्यब्वया च्वंम्ह छम्ह होनहार कलाकार खः । थ्वय्कःया योगरत्न शाक्यं च्वयादीगु, थम्हं हे लय् चिनादीगु व सूरजवीर बज्राचार्यं हालादीगु ‘बर्से जु बर्सात सुपाँय् छ, घनघोरं छ बर्से जु’ बोलया म्ये लोकं ह्वाः ।
थ्वय्कलं ब्वाला क्लबया ग्वसालय् लय्लय्पत्तिकं त्वाःत्वालय् ने.सं. ११०० दँया दुने जूगु यल नेपालभाषा साहित्य संगीत मुंज्याय् सःपाखे न्हाप सिरपाः त्याकादीगु दु । थ्वय्कः बि.सं. २०६३ दँय् मन्त ।
संगीतकार, रचनाकार, म्येहालामिलिसें संकिपाकःमि कीर्तिश्यामसुन्दर जोशीया जन्म अबु कीर्तिगोपाल जोशी व मां सुवर्ण देवी जोशीया कोखं ने.सं. १०८४ यंलाथ्वः तृतिया, बुधबारखुन्हु जूगु खः । हार्मोनियम, बाँसुरी, माउथआर्गन, मादल थें जाःगु बाजनय् पोख्तम्ह जोशिं ने.सं. १११० स यलया च्यासलय् जूगु म्ये धेंधेंबल्लाः कासाय् ‘थौं चच्छि वनी तिनि म्वाःल वइतिनि सुथ झःझः धयाः’ म्ये न्ह्यब्वयाः संगीतय् ल्यू सिरपाः त्याकादीगु खः । वय्कःया थःगु हे संगीत व रचनाय् प्रभावकुमार खेँय्नाप जानाः हालादीगु ‘त्वइसे बांलासे च्वंगु ख्वाःपाः लुमंसे वयाः जि ला चच्छि न्ह्यः पाः’ म्ये दकलय् न्हापांगु खुसी रेकर्ड जूगु म्ये खःसा वय्कःया च्वसा व लसय् प्रभावकुमार खेँय्नाप हालादीगु ‘छं सःतां वइ ला मवइ ला’, राम कुमार खेँचं च्वयादीगु, नानी बाबु शाक्यं लसय् हनादीगु ‘स्वये मते मय्जु यार्लि मिखां दः, मन छंगु भुतुमालि थें ब्वइ’ वय्कःया च्वसा व लसय् टंकराज शाक्यं हालादीगु ‘छंगु ख्वाः मखनाः जि ला वँय् थें जुल छ गन गन छ गन गन’, थौंं छक हाकनं छ लुमना वल, बुलुसे च्वने धुंकूगु किपा यचुया वल’ वय्कःया लोकं ह्वाःगु म्ये खः ।
वय्कलं नेवाः संकिपा ‘तुतां’मय् म्ये च्वज्यानापं लय् चियादीगु दुसा ‘त्याग’, ‘जिपिं बदमाश मखु’ संकिपाया म्येय् लय् चिनादीगु दु ।
वय्कःया म्येचाः ‘थौं छकः हाकनं छ लुमना वल’ वि.सं. २०६१ दँया स्वन्तिबलय् पिदंगु खः ।
लजगाःकथं वय्कलं वि.सं. २०५२ साल निसें २०६२ तक्क थ्रिडि एनिमेशन व डिजिटल भिडियो इडिटर जुयाः ज्या यानादीगु दु । गुकी ३५ खस नेपाली संकिपाया टाइटल एनिमेशन, कास्टिङ एनिमेशन, ३२ खस नेपाली संकिपाया साउण्ड डबिङ, विज्ञापन, डकुमेन्ट्री एनिमेशननापं म्यूजिक भिडियो सम्पादन यानादीगु दुसा २०६३ सालंनिसें संकिपा सम्पादनय् अझ सक्रिय जुसें ‘बकं फुसुलु’, ‘गोखुन’, ‘भद्रगोल’, ‘तुतां’, ‘लिबाय् धुंकाः’ नेपालभाषा संकिपाया सम्पादन यानादीगु दुसा थीथी टेलिभिजन शो उत्पादनय् नं योगदान यानादीगु दु ।
जिवित जल्मी नामं म्हस्यूम्ह लोकंह्वाःम्ह संगीत संयोजक जिवित महर्जनया जन्म ने.सं. १०९५ तछलागाः चह्रे, मंगलबारखुन्हु अबु जीवन महर्जन व मां पलुं महर्जनया कोखं येँया मखंगल्लि, न्हूसतकय् जूगु खः ।
संगीत ख्यलय् मचांनिसें हे नुगः क्वसाःम्ह जल्मिं थःगु पूर्खाया थाय् यलया जलदेय्या नामं थःगु नामय् ‘जल्मि’ कथं म्हसीका घानादीगु खः ।
२०५९ सालय् कर्णदासया सलय् अतिकं लोकंह्वाःगु म्ये ‘जन्मिँदा एक्लै’ वय्कःया न्हापांगु संगीत व संगीत संयोजन जूगु म्ये खःसा जुजुकाजी रंजितया सलय् लोकंह्वाःगु नेपालभाषाया म्ये ‘यः मां छंगु गुणया पलेसा’ न्हापांगु संगीत संयोजन यानादीगु म्ये खः । वय्कःया न्हापांगु संगीत जुजुकाजी रंजितया हे सलय् थ्वःगु लोकंह्वाःगु म्ये ‘जितः स्वयाः मिखा भाय् यानाः’ खः ।
रत्नशोभा महर्जनया सः, निर्मलरत्न शाक्यं च्वयादीगु व मनराजा नकःमिया लसय् नेपालभाषाया अतिकं लोकंह्वाःगु म्ये ‘लिक्क वयाः जितः धाल वं’या संगीत संयोजक जल्मिं थुगु ख्यलय् निद्वलं मयाक म्येय् संगीत संयोजन यानादीगु दुसा ‘मतिना यानागु जिं उलिमछि दत’, ‘सचिका चिनाः’, ‘यःमां छंगु गुणया पलेसा’, मदनकृष्ण श्रेष्ठ व हरिवंश आचार्यया दोहरी म्ये ‘हरिमाया खः जिगु नां’, मदनकृष्ण श्रेष्ठया हे ‘हथाय् चाय् मते’, ‘खुला खुला दत थःछेँय् वंगु’ थें जाःगु म्ये उकी दुथ्याः ।
नेपालभाषाया संकिपा ‘पानवति’इ दुथ्याःगु लोक म्ये ‘व छु गल्ली थ्व छु गल्ली’यागु न्हूपहलं यानादीगु संगीत संयोजन नं लोकं ह्वातसा वय्कलं ‘जिपिं बदमास मखु’, ‘बांलाः मय्जु’, ‘ग्यानापु स्टाइल’ ‘पानवती’ लिसें ७ गू नेपालभाषाया संकिपाय् संगीत संयोजन यानादीगु दु ।
द्वःछिपुं मल्याक खस नेपाली भाय्या म्येय् संगीत संयोजन यानादीम्ह वय्कःया ‘जन्मिँदा एक्लै’, ‘म मरेको छैन’, हरिवंश आचार्यया ‘सारंगी रेटौंला’, ‘बुढो हुन मन छैन’ थें जाःगु लोकंह्वाःगु संगीत संयोजन उकी दुथ्याः ।
म्येहालामिकथं नं म्हसीका दुम्ह जल्मिं न्हापां हालादीगु म्ये वय्कलं हे संगीत व संगीत संयोजन यानादीगु, सुशील राजोपाध्यायं च्वयादीगु ‘गुलेलीको चोट’ खःसा वय्कलं नविन चित्रकारं च्वयादीगु ‘भुल्न चाहन्छु हरेक बाचा’ नं हालादीगु, संगीत व संगीत संयोजन यानादीगु म्ये खः ।
२० पुति नेवाः म्ये हालादीम्ह वय्कःया न्हापांगु नेवाः म्ये विनोद जल्मिया च्वसा व लसय् थःगु हे संगीत संयोजन यानादीगु ‘जि छंगु गल्लीइ’ खःसा नेवाः म्ये ७५ पुं मल्याक संगीत तयादीम्ह वय्कलं २५ पुति खस नेपाली भाय्या म्येय् संगीत तयादीगु दु ।
वय्कलं दकलय् बांलाःम्ह संगीत संयोजक पेजथ्री पिपल्स च्वाइस अवार्ड ११४२, नेपालभाषा स्टार म्यूजिक भिडियो अवार्डय् निक्वःतक दकलय् बांलाःम्ह संगीत संयोजकया अवार्ड नं त्याकादीगु दुसा नेपाःया राष्ट्रपतिपाखें नातिकाजी संगीत सम्मान २०७६ पाखें नं सम्मानित जुयादीगु दु ।
लजगाःकथं मरि पसः ‘आरती स्विट्स्’ न्ह्याका च्वनादीम्ह वय्कः लोकंह्वाःम्ह संगीतकःमि विष्णु जल्मिया छय् खः ।
संगीतकःमिपिं
जीवन राजोपाध्याय
मां इन्दिरा राजोपाध्याय व अबु धर्मानन्द राजोपाध्यायया कोखं ने.सं. १०८० चौलाथ्वः दुतिया, मंगलबारखुन्हु च्वखाछेँ गल्ली, येँय् कलाकार जीवन राजोपाध्यायया जन्म जूगु खः । चित्रकलायात हे लजगाः यानादीम्ह राजोपाध्यायं त्रिभुवन विश्वविद्यालय ललितकला क्याम्पसं स्नातक यानादीगु दु । थौंकन्हय् डल्लु आवाश क्षेत्रय् च्वनादीम्ह थ्वय्कः ने.सं. १०९९ दँनिसें चित्रकला, कार्टुनकला व डिजायन कलाय् नं सक्रिय जुया च्वनादीगु दु । थ्वय्कलं खुकःगु राष्ट्रिय खेलकूद धेंधेंबल्लाःया लोगो २०६८, नेपाल संगीत तथा नाट्य प्रज्ञा प्रतिष्ठानया लोगो दयेकेगु निंतिं जूगु धेंधेंबल्लाः २०६६, सडक प्रयोगकर्ता नेपाल सन् १९९६ या लोगो धेंधेंबल्लाखय् न्हाप सिरपाः त्याकादीगु दु । अथे हे मेमेगु थीथी धेंधेंबल्लाखय् आपालं सिरपाः त्याकादीगु दु । नेपाःया थीथी जिल्ला, भारत, बंगलादेश, थाइलैण्ड, जापान, इथियोपिया, बेलायत, बेल्जियम आदि थासय् थःगु ६३ गू स्वयां उप्वः चित्रकला ब्वज्या याना दीधुंकूगु दु ।
नेपाःया चित्रकला ख्यःया खँ ल्हायेबलय् नां मकासें मगाःम्ह राजोपाध्यायया थीथी संघ संस्थाय् आबद्धता दु । आधुनिक कलाकार समाजया मूछ्याञ्जे, नेपाल जलरंग समाजया मूछ्याञ्जे, नेपाल कला परिषदया कार्यकारी सदस्य जुयाः ज्या याना च्वनादीगु दु । ताःईनिसें कलाकारिताया ख्यलय् थ्वय्कलं यानादीगु योगदानयात च्वछासें नेपाल कला परिषदपाखें रंगलाल वाङदेल स्मृति पुरस्कार २०५६, नेपाल ललितकला प्रज्ञा प्रतिष्ठानपाखें दोश्रो राष्ट्रीय कला प्रदर्शनी २०६९ स विशेष पुरस्कार, नेपाल व्यवसायिक कलाकार संघपाखें अमात्य कला पुरस्कार २०७५, नेपाल सरकार संस्कृति, पर्यटन तथा नागरिक उद्दयन मन्त्रालयपाखें प्रादेशिक प्रतिभा पुरस्कार २०७८ पाखें सम्मान याःगु दु ।