कविता जोशी नेपालभाषाया म्ये हालादीम्ह लोकंह्वाःम्ह म्येहालामि खः । वय्‌कःया जन्म ने.सं. १०९५ दँय्‌ जूगु खः । वय्‌कःया बाः नांजाःम्ह गायक द्वारिकालाल जोशी खः । वय्‌कःया मांया नां कमला जोशी खः ।मचांनिसें हे वय्‌कलं नेपालभाषाया म्ये हालावैच्वनादीगु खः । नांजाःगु म्येचाः ‘चुलिचिया चं चं’ व ‘कतांमरिचा’ सिडिइ वय्‌कलं हालादीगु लोकंह्वाःगु मचा म्ये रेकर्ड दु । वय्‌कलं थ्व बाहेक भजन, ज्ञानमाला भजन व थीथी संकिपाय्‌ नं म्ये हालादीगुया लिसें, ‘अय्‌ दाइचा छ ला साप झंगः खनिं’, ‘बहनी बहनी हुं कुलामय्‌ जि’, ‘जिं हे मसीक जिगु जीवन’, ‘जीवनया रंग’, ‘घालं उप्वः’, ‘ल्यूल्यू न्ह्यःन्ह्यः वयाः’ आदि सलंसःपु म्ये हालादीगु दु ।
मय्‌जु कविता जोशी म्येहालामि जक मखु वय्‌कलं हिट्स एफएमय्‌ झिदँतक नेपालभाषाया ज्याझ्वः न्ह्याकादीगु दु, अथे हे नेपालभाषां न्वचु स्यनेगु ज्या नं यानादीगु दु । वय्‌कलं लाइभ म्ये हालेगुली दकलय्‌ बांलाःगु सः सिरपाः व २०७९ स बेष्ट फिमेल सिंगर सिरपाः कयादीगु दु ।