म्ये हालामि एन्जेला सिंह श्रेष्ठ अबु आनन्द राम सिंह व मां उमा सिंह श्रेष्ठया कोखं ने.सं. १०९४ प्वहेलागाः सप्तमि, सोमबारखुन्हु महावौद्ध, असंत्वालय् बूगु खः । झिंछदँ दुसांनिसें संगीत ख्यलय् मदिक्क पलाः तया च्वनादीम्ह वय्कलं संगीत विषयय् स्नातक अध्ययन यानादीगु खःसा वय्कलं नेपालभाषाया ३५ पु म्येया लिसें खस नेपाली व हिन्दीनापं यानाः मुक्कं ३५० पु म्ये हालादीगु दु । देसंपिने नं मांभाय् व तजिलजिया प्रचार यायेगु तातुनाः ‘पासा पुचः गुथि’ स्वनाः सक्रिय जुया च्वनादीम्ह एन्जेलाया न्हापांगु कृति ‘बसन्त ऋतुइ’ खः । २०४६ सालय् पिदंगु ‘लँय् वःम्ह मय्जु’ म्येचालय् थुगु म्ये दुथ्याना च्वंगु दु । वय्कःया ‘कःसिइ च्वंगु गमलाय्’, ‘छ हे वइगु आशं स्व रे’, ‘गुलिसिनं धाइ मिखा बांलाः’ अतिकं ययेकूगु म्ये खः । वय्कलं एनवाइसी सेलिब्रिटी सिंगर अफ दि इयर २००६, यूके ग्लोबल मोशन पिक्चर अवार्ड नेपाल २०१९ सिरपाः त्याकादीगु दुसा संगीत ख्यलय् योगदान यानादीगुलिं थीथी सघसंस्थापाखें वय्कःया हनेज्या नं जूगु दु ।