अबु कृष्णहरि महर्जन व मां सीतादेवी महर्जनया कोखं ने.सं. १०९४ कछलागा आमै कुन्हु किपु पांगाया धुसित्वालय् मय्जु रिता महर्जनया जन्म जूगु खः । इलाहवाद संगीत महाविद्यालयपाखें संगीत विसारदया उपाधि कयादीम्ह मय्जु रीता महर्जन बांलाःम्ह म्ये हालामि व संगीतकारया नापं छम्ह कवयित्री नं खः ।
रीता महर्जनं हालादीगु म्येया म्येचाः (सिडी) थुकथं दु– हः छहः, पियाच्वना, मां, मृत्यु शड्ढयाय् ह्वःगु स्वां, यःम्ह छ यय्कूम्ह छ, मतिनाया स्वां, बौद्ध म्ये मुना, रिता २ हर वेष्ट आदि खः । वय्कःया पिदंगु साहित्यीक कृति थुकथं दु– मांया लमुन्तिइ मांनाप चीनया यात्रा संस्मरण (ने.सं.११३७), अन्तः मनया मौन अभिव्यक्ति (ने.सं.११३८) । बौद्ध ऋषि कविता, म्येँ, हाइकु यात्रा संस्मरण च्वयादीम्ह मय्जु रिता महर्जनया कविताय् बिशेष यानाः वेदनावादी धाः प्रवाहित जुयाच्वंगु झीसं खंकेफु । अथेहे वय्कःया कविताय् अतिकं प्रौढ, आत्मिक व दार्शनिक मतिनाया अभिव्यक्तिं नं झूचायाच्वनी । वय्कः दान्यहिरा हःपाः सिरपाः, नातिकाजी संगीत प्रतिभा पुरस्कार, ज्यापु विशेष सम्मान, पेजथ्री नेपालभाषा पिपुल्स च्वाइस अवार्ड आदिपाखें सम्मानित जुयादीधुंकूगु दु ।
नेपालभाषा साहित्य ख्यलय् न्हू च्वमिकथं खनेदयेकः झाःम्ह रीता महर्जन मां लक्ष्मी व अबु चिरीकाजी महर्जनया कोखं ने.सं. १०९० य् जन्म जूम्ह खः । थ्वय्कःया ल्हाः बाखं, चीबाखं, हाइकु व उपन्यासय् न्ह्याःगु दसुकथं बाखं सफू ऋतु (ने.सं. ११४१), उपन्यास हामा (ने.सं. ११४१) व हाइकु सफू भावनाया किचः (ने.सं. ११४२) ब्वमिपिनिगु ल्हातय् लःल्हानादी धुंकूगु दु । समाजय् खनेदुगु बिकृति, बिसंगति, रोजगारया निंतिं विदेशय् वनीपिनिगु समस्या, मानवीय मूल्य–मान्यता म्हो जुयावंगु आदि समस्यात थ्वय्कःया बाखंया विषयवस्तु जुयाच्वनी । नेवाः समाजया दुग्यंगु चित्रण हे थ्वय्कःया बाखं उपन्यासया छगू विशेषता जूगु दु । मानवीय भावनाया विश्लेषण यायेगु कुतः नं थ्वय्कःया उपन्यासय् खनेदु । थ्वय्कः श्याम याताजः चिबाखं हःपाः सिरपाः (ने.सं. ११४१) व बौद्ध बाखनय् हःपाः सिरपाः (ने.सं. ११४२) त्याकेत ताःलानादीगु दु ।