येँया केलत्वालय् अबु नन्दलाल श्रेष्ठ व मां चन्द्रकुमारी श्रेष्ठया कोखं ने.सं. १०२२ स जगतलाल श्रेष्ठया जन्म जूगु खः । थ्वय्‌कः नेपालभाषाया प्यंगः थां मध्ये छगः थां जुयादीम्ह जगतसुन्दर मल्लया छम्ह सच्चाम्ह शिष्य खः । थः गुरु जगतसुन्दर मल्लया आदर्शयात अनुशरण यासे मस्तय्‌त नेपालभाषां आखः स्यनेगु ज्याय् न्ह्यच्यूपिं जगतसुन्दर मल्लया शिष्यपिं मध्ये थ्वयकः नं छम्ह खः ।

थ्वय्‌कलं सर्वसाधारणया मचातय्‌त आखः ब्वंकीगु ब्वनेकुथि मदुगु राणाशासन कालय् थःगु छेँय् हे ब्वनेकुथि चायेकाः शिक्षाया जागरण हयादिल । थुलि जक मखु अंग्रेजी शिक्षाया प्रचलन मदुगु इलय् नेपालभाषाया नापं अंग्रेजी भाषा ब्वंकाः नेपालभाषाया नापं अंग्रेजी भाषाया प्रचार प्रसार यानादिल । नापं मचातय्‌त ब्वनेगु नितिं मचासाहित्यया अभाव महशुस यानाः थम्हं हे मचासफू च्वयाः पिकयादिल ।

थ्वहे कथं वय्‌कलं ने.सं. १०६९ इ जगत–वर्णमाला (ने.सं. १०७०), मचा बाखं (ने.सं.१०७१) व पुलां बाखं पिथनादिल । अथेहे अंग्रेजी भाषा स्यनेत English Grammar in Nepal Bhasa सफू नं पिथनादिल । थथे नेपालभाषाय् मचा साहित्य निर्माण याःपिं अग्रज स्रष्टापिं मध्ये थ्वय्‌कः नं छम्ह खः । थ्वय्‌कःया थज्याःगु ज्यायात कदर यानाः ने.सं. १०८३ स च्वसापासां थ्वय्‌कःयात भाषाजवाः उपाधिं छायेप्यूगु खः ।

डा. अजय क्रान्ति शाक्यया जन्म August 22, 1968य् मां सरस्वती देवी शाक्य तथा अबु रत्नकाजि शाक्यया कोखं येँया लगं त्वालय् जूगु खः । बौद्ध अध्ययन विषयय् लुम्बिनी बौद्ध विश्वविद्यालयं विद्यावारीधी यानादीम्ह थ्वय्‌कः छम्ह बहुआयामिक व्यक्तित्व खः । नेपाःया राजनैतिक, सांस्कृतिक, साहित्यिक भाषिक ख्यलय् सक्रिय जुयादीम्ह थ्वय्‌कः बागमति प्रदेश सरकारया आन्तरिक मामिला तथा कानुनमन्त्री, बागमती प्रदेशया सांसद नं जुयादीधुंकूगु दु । अथेहे थ्वय्‌कः बौद्धधर्म व बौद्ध संस्कृति विषयया नं छम्ह नांदंम्ह च्वमि नापं छम्ह नेवाः अभियन्ता नं खः । अंग्रेजी, नेपाली व नेपालभाषा स्वतां भाषां च्वसा न्ह्याःम्ह थ्वय्‌कःया गोरखापत्र, कान्तिपुर, नेपाल पोष्ट, विश्वभूमि आदि पत्रपत्रिकाय् थीथी विषयया समसामयिक च्वसुया नापं कविता आदि नं पिदंगु दु । सफूया रुपय् थ्वय्‌कःया बौद्ध दर्शन व संस्कृति विषयया सफू म्भबतज च्ष्तभक या ज्यगकभजयमि एचष्भकत, त्जभ क्बपथबक, द्यबजष्क या प्बलतष्उगचू आदि अनुसन्धानमूलक ग्रन्थया नापं रुमल्लीएको जिजिबिसा कविता संग्रह (नेपाली भाषं), जि मैन थें नायावने सायरी संग्रह (नेपालभाषां) पिदंगु दु ।

नेपालभाषाया भाषिक क्रियाकलापय् ने.सं. ११०० निसें सक्रिय जुयादीम्ह थ्वय्‌कःया संगीत व लसय् १५ पु स्वयाः अप्वः नेपालभाषाया म्ये रचना जूगु दुसा अल्बमया रुपय् छन्त ययेकेधुंकाः (वि.सं. २०४९.), लँजुवाःया म्ये (वि.सं २०१५.), जिगु मन (वि.सं. २०५३), जिगु जिन्दगी (वि.सं २०५७) यानाः प्यंगू म्येचाः पिदंगु दु । अथेहे थ्वय्‌कः भिंतुना सनिल ज्याझ्वःया संयोजकया नापं निर्देशक नं खः । नेपाली भाषाय् नं थ्वय्‌कलं थीथी डकुमेन्ट्रीया निर्देशन यानादीगु दु । अथेहे थ्वय्‌कः थीथी सामाजिक, भाषिक व धार्मिक आदि संस्था गथे — धर्मोदय सभा, शाक्य फाउण्डेशन, शाक्य समाज नेपाल, नेपाल क्यान्सर रिलिफ समाज आदिया जिवंकाःछि दुजः जुयादीगु दुसा गणेश युवा क्लव, बोडीग्राम फाउण्डेशनया सल्लाहकारजुयाः भाषिक, सामाजिक ख्यलय् थम्हं फुगु योगदान बिया वयाच्वनादीगु दु ।

डा. अञ्जान शाक्यया जन्म ई.सं १९७३ अक्टोवर २७ स मां तारादेवी शाक्य व बौ डिल्ली रत्न शाक्यया कोखं येँया न्हूसतकय् जूगु खः । भारतया अलाहवाद सगीत विश्वविद्यालयं बी.म्यूज व त्रिभुवन विश्वविद्यालयं व्यवस्थापन विषयस विद्यावारीधि डिग्री हासिल यानादीम्ह डा. अञ्जान शाक्य स्वदेशी विदेशी विश्वविद्यालयय् प्राध्यापन, नेपाल सरकारया थीथी उच्च पदय् नापं इजरायलया नितिं नेपाःया राजदूत जुयाः ज्या यानादीधुंकूम्ह व्यक्तित्व नं खः । थ्वहे कथं वय्‌कलं नेपाः व इजराल, नेपाः व भारत, नेपाः व चीन आदि देय्नापया कुटनैतिक स्वापूयात कयाः सफू च्वयेगुया नापं थीथी सफूया सम्पादन नं यानादीगु दु ।

मय्‌जु शाक्य नेपाःया छम्ह नांदंम्ह लोकंह्वाःम्ह म्ये हालामि नं खः । नेवाः संगीत तथा नेपालभाषाप्रति मचांनिसें मन क्वसाःम्ह मय्‌जु शाक्यं थीथी नेपालभाषाया ज्याझ्वःस नेवाः म्ये हालाः ज्याझ्वः झःझः धायेकादीगु दुसा थ्वय्‌कःया सलय् १२ पु स्वयाः अप्वः नेवाः म्ये रिकर्ड जूगु दु नापं म्येचाः नं पिदंगु दु । अथहे थ्वय्‌कलं नेपालभाषाया थीथी भाषिक आन्दोलनय् नं साथ बियादीगु दु । थ्वय्‌कःया ज्या तथा योग्यताया कदर स्वरुप Ambassador/Diplomat of the Year 2019/2020, नेपाल विद्याभूषण ‘क’, गोरखा दक्षिणबाहु आदि थेंज्याःगु बागू दर्जन स्वयाः अप्वः मानपदवी प्राप्त जूगु दु ।

ने.सं.१०७७ य् झोछेँ येँय् जन्म जुयादिइम्ह डा. अरुण सायमिया मां वसुन्धरा साय्‌मि व अबु नांदंम्ह उपन्यास सम्राट धुस्वां साय्‌मि खः । भाजु अरुण साय्‌मि छम्ह नांदंम्ह चिकित्सक व मुटुरोग विशेषज्ञ खयांनं थ्वय्‌कःया नेपालभाषां स्वंगू, नेपालीं स्वंगू उपन्यास, छगू कविता संग्रह, छगू गीति एल्बम, न्यागू निबन्ध व लेख संग्रह, निगू चिकित्सा सम्बन्धी सफू नापं यानाः १५ गुलिं मयाक सफू पिदने धुंकूगु दु ।

अबु धुस्वां सायमिं ‘गंकी उपन्यासया बच्छि च्वमि ला जिमि जहान वसुन्धरा खः’ धकाः न्ह्यथना दिइथें अबुया साहित्यिक किचः अरुणयात बांलाक लाःगु खनेदु । मनमोहन कार्डियोथोरासिक भास्कूलर तथा ट्रान्सप्लान्ट सेन्टरया संस्थापक बोर्ड अध्यक्ष नापं गंकी धुस्वां वसुन्धरा प्रतिष्ठानया अध्यक्ष जुयादीम्ह वय्‌कःया साहित्य ख्यलय् न्हापां रोमान्टिक उपन्यास पिदंगु खःसा लिपा प्रगतिशील विचारधारायापिं व्यक्तित्वपिं मनमोहन अधिकारी, बाबुराम भट्टराई आदिपिनिगु संम्पर्कं वय्‌कःया च्वसा जनपक्षिय लेख च्वयेगु पाखे न्ह्यात । उकीसनं थः आत्मीय पासा पूर्व प्रधानमन्त्री डा. बाबुराम भट्टराईलिसेया सामिप्यतां झन् हे वय्‌कःयात राजनीतिया फसं अप्वः कल । थ्वय्‌कलं नेपालभाषाय् हाकुताँ उपन्यास १८ दँ जक दुबलय् च्वयादीगु खःसा लिपा वँचु मिला, ह्याउँस्वां उपन्यास पिदन ।

अथेहे नेपालीं भाषाय् मर्दीको किनारमा, रातो टीका, आस्था उपन्यास पिदंगु दु । अथेहे अरुण गीति एल्वम, तिमीलाई निवन्ध/लेख संग्रह मुना १९ जेठ २०५८ पछि, डाक्टरको रोडम्याप, मेरा आँखामा जन आन्दोलन–२०६३, दुई ब्यालेट चौतर्फी आक्रमण, दरवार हत्याकाण्ड पछि जनविद्रोह सम्म, मेरो आत्मकथा (२०७५) नापं चिकित्सा सम्बन्धी सफूत नं पिदंगु दु । डा. अरुणं थःगु योग्यताया कदर स्वरुप थीथी सिरपाः पदक प्राप्त यानादीगु दु । गुगु थथे दु— एस.एल.सी.बोर्ड सेकेण्ड स्वर्ण पदक, शिक्षा पुरस्कार, सुप्रबल जनसेवाश्री, नातिकाजी सङगीत विशेष सम्मान, राष्ट्रिय युवा प्रतिभा पुरस्कार, कोइलीदेवी प्रतिष्ठान सम्मान पुरस्कार, फेलो अफ अमेरिकन कलेज अफ कार्डियोलोजी, फेलो अफ कलेज अफ एसिया प्यासिफिक कार्डियाक सोसाइटी आदि ।

डा. अशोक राजवंशीया जन्म वि.सं २०१३ मंसीर २८ गते अबु भवानी शंकर राजवंशी व मां जयन्ति राजवंशीया कोखं येँया चिकंमुगः त्वालय् जूगु खः । भूगोल विषयया प्राध्यापन यानादीम्ह थ्वय्‌कलं पिनेलाःगु शहरी क्षेत्रय् च्वनीपिं सीमान्तकृत पुचःतय्‌गु दीगो जीबिकोपार्जनया स्वरुप विषयस विद्यावारीधि यानादीगु खः । थ्वय्‌कः छम्ह भूगोलया शिक्षक जुयाः नं नेवाः जाति, नेपालभाषा तथा नेवाः संस्कृतिप्रति मनक्वसांम्ह नेवाः अभियन्ता खः । थःगु स्कूल जीवनं निसें थीथी भाषिक, साहित्यिक, सांस्कृतिक ज्याखँय् ब्वति कायेगु यानादीम्ह थ्वय्‌कःया नेपालभाषां भूगोल, दीगो जीबिकोपार्जन, नेवाः जनसंख्या आदि विषयया तःपु मछि च्वसु पलेस्वां व थीथी पत्रपत्रिकाय् पिदंगु दु । थ्वय्‌कलं म्हय्‌पी अजिमा संरक्षण व व्यवस्थापन समितिया छ्याञ्जे जुयाः झिदं मयाक ज्या यानादीगू दुसा थ्वय्‌कः नेपाल विद्याभूषण पदकं नं विभूषित जुयादीगु दु ।

साहित्यिक ख्यलय् आनन्द जोशी कथं नां जाःम्ह आनन्दराज जोशी, मां नारायणमाया जोशी तथा बौ डा. मंगलराज जोशीया कोखं यलया धलाय्‌चा त्वालय् ने.सं १०६८ स जन्म जूगु खः । डा. आनन्द जोशी नेपालभाषाया छम्ह अग्रज आधुनिक कवि खः । वातावरण व्यवस्थापन विषयस बिलायतं विद्यावारीधी यानादीम्ह डा. आनन्द जोशी थःगु कलेज जीवनं निसें नेपालभाषाया ख्यलय् च्वसा न्ह्याकाच्वनादीम्ह च्वमि खः ।

थ्वय्‌कःया न्हपां पिदंगु च्वसु मांया म्हगस (जः १/१, १०८३) नांगु कविता खः । आनन्द जोशी नापं नेपालभाषाया तत्कालिन युवा कविपिं मुनाः पिकाःगु नेपालभाषाया न्हापांगु आधुनिक कविता संग्रह गाजलं दाःगु चा (ने.सं १०८६) नांगु सफुलिइ थ्वय्‌कःया नं निपु कविता दुथ्याःगु दु ।

थः समकालीन आधुनिक कविपिनिगु दथुइ विद्रोह व बौद्धिकताया कवि कथं नां जाःम्ह आनन्द जोशीया दकले न्हापां पिदंगु कविता मुना कृति विस्थापित जि जि मखु (१११०) खः गुगु श्रेष्ठ सिरपाः त्याकेत ताःलाःगु सफू खः । नेपालभाषा,नेपाली तथा अंग्रेजी भाषं नं च्वसा न्ह्याकादीम्ह डा. आनन्द जोशीया नेपालभाषां — विस्थापित जि, जि मखु (१११०) कोशल्वहं (१११३), तज्याःगु फुजियामा : विद्रोहया छसः (ने.सं ११३३, ), जोशीया कविता … कविता ताल्जुइ (११२७) नापं यानाः प्यंगू कविता मुना सफू पिदंगु दु ।

वय्‌कःया आनन्द जोशीया कविता … कविता ताल्जुइ नांगु सफुलिइ केवल आनन्द जोशीया कविता जक मखु वय्‌कःया थीथी इलय् जूगु अन्तरवार्ता/वक्तव्य, नां जाःपिं समालोचकपिं  डा. जनकलाल वैद्य, कृष्णचन्द्र सिंह प्रधान, माधवलाल कर्माचार्य, इन्द्र माली, पुष्पबहादुर चित्रकार आदिपिनिगु समालोचनाया नापं थीथी व्यक्तिपिसं कवि आनन्द जोशी सम्बन्धी प्वंकातःगु धारणा दृष्टिकोण नं दुथ्याकातःगु सफू खः । थ्व सफुलिइ दुथ्याःगु च्वसुं केवल आनन्द जोशीया कवितायात जक मखु समकालीन कविताख्यःयात हे दुवालेगु ज्या जूगु दु ।

कवि आनन्द जोशी विशेषत मनू दुनेया मनूया अस्तित्व अन्वेषण यायेगुली थःगु हे बिस्कं छवि दुम्ह कवि खः । विद्रोह व बौद्धिक कवि कथं नांजाःम्ह वय्‌कलं कविताय् ब्वयादीगु विद्रोह, विद्रोहया निंतिं जक मजूसें सकारात्मक ह्यूपाःया निंतिं खः, न्हूगु मूल्य मान्यता स्थापित यायेगु नितिं खः । थ्व ह्यूपाः मानवीय मूल्यं अवमूल्यन मजुयेकेत, मनू मनू जुयाः म्वायेफयेकेगु नितिं खः । कवि आनन्द जोशी छम्ह विद्रोही कवि खया नं जीवनवादी कवि खः । जीवन गतिवान खुसिया रूपय् न्ह्यांवनेमाः धयागु कविया आशय खः । कवि आनन्द जोशी नेपाः दुनेया जक मखु हलिं न्यंकया थीथीकथंया न्हून्हूगु प्रतीक, बिम्ब छ्यला काव्याभिव्यक्ति बीम्ह कवि खःसा विद्रोह वय्‌कःया काव्यिक चेतनाया लिधंसा खः ।

आधुनिक कविताया ख्यलय् क्वात्तुक पलाः छिनादीम्ह आनन्द जोशीं लिपा वनाः हाइकु च्वयेगुली नुगः क्वसायेका दिल । वय्‌कलं हाइगु च्वयाः तःगू मछि हाइकु संग्रह पिकयादीगु जक मखुसे वय्‌कः हाइकु सम्बन्धी गहन अध्ययन यानाः हाइकुया सैद्धान्तिक पक्ष, नापं हाइकुया विशेषता, विस्तार, उपलब्धि आदि विषय सम्बन्धी ग्यसुग्यंगु च्वसु च्वयाः नेपालभाषाय् हाइकु साहित्य ब्वलंकेत अभिभावकीय भूमिका निर्वाह यानादीम्ह हाइजिन नं खः । वय्‌कःया पिदंगु हाइकु कृति खँग्वः सीमाहीन : सीमाहीन जि, न्हूगु दिशाय् जि : चेतनाया लबु (११३३), सर्गः थः हे विस्तृत (११३४), घालं बुइकूगु लँय् जि जिगु पलाः (११३५), तःभुखाय् (बिमल ताम्राकार नापं जाना, ने.सं ११३६) खः ।

थथे थःगु मांभाय् साहित्य च्वन्ह्याकेगु त तुनाः प्यंगू दशक न्ह्यवंनिसें च्वसा न्ह्याकादीम्ह आनन्द जोशीयात च्वसापासां श्रेष्ठ सिरपाः (१०९६) लःल्हाःगु दुसा त्रि.वि.विं महेन्द्र विद्याभूषण तथा अथेहे मेमेगु थीथी संस्था नं सम्मान तथा सिरपाः देछाःगु दु । भाजु आनन्द जोशी धयचमि उयभतुक क्यअष्भतथ या दुजः खःसा नेपाल वातावरणविद् संघया अध्यक्ष नं खः ।

चिकंबही, यलया वैद्य वृषमान वन्द्य व मां मुनिथकुं वन्द्यया क्वखं जन्म जूम्ह इन्द्रमान वैद्य शाक्य भिक्षु लिपा वैद्य इन्द्रमान नामं चर्चित जुल । ने.सं. १०१८ स जन्म जूम्ह वय्‌कः धर्मादित्य धर्माचार्यया दाजु खः । चिकित्सा सेवाया ज्या यानादीम्ह वय्‌कलं थीथी विधाया सफू नं च्वयादीगु दु ।

वय्‌कलं बौद्ध साहित्यय् अति लोकंह्वाःगु ग्रन्थ धम्मपद नेपालभाषां न्हापां अनुवाद यानादीगु खः । ने.सं. १०५० स पिदंगु थ्व सफू नेपालभाषाया बौद्ध साहित्यय् महत्वपूर्ण कृति खः । ने.सं. १०९५ स वय्‌कः दिवंगत जुयादिल ।

अथःननि यलय् ने.सं. १०२९ स अबु ज्योतिराज बज्राचार्य व मां राजमाया बज्राचार्यया क्वखं जन्म जूम्ह आशाकाजी बज्राचार्यया मेगु नां गणेशरत्न बज्राचार्य खः । बज्रयान, तन्त्रयातन, मन्त्रयान विषय अले चर्या म्ये व नृत्य विषय विशेषज्ञ जुयादीम्ह वय्‌कः बौद्ध ग्रन्थया च्वमि खः । वय्‌कः ब्याकरणविद् व आयुर्वेदिक शास्त्री नं खः ।

नीन्यागुलिं मल्याक सफू च्वयादीम्ह वय्‌कःया महत्वपूर्ण सफूत थथे दु— त्रिरत्न स्तोत्र (ने.सं. १०७२), बुद्ध वृष जन्म कथा दीपंखा (ने.सं. १०७२), नेपाल वर्ष क्रिया (नखःचखः), (ने.सं. १०७७), बुंगद्यः नेपालय् हःगु वंशावली (ने.सं. १०७५), महायान बुद्ध धर्म दर्शन (ने.सं. १०९१) बोधिसत्वावदन माला भाग १, २, ३ (ने.सं. ११०३–ने.सं. ११०५), पञ्चदान विधि (ने.सं. ११०२), सुवर्णनृपावदान (ने.सं. १११३) ।

वय्‌कःया ज्याया कदर यासें वय्‌कःयात अवदान रत्न उपाधिं छाय्‌पिउगु दु । ने.सं. १११३ स वसपोल दिवंगत जुयादिल ।

मां इन्द्रमाया सिन्केँ व अबु हिराबहादुर महांजुया कोखं नेपालसंवत् १०८० दिल्लाथ्व ११ मंगलवार खुन्हु लुभुया दबूछेँ त्वालय् ओमकारेश्वर श्रेष्ठ बूगु खः । स्थानीय नवजागृह परिवारया ग्वसालय् विसं २०२८ सालय् जूगु प्रगतिशील साहित्य सम्मेलननिसें चिनाखँ च्वयादीम्ह भाजु श्रेष्ठ मचांनिसें हे भाषा साहित्यय् नुगः क्वसाःम्ह खः । त्वाकः कविता (विसं २०३८) वय्‌कःया न्हापांगु प्रकाशित कविता खःसा असं छगू आणविक भट्टि (नेसं १११३) कविता संग्रह वय्‌कःया न्हापां पिदंगु सफू खः ।

भाजु श्रेष्ठं नेपालभाषा, अंग्रेजी तथा भाषाविज्ञान नापं यानाः स्वंगू विषयलय् स्नातकोत्तर यानादीगु दु। । वय्‌कलं नेपालभाषा केन्द्रीय विभागय् प्राध्यापनया नाप नापं थःगु अनुसन्धानया ज्या नं मदिक्क न्ह्याकांच्वनादीगु खः । भाजु श्रेष्ठ नेपालभाषा केन्द्रीय विभागया ने.सं. ११३८– ने.सं ११४१तक प्रमुख नं जुयादीधुंकूम्ह खः ।

वय्‌कलं ने.सं ११२० य् अंग्रेजी साहित्यय् एम.ए. यानादीगु झ्वलय् Verb Morphology in the Tansen Dialect of Nepalbhasha थेसिस च्वयादीगु खःसा ने.सं ११२४ स भाषाविज्ञानय् एम.ए यानादीबलय् A Sketch Grammar of Duku Danuwar Language – Dukaini थेसिस च्वयादीगु खः । थुकथं शैक्षिक गतिविधी पलाः तयादीम्ह भाजु श्रेष्ठ नेसं ११३२ य् पहरीभाषाया व्याकरण शिर्षकय् विद्यावारिधि यानादीगु खः ।

नेपालभाषाया भाषावैज्ञानिक अध्ययन यायेगु झ्वलय् वय्‌कलं नेपालभाषाया थीथी पक्षयात कुलादीगु दु । नेपालभाषाया हिज्जेया कचवंया दथुलँ पिकायेत वर्णविज्ञानकथं ए छ्यलेमाः धकाः नेपालभाषाय् ए वर्ण (सन् २०१६) सफू च्वयादीगु दु । लोप जुयाच्वंगु पुलांगु आखः लुइकेत तिर्यक कारक (पुलांगु स्वरुप) हे पित बीमाःगु वय्‌कःया धारणा दु । वय्‌कलं नेवाःतय्‌गु थीथी कुनां व थाय्‌बाय्‌या भाषावैज्ञानिक रुपं इतिहास मालेगु ज्या यानाच्वनादीगु दु । हरसिद्धिका परम्परागत स्थाननाम (नेसं ११४२) वय्‌कःया दकलय् लिपां पिदंगु सफू खः । नेपालभाषाया धातु क्वःछीगु समस्या (सन् १९९९), तानसेन नेवाः भाषिकाय् रुपायन पद्धति (सन् २००१), नेवाः लेखन प्रणाली (सन् २०१०), नेवाः भाय्‌या म्हिचा सफू (२०११), डुकुछापको दनुवार भाषा (सन् २०१३) वय्‌कःया प्रकाशित मेमेगु सफू खः । नेपालभाषा –अङ्ग्रेजी– नेपाली शव्दकोश निर्माणया ज्याय् कार्यकारी सम्पादक जुयादीम्ह भाजु श्रेष्ठया नेपालभाषाय् समाचार लेखनया निंतिं ग्वहालि जुइकथं समाचार सम्पादन कला (सन् २००१), सांस्कृतिक जानकारी बीकथंया भोतया चण्डेश्वरी जात्रा (सन् २००२) व राजनलाल (रास)जोशी लिसें जानाः लुँभुया अभिलेख मुना (सन् २०१३) सफू च्वयादीगु दु । अथेहे नेवार जातिको चिनारी, नेवाः लोकवार्ता, दनुवार लोकवार्ता लोकजीवन (सन् २००८) सफूया सहलेखक जुयादीम्ह भाजु श्रेष्ठया आपालं गोष्ठी पत्र व अनुवादया सफू नं पिदंगु दु । सिध्दिमाः (सिध्दिदासया समग्र च्वसु मुना), नेपालभाषा (नेपालभाषा केन्द्रीय विभागया जर्नल) लिपांगु वय्‌कलं सम्पादन यानादीगु दु । वय्‌कलं Chen Qingying जुं च्वयादीगु The incarnation system for Dalai Lama नांगु सफू नेपाली भासाय् दलाइ लामाको अवतारी प्रथा शीर्षक छुनाः अनुवाद यानादीगु दु ।

डा. श्रेष्ठ महेन्द्र विद्याभूषण क व ख, शिक्षा पुरस्कार, दीर्घसेवा पदक आदिपाखें छाय्‌पियादीम्ह व्यक्तित्व नं खः ।

मां तुल्सीमाया व बौ योगेन्द्र प्रकाश मल्लया क्वखं ने.सं. १०५६ कौलागा लक्ष्मीपुजा कुन्हु येँया थाय्मदु त्वालय् कमलप्रकाश मल्लया जन्म जूगु खः । वय्‌कलं विद्यार्थी कालंनिसें हे च्वसा न्ह्याकाः कविता, बाखं, च्वखँ च्वयेगु व भाय् हिलेगु यानादीगु खः । नेपालभाषाय् वय्‌कःया निपु कविता दकलय् न्हापां ने.सं. १०७७ स थौंकन्हे लय्‌पौ ल्याः ६/१ स पिदंगु खः । अथेहे वय्‌कःया क्वसः बाखं ने.सं. १०७८ या धर्मोदय ल्याः ११/१३३ स पिदंगु खः । वय्‌कः कलेजया विद्यार्थीकालय् थःगु छेँय् हे ज्याकू चायेकाः विद्यार्थी साहित्य मण्डल नीस्वनाः उकिया छ्याञ्जे जुयाः इलय् ब्यलय् वय्‌कलं साहित्यिक ज्याझ्वः न्ह्याकादिल । सिर्जनात्मक साहित्य च्वयेगुली च्वसा न्ह्यायेधुंकाः गम्भीरमान मास्के, अच्युतप्रसाद राजभण्डारी, चित्तधर हृदय, प्रेमबहादुर कसाःया प्ररेणां वय्‌कलं थःगु च्वसा समालोचना लेखनपाखे न्ह्याकादिल । वय्‌कःया दकलय् न्हापांगु प्रबन्धात्मक च्वसु कविताया मू ने.सं. १०८१ या ब्याहाँचुलि पत्रिकाया ल्याः १/१ स पिदंगु खः ।

नेपालभाषाय् प्रा.डा. कमलप्रकाश मल्ल वरिष्ठ समालोचक, बुद्धिजीवी, वरिष्ठ शिक्षाविद्, अनुसन्धानविद्, इतिहासकार, विद्वान कथं नांजाः । वय्‌कः नेपालभाषाया जक मखु नेपाःया हे छम्ह तःधंम्ह विद्वान, भाषाविद्, बुद्धजीवि कथं नांजाःम्ह व्यक्तित्व खः । अंग्रेजी विषयलय् एम.ए यानादीम्ह कमलप्रकाश मल्ल कलेजय् नेपालभाषा ब्वंकेगु यानादीपिं न्हापांपिं प्राध्यापकपिं मध्ये छम्ह खः। लिपा कमलप्रकाश मल्लं बेलायतया भ्मष्लदगचनज विश्व विद्यालयं ऋयगतझउयचबचथ mयमभकि या कतथष्कितष्अ बलबथिकष्क, ष्तिभचबचथ बलम ष्लिनगष्कतष्अ बलम तजभष्च उभमबनयनष्अ चभभिखबलअभ विषयय् सन् १९७४ य् विद्यावारिधि यानादिल । विद्यावारिधि उपाधि कयाः नेपाः लिथ्यने धुंकाः वय्‌कः सन् १९७७ य् त्रिभुवन विश्वविद्यालय् शिक्षाध्यक्ष पदय् नियुक्त जुयादीगु खः । वय्‌कलं सन् १९७६ निसें १९९५ या निगू दशकया दुने झिंखुगू थीथी अन्तर्राष्ट्रिय सम्मेलन व सेमिनारय् ब्वति कयाः कार्यपत्र न्ह्यब्वयादीगु खः ।

अंग्रेजी, नेपालभाषा तथा नेपाली स्वंगू भाषाय् नं च्वसा न्ह्याकादीम्ह वय्‌कःया नेपालभाषाय् पिदंगु सफू थथे दु : नेपालया प्राचीन भाषा नेपालभाषा (अनुवाद, ने.सं. १०९७), नेपालभाषा घ्वाना सफूया धलः ने.सं. १०२९–१०९७ (ने.सं. १०९९), सिकंमिया स्वांने (समालोचना, ने.सं. १०९८) पूर्वज लुमंकाः (ने.सं. ११००), नेपालभाषा घ्वाना सफूया धलः, निगूगु ने.सं. १०९८–११०४ (ने.सं. ११०४) आदि । थथेहे वय्‌कःया सिकंमिया स्वांने समालोचना संग्रह दुने दुथ्याःगु थीथी लेखं वय्‌कःया समालोचना पद्धति जक मखु नेपालभाषाया समालोचना साहित्यया इतिहास स्थिति ब्वयाब्यूगु दु । अथेहे नेपालभाषा घ्वाना सफूया धलः न्हापांगु व निगूगुया प्रकाशनं ने.सं. १०२९ निसें ११०४ तक पिदंगु १३०६ गू सफूया धलः पिदंगु दु । थ्व सफू धलखं नेपालभाषाया अध्ययन अनुसन्धान याइपिंत आपालं अःपुकाब्यूगु दु ।

अथेहे डा. कमलप्रकाश मल्लया सम्पादनय् नेपालभाषाया तःगू हे ग्यसुग्यंंगु सफू पिदंगु दु ।वय्‌कलं सम्पादन यानाः पिकयादीगु सफू खः— मूसः (निबन्ध, ने.सं. १०८४), लिसं (कविता मुना– कवि दुर्गालालया कविता, ने.सं. १०८०), नःलि स्वना (ने.सं. १०८७), नःलि कवि छगू विवाद, (ने.सं. १०८७), दि गोपालराज वंशावलि (इतिहासकार धनवज्र बज्राचार्य नापं अंग्रेजी अनुवाद नापं) ई.सं १९८५, अ डिक्सनरी अफ क्लासिकल नेवारी (सन् २०००) आदि । थथे वय्‌कलं सफू सम्पादन यानादीबलय् केवल औपचारिकता पूवंकेत जक सफूया भूमिका च्वयेगु मयासे व सफूया समिक्षात्मक परिचय नापं व सफू सम्बन्धी विधाया इतिहास तकं न्ह्यब्वयेगु वय्‌कःया समालोचनाया विशेषता खः । थ्वहे कथं वय्‌कलं सम्पादन यानादीगु मूसः – निबन्ध संग्रह दुने दुथ्याःगु भूमिकां व सफुलिइ दुथ्याःपिं निबन्धकारपिनिगु समिक्षा जक मखुसे नेपालभाषाया गद्य साहित्यया इतिहास नापं गद्य साहित्यया स्थिति तकं ब्वयेगु याःगु दु । वय्‌कलं सम्पादन यानादीगु मेगु सफू दि गोपालराज वंशावलि सफू नेपाःया प्राचीन इतिहासया अध्ययन अनुसन्धान यायेत ज्वः मदुगु ऐतिहासिक सामग्री खः । थुकिं कमलप्रकाश मल्लया इतिहासकारया व्यक्तित्व बांलाक उलाब्यूगु दु । अथेहे वय्‌कःया तःजिगु छगू योगदान वय्‌कःया मू सम्पादनय् च्वसापासापाखें पिदंगु पुलांगु नेवाः भाय्‌या स्वीछद्वः खँग्वः दुथ्याःगु शव्दकोश A Classical Newari Dictionary खः (थ्व कोश सफूया स्रोतं गुंगू पुलांगु हस्तलिखित ग्रन्थ खः) । थ्व सफूयात जापानया केश्जाम सिम्बन संस्थां च्वसापासायात ई.सं २००१ या निकि एशिया सिरपाः स्वरुप ख्वीगू लाख येन (नीन्याद्वः डलर) ६ जून २००१ स टोकियोय् लःल्हाःगु खः ।

डा. कमलप्रकाश मल्लया नेपालभाषा व नेपाल सम्बन्धी अंग्रेजी भाषं नं तःगू सफू पिदंगु दु । गथे – नेवारी ल्यांग्वेज अ वर्किङ आउटलाइन, क्लासिकल नेपाल लिटचरेर : अ स्केच, काठमाडौं एयर काठमाडौं, नेपाल पर्सपोक्टिभ अन कनटिन्यूटि एण्ड चेञ्ज, इंग्लिस इन नेपालिज एजुकेशन, द फस्ट नेशनल कन्फरेन्स अफ कलेज टिचर अफ इंग्लिस आदि । अथेहे थीथी अंग्रेजी भाषाया जर्नलय् नं वय्‌कःया तःपु हे अनुसन्धानमूलक लेख पिदंगु दु । थुपिं सफू तथा लेख रचनाया प्रकाशनं विदेशय् नेपाःया इतिहास, नेपालभाषा साहित्य, नेपाःया शिक्षायाबारे सम्प्रेषण जूगु दु । नेपाली भाषाया थीथी पत्रिकाय् नं २५ पुं मयाक वय्‌कःया शोधमूलक च्वसु पिदंगु दुसा राष्ट्रिय अन्तराष्ट्रिय थीथी गोष्ठीइ ब्वति कयाः तःपु हे ग्यसुग्यंगु नेपाः व नेपालभाषाया जः ह्वलीगु कार्यपत्र प्रस्तुत यानादीगु दु ।

अध्ययनशील चिन्तनशील व्यक्तित्व कमलप्रकाश मल्लं अध्ययन तथा शिक्षण सेवाया झ्वलय् तःगू पदक व विभुषण प्राप्त यानादीगु दु । गथे— महेन्द्र विद्याभूषण, शुभराज्याभिषेक पदक, गोरखा दक्षिणबाहु तृतिय व चौथौं, त्रिशक्तिपट्ट – तृतिय, The Toyota Foundation intelligent Grants आदि । थ्व संसारय् सदां सुं नं च्वनेमदु धयातःथें विद्वान कमलप्रकाश मल्लं नं ने.सं ११३९ य् थःगु नश्वर देह त्वःतादिल ।