ने.सं. १०५६ चिल्लागाः नःमि, मंगलबारखुन्हु येँया मरु (अट्कोनारायण) त्वालय्‌ अबु बद्रिनारायण मानन्धर व मां लक्ष्मीकुमारी मानन्धरया कोखं तःधिम्ह म्ह्याय्‌कथं पद्मकुमारी मानन्धरया जन्म जूगु खः ।
थ्वय्‌कःया बौ नं संगीतया ज्ञाता जूगुलिं व छेँय्‌ नांजाःपिं संगीतज्ञत मुनाः जुइगु संगीत ज्याझ्वःया प्रभावं मचाइलंनिसें संगीतय्‌ नुगः क्वसाःगु खः । न्हापां उस्ताद बुद्धरत्नपाखें व लिपा थारु जातयाम्ह छम्ह गुरुपाखें वय्‌कलं शास्त्रीय संगीत सयेका दिल । वि.सं. २००५–०८ सालपाखे कान्छाबुद्ध बज्राचार्यया कुतलं छम्ह मिसाम्ह अष्टेलियन अन्वेषकं वय्‌कःया म्ये ‘स्वदेशबासि तताकेहेँ मय्‌जु, विद्या ब्वनादीमाल’ रेकर्ड यानाः देसय्‌ लिहां वंगु इलय्‌ हवाई दूर्घटनाय्‌ लानाः म्ये नं झौ जुल । वि.सं. २००९ सालपाखे येँया हनुमानध्वाखाय्‌ जूगु छात्रा संघया ज्याझ्वलय्‌ वय्‌कलं नातिकाजी श्रेष्ठजुं लसय्‌ हनादीगु ईश्वरानन्द श्रेष्ठाचार्यजुं च्वयादीगु छपु म्ये ‘न्हिलाच्वंगु थुगु क्यबचा, वइन धकाः थें पासा’ हालादिल । थ्वयां लिपा कान्छाबुद्ध बज्राचार्यजुया लसय्‌ व महाप्रज्ञायाजुया छपु म्ये ‘झ्यालनं फय्‌ वयाः मतः जक सित यो मां’ नं हालादीगु खः ।
अतिकं यइपुगु सःया धनि थ्वय्‌कःया छेँया नां पद्मकुमारी मानन्धर खः । वि.सं. २००८ सालं रेडियो नेपालय्‌ ज्याझ्वः न्ह्याकीम्ह पद्मादेबी धकाः न्ह्यथंगुलिं वय्‌कःया नां पद्मादेबी जूवन । नेपालभाषाया न्हापांगु सामान्यज्ञान सफुती रेडियो नेपालय्‌ दकलय्‌ न्हापां नेवाःम्ये हाःम्ह मिसा धकाः पद्मादेबीया नां न्ह्यथना तःगु दु । वय्‌कलं रेडियो नेपालय्‌ छपु हे नेवाःम्ये हालादीगु मदु । तर वय्‌कः रेडियो नेपालय्‌ म्ये हालादीम्ह दकलय्‌ न्हापांम्ह नेवाःमिसा खः । वि.सं. २००९ सालय्‌ जूगु रेडियो नेपालया म्ये प्रतियोगिताय्‌ तारिणीप्रसाद कोइरालाया म्ये ‘यो नयनमा एकदिन गंगा बग्यो’ २० म्ह लय्‌चिनामिपिन्सं ब्यागलं ब्यागलं न्ह्यब्वःगु मध्यय्‌ रत्नदास प्रकाशया लसय्‌ वय्‌कलं हालादीगु म्ये न्हाप जूगु खः । अनंलि वय्‌कलं ३० पुं मल्याक खस म्येत हालादीगु दु । तर छपु नं रेकर्ड मखुसें प्रत्यक्षरुपं हालादीगु खः । लिपा शास्त्रीय संगीत शिक्षाया निंतिं छात्रवृत्ति कयाः वि.सं. २०११ सालपाखे भारतया लखनउ झाल । अले वय्‌कः आधुनिक म्येख्यलं रेडियो नेपालय्‌ तसकं लोकंह्वाःम्ह पद्मादेबीया नां बुलुया वन । शास्त्रीय संगीतय्‌ दुबिनाः भातखण्डे विद्यापीठं १८ सालय्‌ संगीत विशारद (एम.म्युज.) यानादिल । अनयाम्ह हे संगीतज्ञ गुरु पं. रंगराव कादम्बरीलिसे यःत्यः जुयाः वि.सं. २०१९ सालय्‌ हैदराबादय्‌ इहिपाः जुल । थनं लिपा वय्‌कः पद्म कादम्बरीया नामं म्हसीका जूवन । वय्‌कःया निम्ह काय्‌ व छम्ह म्ह्याय्‌ दु ।
भातःलिसें नेपाः लिथ्यने धुंकाः वय्‌कलं वि.सं. २०२० सालपाखे डिल्लीबजारया संगीत महाविद्यालयपाखें शास्त्रीय संगीत स्यनेज्या न्ह्याकादिल । लिपा नेपाल बाल संगठन, पद्मकन्या क्याम्पसय्‌ संगीत स्यँस्यं वि.सं. २०५० सालय्‌ अवकाश कयादीगु खः । थ्व हे झ्वलय्‌ ३३ सालपाखे वय्‌कलं भारतया प्रयाग संगीत समितिपाखें शास्त्रीय गायनय्‌ संगीत प्रविणय्‌ ल्यू लाकादिल । शास्त्रीय गायन व संगीतय्‌ थःत पोख्त यानादीम्ह थ्वय्‌कः इहिपाःन्ह्यः नेपाः वयेबलय्‌ नं शास्त्रीय संगीतया निंतिं जक रेडियो नेपाल वनेगु जुलसा सुनानं आधुनिक म्ये हायेकगु वा रेकर्ड यायेगु ज्या मजुल । वय्‌कलं अन न्हापां हालादीगु लोकंह्वाःगु गुलिखे म्येत तारादेविं हालाः उलि हे लोकंह्वाःगु दु । लिपा थःगु जीवनया अन्तिम इलय्‌ तकं कलानीधि इन्दिरा संगीत प्रतिष्ठानय्‌ आवद्ध जुयादीम्ह वय्‌कः स्वँय्‌ क्यान्सर जूगुया हुनिं ने.सं. ११३६ सिल्लागाः दुतिया, बुधबारखुन्हु सुथसिया १ ताःति इलय्‌ थ्व संसारं तापाना वन ।

नांजाःम्ह गायक पन्नाकाजी शाक्य वि.सं. १९८८ स ओमबहालय्‌ बूगु खः । वय्‌कःया मां बालकुमारी शाक्य व बाः चतुरमान शाक्य खः । नेपाः व खस नेपाली भाषाय्‌ वय्‌कःया यक्व लोकंह्वाःगु म्ये दु । ‘ताः दत मखनागु ल्वःमन ला रतन’, ‘वा माया वा वा जिमिथाय्‌ लाछिइ वा’ थें ज्याःगु वय्‌कःया म्ये तसकं लोकंह्वाः । खस नेपाली भाषाय्‌ वय्‌कःया म्ये ‘तिरिरि मुरली बज्यो बनैमा’ तसकं लोकंह्वाःगु म्ये खः । वय्‌कः थःगु इलय्‌ नांजाःम्ह कलाकार नं खः । वय्‌कःया निम्ह काय्‌पिं प्रवेशमान शाक्य व पवित्रमान शाक्य नं लोकंह्वाःपिं म्येहालामिपिं खः । गायक पन्नाकाजिं संगीत ख्यलय्‌ यानादीगु योगदानया निंतिं थीथी सिरपाः, मानपदविं विभूषित जुयादीगु दु ।

बौ बुद्धिवीर सिंह कसाः व मां रत्नदेवि कसाःया काय्‌ भाजु पवित्र वीर कंसाकार (पवित्र कसाः)या जन्म ने.सं. १०८७ प्वहेलाथ्वः पंचमि, आइतबारकुन्हु जूगु खः । नेवाः म्ये हालेगु व लसय्‌ हनेगु प्रतिभा दुम्ह वय्‌कः नेपाल लिपिया संरक्षण व विकासया ज्या, नेवाः साहित्य व नेवाःम्ये च्वन्ह्याकेगु ज्यालिसें नेवाः संकिपा च्वन्ह्याकेगु ज्या याना च्वनादीम्ह संगीतकःमि जुयादी । वय्‌कलं थीथी एफएम रेडियो व टेलिभिजनय्‌ नं नेपालभाषाया ज्याझ्वः न्ह्याका दीधुंकूगु दु । थौंतक सत्यापु नेवाः म्ये हालेगु व ४० पु म्येय्‌ लय्‌ तया दीधुंकूम्ह भाजु पवित्र कसाः नेवाः संकिपा ‘राजमति’या नं छम्ह पार्श्वगायक जुयादी । अंग्रेजी व हिन्दि म्येया लसय्‌ नेवाः म्ये हालादीगुलिइ नं भाजु पवित्र कसाः छम्ह न्ह्यलुवाः खः ।
बिसं. २०४९ पाखे वय्‌कलं पासापिंलिसे जानाः ‘द स्नोमेन’ नांया सङ्गीत पुचः नीस्वना दिलसा नेवाः म्ये छपु नं दुगु खस नेपाली भाय्या ‘प्रथम’ नांया छगू एल्बम पिथनादिल । वय्‌कलं लसय्‌ चिनाः हालादीगु रक एण्ड रोल पहःया दकलय्‌ न्हापांगु नेवाः म्ये ‘मिखा बालाबाला, सँ कुलिकुलि’ तसकं लोकंह्वाःगु म्ये खः । नेपालभाषाया म्ये लसय्‌ हनेगु वय्‌कःया प्रतिभाकथं उबलय्‌ थीथी क्याम्पसय्‌ दुगु नेपालभाषा पुचलं न्ह्याकूगु नेपालभाषा म्ये धेंधेंबल्लाः कासाय्‌ वय्‌कलं लसय्‌ हनादीगु व हालादीगु म्येयात तःक्वः न्हाप सिरपालं छाय्‌प्यूगु दु । विसं २०५० पाखे अंग्रेजी सङ्गीत पुचः ‘त्जभ द्यभबतभिक’ या म्येया लसय्‌ नेवाः म्येग्वः तयाः छगू एल्बम ‘नेवाः वितल्स’ पिदन । नेपाः देसय्‌ जक मखु भारतया दार्जिलिङ्, कालिबुङ आदि नेवाः बस्तिइ तसकं लोकंह्वाःगु थ्व एल्बमया छम्ह मू म्येहालामि भाजु पवित्र कसाः जुयादी । वय्‌कलं अंग्रेजी जक मखु हिन्दि भाय्या म्येया लसय्‌ नं यक्व नेवाः म्ये हालादीगु दु ।
त्रिभुवन विश्वविद्यालयपाखें विज्ञानय्‌ स्नातक तगिं तक ब्वनादीम्ह भाजु पवित्र कसाः थौंकन्हय्‌ भानु मा. वि. दरबार हाइस्कुलय्‌ नेपालभाषाया स्यनामि जुयादी । इलं लाःबलय्‌ वय्‌कः थःपिनिगु पुर्ख्यौलि कापः पसलय्‌ नं बनेज्या यानादी । व थेंतुं नेपाल लिपि गुथिलिसे ह्वनाः वय्‌कलं नेपाल लिपि स्यनेज्यालिसें लिपि संरक्षण व विकासया ज्या यानादी ।
नेवाः संगीत ख्यलय्‌ वय्‌कःया योगदानयात च्वछासे नेपालभाषा एकेदेमिया ‘दान्यहिरा हःपाः सिरपाः’, मंकाः धुकू बचत तथा ऋण सहकारी संस्थाया ‘तिर्थहेरा सिरपाः’, उदाय्‌ समाजया ‘रमेश ताम्राकार संगीत सिरपाः’लिसें तःगू क्याम्पसया धेंधेंबल्लाःया सिरपालं भाजु कसाःयात छाय्‌पीधुंकूगु दु । रेडियो ज्याझ्वः न्ह्याकामिकथं नं वय्‌कःयात तःगू हनापौ लःल्हायेधुंकूगु दु ।

पूर्णमान शाक्य डिस्क रेकर्डया जमानाय्‌ थःम्हं हे म्ये च्वयाः लय्‌ तया हालिम्ह छम्ह स्यल्लाम्ह संगीत सर्जक खः । थ्वय्‌कःया जन्म ने.सं. १०२३ बछलाथ्वः स्वांयापुन्हि, सोमबारखुन्हु येँया लगं त्वालय्‌ जूगु खः । थ्वय्‌कः अबु दानमुनि शाक्यभिक्षु शाक्यया न्हापांम्ह काय्‌ खः ।
थ्वय्‌कः मचाल्याय्‌म्हबलय्‌ निसें हे त्वाःत्वालय्‌ वनाः भजन हालाजुइम्ह खः । लिसें संगीतकःमिपिनिगु संगतं याना २५ दँया बंैसय्‌ हे संगीतया यक्वं ज्ञान मुनादिल । मचाबलय्‌ हे मां मदुम्ह थ्वय्‌कःया चिरिमांपाखें नं निम्ह काय्‌ व छम्ह म्ह्यााय्‌ दु । थ्वय्‌कःया गणेशमायालिसें ब्याहा जुयाः छम्ह काय्‌ नं दु । लिपा थः कलाः मदयेधुंकाः थ्वय्‌कः काय्यात त्वःताः वि.सं. १९८५ पाखे थ्वय्‌कः याकःचा कलकत्ता झाल । अन च्वनाः वय्‌कलं अटोमोबाइलया ज्या सयेकाः थीथी कम्पनीइ ज्या न्ह्याकादिल । ज्यालिसें भारतया थीथी थासय्‌ वना थःगु सांगीतिक प्रतिभा ब्वयेगु नं यानादिल । लिसें अनया संगीत विद्वानलिसें संगत नं दयेका जुल । सन् १९२९ सालय्‌ कलकत्ताय्‌ व लिपा दार्जिलिङय्‌ जूगु अखिल भारतीय बौद्ध महासभाय्‌ थःगु प्रतिभा ब्वयादिल । उगु महासभां वय्‌कःयात ‘बौद्ध संगीत विशारद’ पदं हंगु दु । कम्पनीया ज्या त्वःताः वय्‌कलं थःगु पुर्ख्यौलि ज्यासःज्यालिसें ल्हासां वइगु सामानत मीगुकथं अन हे छगू कुथि चायेकाः ज्या न्ह्याकादिल ।
वय्‌कः च्वनीगु माधव भवनय्‌ हे श्री भद्रकालि हाउसया ज्याकू दुगुलिं उकिया साहुपिंलिसें स्वापू नं तयादिल । अले ने.सं. १०५५ पाखे थःगु सिर्जनाया म्येत डिस्क रेकर्डय्‌ भरे यायेत वय्‌कः ताःलात । थ्वय्‌कःया म्येया रेकर्डत पिदनेवं तसकं बय्‌बय्‌ जुल । उकिसनं झी नेवाः ख्यलय्‌ नं बय्‌बय्‌ जुल । छाय्‌कि, वय्‌कलं ‘नेपालभाषा’ धैगु खँग्वः छ्यलातःगु न्हापांगु नेवाःम्ये नं रेकर्ड यानादीगु खः । नेवाःलिसें थ्वय्‌कःया खस भाय्या म्येत आपालं चूगु नं खः उगु इलय्‌ । थ्वय्‌कःया आःतक्क सीदुकथं नेवाःम्ये च्यापु– ‘गुल्त बांलाः नेपालभाषा सरल अति ल्हाये नं अःपु, ‘चन्चल मन जिगु गुबलें थीर मजुल’, ‘हथाय्‌ चाय्‌ मते प्राण’, ‘हे सखी जोबन रत्न समान’, ‘छिन जितः वाइ मताया रे कृष्ण’, ‘गथे यानाः खुसि याये मोहन रुप छिगु’, ‘आव खुन्हु चेते जुया भिंगु’, ‘हे नर वनेनु इश्वरया सरन’ व खसम्ये झिपुति दु । थ्वय्‌कलं हालादीगु लोकंह्वाःगु म्येत मध्ये हिनादेबीलिसें जानाः हालादीगु म्ये ‘प्रेमको झोली प्रेमको बोली’ मिसा व मिजंया सलय्‌ नेपाःया न्हापांगु ज्वःम्ये नं खः । वय्‌कलं संगीत ख्यलय्‌ बय्‌बय्‌ जूम्ह थ्वय्‌कः तबला थायेगुली नं पोख्तम्ह खः ।
संगीतया ज्ञान व खुबीया हुनिं श्री भद्रकालि हाउसया हामापिन्सं थ्वय्‌कःयात अन संगीत निर्देशकया भाला नं बिल । थ्वय्‌कलं नेपालं अन वयाः म्ये रेकर्ड याःवइपिन्त संगीत संयोजन यायेगु, म्ये हालीपिन्त माइकय्‌ गुकथं म्ये हालेगु धकाः नं स्यनाबीम्ह खः । अथेहे नेवाः व खस म्ये हालीपिं विदेशी म्येहालामिपिन्त भाय्‌ नं स्यनाबीम्ह खः ।
कलकत्ताय्‌ झिंप्यदँ च्वनेधुंकाः निक्वःगु विश्वयुद्धया हुनिं सन् १९४२ फेब्रुवरीपाखे थ्वय्‌कःपिं सदांया निंतिं कालिपोङय्‌ च्वंझाल । कलकत्ता त्वःताः वयेधुंकाः थ्वय्‌कःयात आर्थिक अवस्थां क्वत्यला हल । उगु इलय्‌ कालिपोङय्‌ शास्त्रीय संगीतया ज्ञाता वय्‌कः छम्ह हे जक खः । अथे जुया वय्‌कःयात अनयापिं मनूतय्‌सं म्हसिया वल । लिपा थः च्वनागु छेँय्‌ हे सन् १९४८ पाखें संगीत भवन चायेकाः संगीतया ज्ञान म्येपिन्त इनेगु ज्या न्ह्याकादिल । थ्वय्‌कलं कलकत्ताय्‌ च्वनाच्वंबलय्‌ हे वि.सं. १९८९ पाखे निब्याहाः यानादिल । वय्‌कःया तिरिमय्‌जु कलकत्ताय्‌ च्वनाच्वंम्ह ल्हासा ब्यापाःया साहु महाधर तुलाधरया म्ह्याय्‌ धनलक्ष्मी खः । थ्वय्‌कःपिंपाखें प्यम्ह काय्‌ व छम्ह म्ह्याय्‌ दु । शाक्य कूलम्हं तुलाधर जात इहपिाः याःगुलिं नेपालय्‌ अबुया स्वयेमयः । अथेसां लिपा मस्त दयेधुंकाः खँ सामसुम जुल । सन् १९५७ नोभेम्बरं नेपाः वयाः देखा कयाः लिहां झाल । थ्वयां दच्छिति लिपा पिसाब सम्बन्धी ल्वचं कयाः वासःतास याः जुल । अन ल्वय्‌ लंके मफयाः वैद्य क्यनाः वासः यायेत मोहनिया इलय्‌ नेपालय्‌ झाल । थन च्वनाः वासः याकुंयाकुं थ्वय्‌कः ने.सं. १०८० प्वहेलागाः दुतिया, सनिबारखुन्हु छेँय्‌सं मदुगु खः ।

‘धेधेचुल पासा’ जेम्स प्रधानया सलय्‌ थ्वःगु थुगु म्ये नेपालभाषाया अतिकं लोकंह्वाःगु म्ये खः । थुकथं हे ‘मुक्ति एण्ड रिभाइभल’ ब्याण्डया ‘चौबन्दी चोलो’ नं नेपाःया संगीत ख्यलय्‌ सदां लुयाच्वनीगु म्ये खः । थजाःगु म्येया च्वमि प्रकाश ‘दीप’ (प्रकाशकुमार श्रेष्ठ) अबु सुशिलकुमार श्रेष्ठ व मां छोरीदेवी श्रेष्ठया कोखं ने.सं. १०७८ सिल्लाथ्वः तृतिया, बुधबारखुन्हु येँया खिचापुखुली जन्म जुयादीम्ह खः । थौंकन्हय्‌ बाफल, कोहिनूर हाउजिङय्‌ च्वनादीम्ह वय्‌कलं २०३२ सालंनिसें म्ये च्वज्या न्ह्याकादीगु खःसा नेपालभाषा व खस नेपाली भासं ३०० पु सिबें अप्वः म्ये च्वयादीगु दु ।
२०४५ सालय्‌ रेडियो नेपालय्‌ रेकर्डिङ जूगु सपनाश्रीया सलय्‌ मदन परियारया संगीतय्‌ ‘रोपीसकेँ आशाको फूल’ वय्‌कःया न्हापांगु रेकर्ड जूगु म्ये खः । २०५१ सालय्‌ नेपालभाषाया म्ये ‘भुतुमालि ब्वयेकाः जिगु मन ख्वयेका’ म्ये श्रीजना श्रेष्ठ व किरण कपालीया सलय्‌, अष्टमान पलाञ्चोकेया संगीतय्‌ रिमिझिमि क्यासेट ब्व २ स पिदंगु दु ।
नेपालभाषाया म्ये ‘धेधे चुल पासा’ २०५५ सालय्‌ पिदंगु म्ये खः । वय्‌कलं ‘कारखाना’ खस नेपाली भाय्या संकिपाय्‌ ‘पल त्यो कस्तो पल’ म्ये नं च्वयादीगु दुसा भिडियो संकिपा ‘विध्वंस’य्‌ ‘घिन्ताङ घिन्ताङ’ म्ये च्वयादीगु दु । वय्‌कःया आःतक ११० पु म्ये रेकर्ड जुइधुंकूगु जुल ।
ने.सं. ११३१ स म्येमुना ‘धेधे चुल पासा’, ने.सं. ११३८ स ‘मिखा भाय्‌’, २०७५ सालय्‌ ‘गोरी गोरी अलि काली काली’, ‘परदेशी दाजै’, ‘चौवन्दी चोलो’ दुथ्याकाः खस भाय्या म्येमुना (सिडी) पिथनादीगु खःसा नेपालभाषाया ८ पु यानाः मुक्कं १६ पु म्येया म्युजिक भिडियो नं पिथना दीधुंकूगु जुल ।

प्रकाश श्रेष्ठ नेपाःया संगीत ख्यलय्‌ छम्ह लोकंह्वाःम्ह म्येहालामि खः । थ्वय्‌कः ने.सं. १०७७ प्वहेलागाः त्रयोदसि, सोमबारखुन्हु वीरगञ्जय्‌ जन्म जूगु खः ।
थ्वय्‌कः वरिष्ठ संगीत सर्जक भीम विरागया हःपालं संगीत ख्यलय्‌ दुहां झाःगु खः । वि.सं. २०३० सालपाखें निसें संगीत ख्यलय्‌ सक्रियम्ह थ्वय्‌कलं स्वर परीक्षा हे मब्यूसें रेडियो नेपालय्‌ थःगु म्ये रेकर्ड यानादीगु खः । थ्वय्‌कःया आपालं म्येत लोकंह्वाः । उकी मध्यय्‌ ‘सफल तिम्रो त्यो जिन्दगीलाई’, ‘गहिराईमा डुब्दै नडुब’ नं खः । थ्वय्‌कलं लोक, आधुनिक, भजन व थीथी विधाय्‌ द्वःछिं मल्याक म्ये हाला दीधुंकूगु दु । संकिपाय्‌ नं सलंसः म्ये हालादीगु दु । वय्‌कःया झिंन्याचालं मल्याक म्येचाःत पिदंगु दु ।
थ्वय्‌कः भारतया इलाहावादं संगीत प्रभाकर यानादीम्ह खः । थ्वय्‌कलं ‘ख्वये वइबलय्‌ मन याउँसे च्वंसा’ (च्वमि दुर्गालाल श्रेष्ठ, लय्‌ न्ह्यू बज्राचार्य), ‘सतिनाः जिनाप वःसा मतिना ह्वइ फसय्‌सं’ (मिरा राणानापं, च्वमि भूषणप्रसाद श्रेष्ठ, लय्‌ द्वारिकालाल जोशी), ‘गुलि न्ह्यैपु फय्‌ थ्व वःगु’ (मिरा राणानापं, च्वमि दुर्गालाल श्रेष्ठ, लय्‌ द्वारिकालाल जोशी), ‘सुख यः न्ह्याम्हेस्यां सुख यः’ (संगीता शाक्यनापं, लय्‌ मानकृष्ण वा वा), ‘थः धाःपिन्त म्हिगः छ्वासलय्‌ वाना’ (च्वमि यसराज, लय्‌ सुमन कपालि) थें जाःगु नेपालभाषाया नं लोकंह्वाःगु म्येत हालादीगु दु । थ्वय्‌कलं ने.सं.११०८ स नेवाः दबुली म्ये हालादीगु खः ।
थ्वय्‌कलं वीरगञ्जया ठाकुरराम कलेजं वाणिज्यय्‌ स्नातक यानादीगु खः । लजगाःकथं उबलय्या नेपाल वायुसेवा निगमय्‌ ज्या यानादीगु खः । संगीत ख्यलय्‌ वयेन्ह्यः थ्वय्‌कः नेपाःया राष्ट्रिय कासामि नं खः । टेबुलटेनिस व क्रिकेट कासाय्‌ थ्वय्‌कःया दख्खल दु । थ्वय्‌कःयात प्रवल गोरखा दक्षिणवाहु पदकलिसें आपालं मान, सम्मान व पदवी छाय्‌पियातःगु दु ।

प्रवेशमान शाक्य
वरिष्ठ गायक प्रवेशमान शाक्य अबु पन्नाकाजी शाक्य व मां ज्ञानदेवी शाक्यया कोखं ने.सं. १०८२ थिंलागाः पारु, सुक्रबारखुन्हु बूगुु खः । रेडियो नेपालं २०४५ सालय्‌ स्वर परीक्षाय्‌ ताःलाका दीम्ह वय्‌कःया नेपालभाषाया म्येमुना ‘लसकुस’ व ‘कलश’ पिदंगु दुसा खस नेपाली भासं झिगुलिं मल्याक म्येचाः पिदंगु दु ।
वय्‌कलं ‘किसि न्याइम्ह मदनमान’, ‘ख्वताबजि’, ‘२४ लाइभ शो’य्‌ प्याखं नं म्हितादीगु दुसा नेपालभाषाया संकिपा ‘मतिनाया कलि’, ‘बांलाःमय्‌जु’, ‘गज्याः गज्याःपिं मनूत दु’, ‘याकः मिसा’या लिसें थीथी खस नेपाली भाय्‌या संकिपाय्‌ पाश्र्वगायन नं यानादीगु दु ।
कलिउड फिल्म अवार्ड, इमेज अवार्ड, जीवन्त संस्कृति संरक्षण समाज, नेपाल खड्गी सेवा समितिपाखेंं नेपाःया संगीत ख्यलय्‌ यानादीगु योगदानया कदर यासें हना, हलिं नेवाः दबूपाखे रमेश ताम्राकार लुमन्ति सिरपाःपाखें सम्मानित जुयादीम्ह म्येहालामि शाक्यं एकल साँझ ज्याझ्वः नं यानादीगु दु ।