वि.सं. २०७४ सालय् नीस्वंगु इमर्ज ब्याण्डपाखें नेपालभाषाया म्ये ‘मैंचा’ पिदनेवं ल्याय्म्ह पुस्तालिसें मेमेगु समुदायय् तकं लोकंह्वात । थुगु म्ये च्वयादीम्ह, लसय् चिनादीम्ह, बाजं ग्वसाः ग्वयादीम्ह व हालादीम्ह उजं शाक्य नं लोकंह्वात । अबु उत्तम शाक्य व मां विना शाक्यया कोखंं ने.सं. १११८ चिल्लागाः तृतिया, सोमबारखुन्हु येँया ओमबहालय् जन्म जूम्ह उजंया ‘मैंचा’ नेपालभाषाया म्ये वि.सं. २०७७ सालय् कोरोना महामारीया हुनिं जूगु लकडाउनया इलय् पिदंगु खः । ५० गुलिं मल्याक दबुलिइ न्ह्यब्वया दीगु थुगु मेलिसें नुगः दुने, नुगः, थौंकन्हय्, मतिना, झ्यालय् च्वनाः (नेवाः व खस नेपालीभाय् ल्वाकःजाःगु) म्ये पिदंगु दुसा खस नेपाली भाय्या १२ पु म्ये पिदनेधुंकूगु दु ।
वय्कलं थौंकन्हय् म्ये स्टुडियो न्ह्याका च्वनादीगु दु, गुकिं संगीत उत्पादनया ज्या जुयाच्वंगु जुल । वय्कःयात पेजथ्री पिपल्स च्वाइस अवार्डपाखें विशेष सम्मान द्यछाःगु दुसा लहना वाःपौ व ओमबहालया ओलम्पस क्लबपाखें नं हंगु जुल ।
उर्मिला श्रेष्ठ नेवाः संगीत ख्यलय् प्याखं हुलाः म्ये हालावःम्ह खःसां खस् संगीत ख्यलय् लोकंह्वाःम्ह म्येहालामि खः । थ्वय्कःया जन्म ने.सं. १०६३ दिल्लाथ्वः दुतिया, आइतबारखुन्हु येँया त्यःरया घवाननी जूगु खः । थ्वय्कःया अबु बत्सलाल श्रेष्ठ व मां झुमादेबी श्रेष्ठ खः । वि.सं. २०२० सालय् थ्वय्कःया संगीत सर्जक हिरण्य भोजपुरेलिसें इहिपाः जूगु खःसा थ्वय्कःपिनि छम्ह जक म्ह्याय् दु
मचा इलंनिसें म्ये संगीतय् नुगः क्वसाःम्ह थ्वय्कलं नेवा दबुलिं थःगु सांगीतिक पलाः न्ह्याकादीगु खः । जनकवि दुर्गालाल श्रेष्ठया तसकं लोकंह्वाःगु म्येहना प्याखं ‘निमन्त्रणा’य् नं थ्वय्कलं छुं छुं म्ये हालादीगु दु । स्कूलय् म्ये हाला जुइम्ह थ्वय्कलं थः झिंन्हय्दँ दुबलय् दकलय् न्हापां दबुली हालादीगु ज्ञानबहादुर श्रेष्ठया लसय् म.बि.बि.शाहया म्ये ‘चाँदनी दिलको थियो किन अन्धकार गरी गयो’ खः । थःगु सःया हुनिं नेपाली संगीत ख्यलय् थःत छम्ह उत्कृष्ट म्येहालामिकथं थनेत थ्वय्कः ताःलाःगु दु । रेडियो नेपालय् दुहां वनेधुंकाः थ्वय्कलं आपालं खस संगीतय् थःत पानादिल ।
मचा इलंनिसें थ्वय्कः ब्वनेगुली नं न्ह्यःने लाःम्ह खः । थ्वय्कलं एम.ए. व बी.एल. तकं ताःलाका दिलसा क्यानाडां सामाजिक विकासय् डिप्लोमा यानादिल । अथेहे दरबारय् लजगाः न्ह्याकाः अन सचिवतकं जुयादिल । इहिपाः जुइधुंकाः निम्हं संगीतकःमिपिं हे जूगुलिं थ्वय्कःया झन् संगीत यात्रा सुथांलाक्क न्ह्यात । अले खस संगीत ख्यःयात थ्वय्कःपिन्सं ल्वःमंके मफैगु कथं योगदान नं यानादिल । थ्वय्कःपिनिगु जोडीयात अबलय् ‘हेउ जोडी’ नं धायेगु याः । लेकाली समूहलिसें स्वापू दुपिं थ्वय्कःपिन्सं अबलय् हेटौंडाय् दीम्ह महाकवि गिरिजाप्रसाद जोशीया लिधंसां नवकला कुञ्जपाखें नं नेवाः संगीतयात तिबः बियादीगु खः । सुप्रवल गोर्खा दक्षिण वाहुलिसें पदवी सिरपालं छायेपी धुंकूम्ह थ्वय्कः सच्छि व न्यय्पुं मल्याक थ्वय्कलं म्ये हालादीगु दु ॥